Միացեալ Նահանգներու Ներկայացուցիչներու Տան Որոշումը Դրականօրէն Կը Ցոլացնէ Հայ Ժողովուրդի Արդարութեան Եւ Իրաւունքի Հարցը, Ըսաւ Դոկտ. Մոհամետ Նուրէտտին

0
221

Միացեալ Նահանգներու Ներկայացուցիչերու տան որդեգրած` Հայոց ցեղասպանութեան ճանաչման մասին բանաձեւին առիթով «Վանայ ձայն»-ին հետ հարցազրոյցի ընթացքին իր կարծիքը արտայայտեց դոկտ. Մոհամետ Նուրէտտին: Ան ըսաւ, որ 1948-ին եւ 1975-ին Հայոց ցեղասպանութեան բանաձեւը անցած է Ներկայացուցիչներու տունէն, բայց չէ շարունակած իր ճամբան դէպի ծերակոյտ: «Ներկայիս բանաձեւի ընդումումը տեղի ունեցաւ 405 ներկայացուցիչներու թեր եւ 11 ներկայացուցիչի դէմ քուէարկումով: Դեմոկրատներու եւ հանրապետականներու քուէարկութիւնը կը յուշէ, որ Հայոց ցեղասպանութեան բանաձեւը կրնայ հասնիլ նաեւ ծերակոյտ եւ քուէարկութեան դրուիլ, որմէ ետք բանաձեւը կը հասնի նախագահին, որ կրնայ զայն մերժել կամ ընդունիլ: Եթէ մերժէ, բանաձեւը կրկին կը մտնէ Ներկայացուցիչներու տուն, անկէ ալ կրկին ծերակոյտին կը հասնի, այս պարագային ա՛լ պէտք չըլլար, որ նախագահը իր համաձայնութիւնը տայ, որպէսզի գործադրուի եւ դառնայ պաշտօնական կեցուածք ամերիկեան յայտարարութիւններուն մէջ», ըսաւ ան:

Դոկտ. Մոհամետ Նուրէտտին հաստատեց, որ Միացեալ Նահանգներու Ներկայացուցիչերու տան որոշումը դրականօրէն կը ցոլացնէ հայ ժողովուրդի արդարութեան եւ իրաւունքի հարցը, բայց անիկա չի նշանակեր, որ Միացեալ Նահանգները այս որոշումը կը կայացնեն հիմնուելով մարդկային եւ բարոյական չափանիշներու վրայ, այլ` քաղաքական նկատառումներու, որովհետեւ Միացեալ Նահանգները միշտ ալ իրենց շահերը վեր կը դասեն ամէն ինչէ, եթէ նոյնիսկ անիկա կապուած ըլլայ արդար հարցի մը հետ, ինչպէս որ է Հայոց ցեղասպանութեան հարցը: Նկատի ունենալով, որ Թուրքիան անդամ է ՕԹԱՆ-ին, այս որոշումը եթէ նոյնիսկ հասնի ծերակոյտ, ապա` նախագահ, ատիկա պարզապէս քայլ մըն է` ճնշում բանեցնելու Թուրքիոյ վրայ:

Ան ըսաւ, որ 31 պետութիւններ ճանչցած են Հայոց ցեղասպանութիւնը, բայց ոչ բոլորը որոշում տուած են այդ մասին. օրինակ Ռուսիան ճանչցած է Հայոց ցեղասպանութիւնը, բայց որոշում չէ տուած այդ մասին: Ռուսիան առաջին թշնամին էր Թուրքիոյ Պաղ պատերազմի ընթացքին, իսկ այսօր Ռուսիան Թուրքիոյ հետ լաւ յարաբերութեան մէջ է: Խնդիրը որոշում տալը չէ, այլ զայն գործադրելն է:

Խօսելով Թուրքիոյ յարաբերութիւններուն մասին` Միացեալ Նահանգներու եւ Ռուսիոյ հետ եւ անոր ունեցած միջազգային հաւասարակշռութեան մասին, ան ըսաւ, որ ծանօթ է, թէ ի՛նչ կրնայ ըլլալ Թուրքիոյ կեցուածքը Միացեալ Նահանգներու Ներկայացուցիչներու տան որոշումին մասին, որ է` ամբողջական մերժում: «Թուրքիան զայն համարեց անարժէք: Ասիկա բնական է իր բոլոր քաղաքական ուժերուն համար` ըլլան անոնք ձախակողմեան, աջակողմեան , իսլամական կամ հասարակական, իրենց համար ասիկա ազգային հարց է առաջին հերթին: Որքան ալ ժամանակ անցնի, Թուրքիոյ դիրքը պիտի չփոխուի այս հարցին գծով, որովհետեւ եթէ Թուրքիան ընդունի իր կատարած ցեղասպանութիւնը 1915-ին, ստիպուած պիտի ըլլայ փոխհատուցում կատարել հայ ժողովուրդի զաւակներուն եւ անոնց առիթ տալ վերադառնալու իրենց պապենական հողերը, որոնք կը գտնուին Թուրքիոյ արեւելեան բաժինին մէջ, որ կրնայ դառնալ առաջուան պէս օսմանական տարածք` հայերով բնակեցուած: Թուրքերը ոչ միայն պատրաստ չեն ընդունելու Ցեղասպանութիւնը, այլ կը կարծեմ, որ իրականութեան մէջ այս երեւոյթները եւ առնուելիք քայլերը իրական չեն կրնար ըլլալ ներկայ պայմաններուն մէջ: Եթէ նոյնիսկ հարցին միայն բարոյապէս նայի Թուրքիան, կրկին անոր կեցուածքը դրական պիտի չըլլայ: Թուրքիան որքան ալ ներկայիս լաւ յարաբերութիւն ունենայ Ռուսիոյ հետ, ան կը շարունակէ մնալ ՕԹԱՆ-ի անդամ, հետեւաբար ոչ միայն եւրոպական երկիրները, այլ Միացեալ Նահանգները չեն կրնար հրաժարիլ անոր ունեցած դերէն տարածաշրջանին մէջ: Անցեալին որքան ալ տագնապներ եղած են Թուրքիոյ եւ Միացեալ Նահանգներուն միջեւ, բայց միշտ ալ յաղթահարուած են , այսօր ալ որքան վատանան յարաբերութիւնները, Թուրքիան միշտ պէտք ունի Միացեալ Նահանգներու նեցուկին, իսկ վերջինս ալ` անոր դիրքին, մանաւանդ` Միջին Արեւելքի ներկայ պայմաններուն մէջ», ըսաւ ան:

LEAVE A REPLY

Please enter your comment!
Please enter your name here