Այլախոհ Թուրք Լրագրողին Մասնակցութիւնը Սուր Բանավէճ Ստեղծեց Եւրոխորհրդարանին Մէջ

0
378

ՊՈԼԻՍ.- Անգարայի կողմէ հետապնդուող եւ «Ճումհուրիյէթ» թերթի նախկին խմբագիրներէն Ճան Տիւնտար, որ ներկայիս Գերմանիա ապաստանած է, շաբաթավերջին ճգնաժամի մը պատճառ դարձաւ Եւրոպական խորհրդարանին մէջ։

Լուրը հաղորդած «Թէ. 24» կայքը կը գրէ, թէ Եւրոպական խորհրդարանին կողմէ կազմակերպուած էր «Աշխարհի ժողովրդավարութիւնը» նիւթով համաժողովը, որուն նիստերէն մէկուն՝ «Լրագրողներու վրայ յարձակումներ» խորագիրով մասնակցեցաւ նաեւ Տիւնտար, բայց անոր ներկայութեան եւ ելոյթ ունենալուն դէմ բողոքեց Եւրոպան խորհդարանին մօտ Թուրքիոյ դեսպան Քաան Էսեներ։ Էսեներ իր սուր բողոքը արտայայտելէ ետք, զայրացած՝ հեռացաւ սրահէն, երբ Տիւնտար սկսաւ խօսիլ։

Մարդկային իրաւունքներու պաշտպան՝ իրաւաբան Նիհատ Տատ կը գրէ, թէ Թուրքիոյ դեսպանը նիստին ընթացքին, տեսնելով Տիւնտարը՝ պոռացած էր. «Սրահին մէջ ահաբեկիչ մը նստած է»։ «Այսօր կը մասնակցէի «Լրագրողներու վրայ յարձակումներ» նիստին եւ այդ ժողովին ընթացքին դուք ¤Թուրքիոյ դեսպանը) ճիշդ լրագրողներու վրայ այդպիսի յարձակման օրինակը տուիք։ Ձեր շնորհիւ ներկաները եւ պատկերասփիւռի դիտորդները հասկցան, թէ ինչի՛ դէմ կը պայքարինք. հասկցան, թէ որքա՛ն իրաւացի ենք։ Երանի՜ թէ փոխանակ սուտեր շարադրելու եւ սրահը լքելու, մնայիք սրահին մէջ ու առերեսուէիք ինծի հետ։ Երանի՜ թէ փոխանակ անհիմն կերպով լրագրող մը ամբաստանելու, վկայէիք ու տեսնէիք, թէ ինչպէ՛ս կը խայտառակէք դուք ձեզ եւ մեր երկիրը։ Ես ձեր անունով ցաւ կը զգամ, որ դուք՝ իբրեւ քաղաքագէտ կը ստիպուիք պաշտպանել վարչակարգ մը, որ բռնաճնշումներ կը գործադրէ։ Ինչ որ ընէք, պիտի չկարենաք լռեցնել ճշմարտութեան ձայնը։ Բայց գիտցէք, որ ապագային ամօթ պիտի զգաք ձեր ըսածներէն։ Եթէ նոյնիսկ դուք չամչնաք, ձեր զաւակները պիտի ամչնան», իր կարգին կը գրէ Տիւնտար։

LEAVE A REPLY

Please enter your comment!
Please enter your name here