«Առանց Լեռնային Ղարաբաղի Ժողովուրդին Անկարելի Պիտի Ըլլայ Ձեւակերպել Որեւէ Համաձայնութիւն». Ս. Լաւրով

0
304

ԵՐԵՒԱՆ, «Արմէնփրէս».- 11 Նոյեմբերին, Ռուսիոյ արտաքին գործոց նախարար Սերկէյ Լաւրով այցելեց Հայաստան, ուր հանդիպումներ ունեցաւ Հայաստանի նախագահ Արմէն Սարգսեանի, վարչապետ Նիկոլ Փաշինեանի, արտաքին գործոց նախարար Զօհրապ Մնացականեանի հետ, նաեւ տուաւ մամլոյ ասուլիս մը, որուն ընթացքին կատարեց յայտարարութիւններ՝ Հայաստանին վերաբերող զանազան հարցերու մասին։

Հայաստանի արտաքին գործոց նախարար Զօհրապ Մնացականեան մամլոյ ասուլիսին ընթացքին ըսաւ, որ այս հանդիպումին անդրադարձ կատարուեցաւ Հայաստան-Ռուսիա երկկողմանի օրակարգին՝ իբրեւ շարունակութիւն տարբեր հարթակներու վրայ 1.5 տարուան ընթացքին կայացած տարբեր հանդիպումներուն: Ըստ անոր՝ երկու երկիրներուն յարաբերութիւնները խոր ու բովանդակալից են եւ անոնք կը զարգանան բոլոր ուղղութիւններով: Ռուսիան Հայաստանի թիւ մէկ տնտեսական գործընկերն է, երկկողմանի առեւտրաշրջանառութիւնը՝ նախորդ տարուան հետ բաղդատած, աւելցած է 10 տոկոսով: Մնացականեան աւելցուց, որ կան նաեւ մշակութային սերտ կապեր, միջազգային հարթակներու վրայ համագործակցութիւն՝ աւելցնելով, որ Հայաստան երախտագիտութիւն յայտնեց Ռուսիոյ՝ Սուրիոյ մէջ ապրող մեր հայրենակիցներուն աջակցութեան համար, նաեւ ընդգծուեցաւ Սուրիոյ մէջ Հայկական մարդասիրական առաքելութեան խումբի կարեւորութիւնը:

Մնացականեան յայտնեց, որ Հայաստան բարձր կը գնահատէ նաեւ Ռուսիոյ՝ ԵԱՀԿ Մինսկի խումբի համանախագահ երկիրներու հետ մէկտեղ, միջնորդական առաքելութիւնը։ «Հիմնախնդիրը, ինչպէս բազմիցս նշել եմ, վերաբերում է իրենց պատմական հայրենիքում ապրող մեր հայրենակիցներին, մարդկանց ու նրանց իրաւունքների ու ազատութիւնների իրականացմանը: Որպէս Արցախի անվտանգութեան երաշխաւոր՝ մենք յանձնառու ենք ապահովելու խաղաղ կարգաւորման այնպիսի միջավայր, որը կը յարգի Արցախի ժողովրդի իրաւունքները, յատկապէս ինքնորոշման իրաւունքի իրականացումը՝ առանց սահմանափակման եւ հարկադրանքի: Գործընկերոջս հետ համակարծիք ենք, որ խաղաղութիւնը մեր տարածաշրջանում այլընտրանք չունի», շեշտեց Հայաստանի արտաքին գործոց նախարարը:

Ըստ Սերկէյ Լաւրովի՝ առանց Լեռնային Ղարաբաղի ժողովուրդին անկարելի պիտի ըլլայ ձեւակերպել որեւէ համաձայնութիւն՝ Լեռնային Ղարաբաղի տագնապի լուծման բանակցութիւններուն առնչուած: «Աւելի վաղ փուլի, երբ դադրած էին ռազմական գործողութիւնները, Լեռնային Ղարաբաղը բանակցութիւններու մասնակից էր, սակայն ինչ-որ փուլի մը Հայաստանի նախկին նախագահներէն մէկը որոշեց, որ Լեռնային Ղարաբաղի շահերը պէտք է ներկայացնէ Երեւանը: Որեւէ պարագայի մենք, որպէս համանախագահներ, կրնանք միայն աւելցնել, որ գործընթացը ընթացած է ընդհանուր համաձայնութեամբ: Առանց Լեռնային Ղարաբաղի ժողովուրդին, անոր բնակչութեան, կարելի չէ ձեւակերպել որեւէ համաձայնութիւն: Հայաստան ուղղակի չի ստորագրեր», ըսաւ Լաւրով:

Լեռնային Ղարաբաղի տագնապի լուծման սկզբունքներուն մասին Լաւրով մէջբերեց Հայաստանի վարչապետ Նիկոլ Փաշինեանի այն յայտարարութիւնը, թէ հակամարտութեան կարգաւորման որեւէ լուծում պէտք է ընդունելի ըլլայ Հայաստանի ժողովուրդին, Արցախի ժողովուրդին եւ Ատրպէյճանի ժողովուրդին համար: «Սկզբունքօրէն՝ տարածքային ամբողջականութիւնը, ինքնորոշումը եւ տագնապի բացառապէս խաղաղ լուծումը ճշդուած են ամէն տեսակի փաստաթուղթերու մէջ, որոնք կը քննարկուին կողմերուն միջեւ: Որեւէ պարագայի, վերջնական որոշումը պէտք է հաշուի առնէ այս բոլոր սկզբունքները: Այս հարցին շուրջ ո՛չ Երեւանը, ո՛չ ալ Պաքուն կը վիճին», յայտնեց Լաւրով։

Մամլոյ ասուլիսին ընթացքին Ռուսիոյ արտաքին գործոց նախարարը նաեւ խօսեցաւ Հայաստանի եւ Թուրքիոյ յարաբերութիւններուն մասին՝ հաստատելով, որ Ռուսիա պատրաստ է նպաստելու Հայաստանի եւ Թուրքիոյ միջեւ յարաբերութիւններու լուծման։ Դիտել տալով, որ Ռուսիա բնական յարաբերութիւններ ունի ՀԱՊԿ, ԱՊՀ, ԵԱՏՄ-ի բոլոր գործընկերներուն հետ՝ Լաւրով յայտնեց, որ իր երկիրը կ՛ուզէ աջակցիլ Հայաստանի եւ Թուրքիոյ միջեւ գոյութիւն ունեցող խնդիրներու յաղթահարման: Նշելով, որ 2010 թուականին Ռուսիան աշխոյժ կերպով նպաստած է Ցիւրիխեան արձանագրութիւններու ստորագրման՝ նախարար Լաւրով ափսոսանք յայտնեց անոնց ճակատագիրին վերաբերեալ:

«Մենք կը շարունակենք պատրաստ ըլլալ։ Ատոր համար անհրաժեշտ է երկու կողմերուն շահագրգռուածութիւնը: Մենք պատրաստ ենք մեր կարելիութիւնները օգտագործելու այն նպատակով, որ յառաջ մղենք Հայաստանի եւ Թուրքիոյ միջեւ յարաբերութիւններու լուծումը: Մենք բացարձակապէս որեւէ հիմք չենք տեսներ ենթադրելու, որ այս երկիրներուն միջեւ մէկը պատերազմի պիտի սկսի, եւ ամէն պարագայի մեր ամբողջ քաղաքականութիւնը ուղղուած է այստեղ խաղաղութիւն, համագոյակցութիւն եւ փոխշահաւէտ համագործակցութիւն հաստատելուն», նշեց ան:

Ռուսիոյ եւ Հայաստանի արտաքին գործոց նախարարութիւններուն միջեւ նաեւ ստորագրուեցաւ խորհրդակցութիւններու 2020-2021 տարիներու ծրագիրը:

ՓԱՇԻՆԵԱՆԻ ՀԵՏ

Սերկէյ Լաւրովը ողջունելով՝ վարչապետ Նիկոլ Փաշինեան անդրադարձաւ նախորդ մէկուկէս տարուան ընթացքին Հայաստանի մէջ արձանագրուած փոփոխութիւններուն՝ լուսարձակի տակ առնելով Ռուսիոյ հետ յարաբերութիւնները տարբեր մակարդակի վրայ։ Նիկոլ Փաշինեան ընդգծեց, որ Հայաստանը Եւրասիական տնտեսական միութեան մէջ ունեցած է արդիւնաւէտ նախագահութիւն՝ յիշեցնելով, որ վերջերս Երեւանի մէջ տեղի ունեցաւ ԵԱՏՄ Բարձրագոյն տնտեսական խորհուրդի նիստը:

Ս. Լաւրով վարչապետին փոխանցեց Ռուսիոյ նախագահ Վլատիմիր Փութինի եւ կառավարութեան ղեկավար Տմիթրի Մետվետեւի ջերմ ողջոյնները եւ ընդգծեց տարբեր գերատեսչութիւններու գիծով Հայաստանի ու Ռուսիոյ միջեւ սերտ կապերը: Ան գոհունակութիւն յայտնեց, որ կը զարգանայ եւ մնայուն կերպով կ՛աճի նաեւ երկկողմանի առեւտրաշրջանառութիւնը՝ հաստատելով, որ Ռուսիան Հայաստանի տնտեսական առաջատար գործընկերն է, Հայաստանի տնտեսութեան մէջ առաջին ներդրողը: Լաւրով դիտել տուաւ, որ քանի մը շաբաթէն Պիշքեքի մէջ տեղի պիտի ունենայ կարեւոր միջոցառում մը՝ ՀԱՊԿ գագաթնաժողովը, ուր եւս յառաջ պիտի մղուի գործակցութիւնը՝ կապուած ռազմաքաղաքական անվտանգութեան եւ դաշնակցային համագործակցութեան։

Հայաստանի վարչապետը ու Ռուսիոյ արտաքին գործոց նախարարը քննարկեցին հայ-ռուսական յարաբերութիւններու օրակարգային շարք մը հարցեր, որոնք կը վերաբերին քաղաքական եւ տնտեսական համագործակցութեան: Զրուցակիցները միտքեր փոխանակեցին նաեւ տարածաշրջանային նշանակութեան հարցերու շուրջ, անդրադարձան Լեռնային Ղարաբաղի հակամարտութեան կարգաւորման գործընթացին:

Վարչապետ Փաշինեան շեշտեց, որ Ռուսիա կարեւոր դերակատարութիւն ունի տարածաշրջանին մէջ անվտանգութեան, կայունութեան եւ խաղաղութեան պահպանման գործին մէջ:

Նիկոլ Փաշինեան եւ Սերկէյ Լաւրով շեշտեցին ԵԱՀԿ Մինսկի խումբի ծիրին մէջ Ղարաբաղի տագնապի խաղաղ լուծման կարեւորութիւնը եւ մարդասիրական ծրագիրներու իրականացման անհրաժեշտութիւնը՝ հակամարտութեան կողմերուն միջեւ փոխվստահութեան մթնոլորտի ձեւաւորման առումով:

Նախարար Լաւրով հանդիպում ունեցաւ նաեւ նախագահ Արմէն Սարգսեանի հետ, որ անդրադարձաւ Հայաստանի եւ Ռուսիոյ միջեւ յարաբերութիւններու աշխոյժ զարգացման, հայ-ռուսական բարեկամութեան ամրապնդման գործընթացին: Ան իր ողջոյնները փոխանցեց նախագահ Փութինի։

Սերկէյ Լաւրով, իր կարգին, նախագահ Սարգսեանին փոխանցեց նախագահ Վլատիմիր Փութինի լաւագոյն բարեմաղթանքները՝ շեշտելով, որ շատ լաւ են դաշնակցային յարաբերութիւններն ու ռազմավարական գործընկերութիւնը բոլոր ոլորտներուն մէջ։

Խօսելով համագործակցութեան հեռանկարներուն մասին՝ նախագահ Սարգսեան ներկայացուց նախագահական նախաձեռնութիւններու ծիրին մէջ յաջորդ տարուան ընթացքին Հայաստանի մէջ նախատեսուող շարք մը միջոցառումները, որոնց կարգին մեծ տեղ կը գրաւեն արհեստագիտութեան ու ընդհանրապէս գիտութեան զարգացման վերաբերողները։

Հայաստան տուած այցելութեան ծիրին մէջ Ռուսիոյ արտաքին գործոց նախարարը՝ Հայաստանի արտաքին գործոց փոխնարար Շաւարշ Քոչարեանի եւ Հայոց Ցեղասպանութեան թանգարան-հիմնարկի տնօրէն Յարութիւն Մարութեանի ընկերակցութեամբ, այցելեց Հայոց Ցեղասպանութեան յուշահամալիր: Լաւրով ծաղկեպսակ զետեղեց, յարգանքի տուրք մատուցեց Հայոց Ցեղասպանութեան զոհերու յիշատակին, ապա ջուր տուաւ «Յիշողութեան պուրակ»ին մէջ 12 տարի առաջ իր տնկած եղեւնիին:

LEAVE A REPLY

Please enter your comment!
Please enter your name here