Ըստ «Պլումպըրկ»-ի՝ ամերիկեան վարչակազմը դէմ Է Թուրքիոյ դէմ պատիժներու հաստատման եւ Ցեղասպանութեան բանաձեւի որդեգրման

0
321

Միացեալ Նահանգներու նախագահ Տանըլտ Թրամփի վարչակազմը դէմ է անցեալ շաբաթ Ներկայացուցիչներու տան կողմէ որդեգրուած` Թուրքիոյ դէմ պատիժներ սահամնող եւ Հայոց ցեղասպանութիւնը ճանչցող բանաձեւերուն, որովհետեւ երկու նախաձեռնութիւններն ալ կրնան յանգեցնել ՕԹԱՆ-ի առանցքային դաշնակիցի հետ յարաբերութիւններու յաւելեալ լարումի: «Պլումպըրկ» լրասփիւռը կը հաղորդէ, որ այս մասին յայտնած է Միացեալ Նահանգներու Արտաքին գործոց նախարարութենէն բարձրաստիճան պաշտօնատար մը:
“Վարչակազմը մտահոգ է, որ հիւսիսային Սուրիոյ մէջ Թուրքիոյ զինուորական արշաւին ի պատասխան անցեալ շաբաթ Ներկայացուցիչներու տան մէջ 403 թեր եւ 16 դէմ քուէներով որդեգրուած պատիժները պիտի կապեն Միացեալ Նահանգներու ձեռքերը եւ պիտի սահմանափակեն Թուրքիոյ գործողութիւններուն վերաբերեալ Միացեալ Նահանգներու մտահոգութիւնները լուծելու ընտրանքները”, նշած է պաշտօնատարը, որ նախընտրած է չբացայայտել իր անունը: Ան նաեւ մերժած է տեղեկացնել` արդեօք նախագահ Թրամփ մտադի՞ր է օրինագիծին դէմ վեթօ կիրարկել, թէ՞ ոչ:
Ներկայացուցիչներու տան թիւ 4695 բանաձեւով թուրք աւագ պաշտօնատարներու դէմ կը հաստատուին պատիժներ, որոնց շարքին կ՚արգիլուի անոնց Միացեալ Նահանգներ մուտքը: Բանաձեւով կ՚արգիլուի նաեւ Միացեալ Նահանգներու պաշտպանական սպառազինութեան մատակարարումը Թուրքիոյ` Սուրիոյ մէջ օգտագործելու նպատակով, ինչպէս նաեւ Փենթակոնէն եւ Արտաքին գործոց նախարարութենէն կը պահանջուի տուեալներու փոխանցում` Տահէշ ահաբեկչական խմբաւորման հետագայ վերածնունդը կանխարգիլելու համար:
Ներկայացուցիչներու տան Արտաքին յարաբերութիւններու յանձնախումբի նախագահ, Նիւ Եորք քաղաքը ներկայացնող դեմոկրատական Էլիոթ Էնկել քննարկման ընթացքին բացատրած էր. “Թրամփ Էրտողանի համար կանաչ լոյս վառած է Սուրիոյ հիւսիսը զինեալ ներխուժում կատարելու համար, ինչ որ յանգեցուցած է սուրիացի Քիւրտերու կոտորածին. վերջիններս Միացեալ Նահանգներու հետ կը պայքարին Տահէշ-ի դէմ”: Վարչակազմը հերքած է այն միտքը, որ ամերիկեան զօրքերը Սուրիոյ հիւսիսէն դուրս բերելու Թրամփի որոշումը՝ Անգարայի համար յառաջ շարժելու ազդանշան հանդիսացած է:
Ինչ կը վերաբերի Հայոց ցեղասպանութեան մասին բանաձեւի որդեգրման՝ վարչակազմի պաշտօնատարը «Պլումպըրկ»-ին յայտնած է, թէ այդ քուէարկութիւնը կատարուեցաւ սխալ պահու մինչ նոյն Ներկայացուցիչներու տունը Թուրքիան կը դատապարտէր Սուրիա մուտք գործելուն համար, եւ ատիկա կրնայ պատճառ դառնալ, որ օրէնսդրութիւնը սկզբունքային ըլլալուն տեղ պատժական թուի:
Թրամփի վարչակազմը նախապէս զերծ մնացած է նախաձեռնութիւններուն մասին յայտարարութիւններ կատարելէ, սակայն նախկին վարչակազմեր եւս զգուշութիւն դրսեւորած են Ցեղասպանութեան մասին բանաձեւերուն նկատմամբ, նշելով՝ որ անոնք կրնան միայն խանգարել հաշտեցումը: Թուրքիա տարիներ շարունակ զգուշացուցած է, որ այդպիսի բանաձեւերը կրնան յանգեցնել յարաբերութիւններու խաթարման:
Պաշտօնատարը յայտնած է, որ ԱՄՆ իր դիրքորոշումը չէ փոխած եւ կը սգայ Օսմանեան կայսրութեան վերջին տարիներուն աքսորուած եւ ջարդուած 1,5 միլիոն Հայերը: “ԱՄՆ արդէն կ՚ոգեկոչէ «Մեծ եղեռն»-ը, զայն կոչելով 20-րդ դարու վատագոյն զանգուածային վայրագութիւններէն մէկը եւ կ՚ողջունէ իրենց պատմութեան հետ առերեսելու Հայաստանի եւ Թուրքիոյ ջանքերը”, «Պլումպըրկ»-ին ըսած է պաշտօնատարը:

LEAVE A REPLY

Please enter your comment!
Please enter your name here