Նախագահ Աուն. «Փտածութեան Վերաբերող 17 Թղթածրարներ Յանձնուած Են Հետաքննութեան»

0
128

Հանրապետութեան նախագահ զօր. Միշել Աուն երէկ Պաապտայի պալատին մէջ ընդունեց Համաշխարհային դրամատան Հիւսիսային Ափրիկէի եւ Միջին Արեւելքի գործերու շրջանային տնօրէն Սարուժ Քումար Ժահը, որուն յայտնեց, որ նոր կառավարութիւնը պիտի ներառէ փորձառու, ունակ, լաւ համբաւ ունեցող եւ փտածութեան կասկածներէ հեռու նախարարներ: Հանրապետութեան նախագահը նշեց նաեւ, որ պատասխանատուութեան պիտի ենթարկուին բոլոր ներկայ եւ նախկին պատասխանատուները, որոնց շուրջ փտածութեան կասկածներ կան:

Նախագահ Աուն հանդիպման ընթացքին նաեւ նշեց, որ Լիբանան կը գտնուի տնտեսական բարդ կացութեան մէջ եւ կարիքը ունի ներդաշնակ կառավարութեան, որ ունակ է արտադրելու, եւ անոր աշխատանքը չի խոչընդոտուիր քաղաքական պայքարներու եւ մրցակցութիւններու պատճառով, ինչպէս նաեւ կը ստանայ ժողովուրդէն պահանջուած աջակցութիւնը: Հանրապետութեան նախագահը աւելցուց, որ փտածութեան դէմ պայքարելու առումով իր ներկայացուցած ծրագիրները կը գտնուին խորհրդարանին տրամադրութեան տակ, եւ անոնցմէ ամէնէն կարեւորները կը նկատուին դրամատնային հաշիւներու գաղտնիութեան վերացումը, մեղաւորներուն անձեռնմխելիութեան վերացումը, թալանուած գումարներու վերադարձը եւ հանրային դրամի վերաբերեալ ոճիրներու յատուկ դատարանի ստեղծումը:

Նախագահ Աուն հաստատեց, որ ինք կ՛աշխատի արմատախիլ ընել տարիներէ ի վեր բոյն դրած փտածութիւնը եւ վերջ տալ պետական կառոյցներուն մէջ գոյութիւն ունեցող փտածութեան եւ քաոսին: Հանրապետութեան նախագահը յայտնեց, որ ինք պիտի չվարանի առաջարկելու բարեկարգումներու որեւէ օրէնք, որ կը համապատասխանէ նոր փուլի առաջնահերթութեան` տրուած ըլլալով, որ փտածութեան վերաբերող 17 թղթածրարներ յանձնուած են հետաքննութեան, եւ բոլոր մեղաւորները պատասխանատուութեան պիտի ենթարկուին:

Նախագահ Աուն շնորհակալութիւն յայտնեց Քումար Ժահին` Համաշխարհային դրամատան Լիբանանին տուած օժանդակութեան համար` շեշտելով, որ որեւէ ծրագիրի գործադրութեան մէջ արձանագրուած ուշացումը պիտի գտնէ համապատասխան լուծումներ, երբ նոր կառավարութիւնը կազմուի:

Քումար Ժահ իր կարգին հանրապետութեան նախագահին յայտնեց Համաշխարհային դրամատան տեսակէտը Լիբանանի մէջ տեղի ունեցող իրադարձութիւններուն վերաբերեալ` հաստատելով, որ դրամատունը պիտի շարունակէ Լիբանանին օժանդակութիւն տրամադրել պահանջուող մարզերուն մէջ:

LEAVE A REPLY

Please enter your comment!
Please enter your name here