«Ես Ցուցարարներուն Երեք Անգամ Կոչ Ուղղեցի Միասնաբար Գործելու Եւ Բարեկարգումները Գործադրելու, Սակայն Անոնք Չօժանդակեցին Ինծի» Շեշտեց Նախագահ Աուն

0
319
Ժողովրդային Շարժումի Ցուցարարները Մագլցողական
Քայլերու Դիմեցին.  Զոհ Մը` Բանակի Կրակոցին Պատճառով

Ժողովրդային շարժումի ցոյցերը երէկ 27-րդ օրն ըլլալով շարունակուեցան, այս անգամ բողոքի ցոյցի հիմնական կեդրոն ընտրելով Պէյրութի Արդարութեան պալատը:

Առաւօտեան կանուխ ժամերէն մինչեւ կէսօր բողոքի նստացոյցը շարունակելէ ետք, կէսօրին ցուցարարները վրաններ լարեցին Արդարութեան պալատին դիմաց եւ յայտարարեցին, որ որոշած են մնալ հոն:

Նշենք, որ ցուցարարներուն եւ իրաւաբանի մը միջեւ արձանագրուեցաւ հրմշտուք, որուն պատճառը այն էր, որ իրաւաբանը կը փափաքէր Արդարութեան պալատ մուտք գործել, իսկ ցուցարարները կ՛ուզէին արգիլել անոր մուտքը:

Առաւօտեան կանուխ ժամերուն ժողովրդային շարժումին մաս կազմող երիտասարդներ պարբերաբար փակեցին Պէյրութի շրջանի ու անոր կարգ մը արուարձաններուն ճամբաները, սակայն ցոյցի հիմնական կեդրոնները եղան կրթութեան նախարարութիւնը, Պէյրութի, Զահլէի, Սայտայի եւ Սուրի Արդարութեան պալատները, կարգ մը դրամատուներ, բջիջային հեռաձայնի ընկերութիւնները, ինչպէս նաեւ կարգ մը լումայափոխները, որոնք ամերիկեան տոլարի համար ճշդուած սակը շրջանցելով կը գործեն:

Ռըմէյշի մէջ ցոյցերը շարունակուեցան դպրոցներու աշակերտներուն կողմէ, իսկ Նապաթիէի մէջ պետական դպրոցներուն մէջ պայմանագրութեամբ դասաւանդող ուսուցիչները կատարեցին բողոքի ցոյց մը` պետութենէն պահանջելով զիրենք իրենց աշխատանքին մէջ ամրագրել իբրեւ լիիրաւ պաշտօնեաներ:

Յետմիջօրէին ցուցարարները սկսան համախմբուիլ Ռիատ Սոլհի, Նահատակաց հրապարակին, Աքքարի մէջ եւ Թրիփոլիի Նուր հրապարակին վրայ:

Երեկոյեան ժամը 6:00-ին ցուցարարները ուղղուեցան ֆրանսական դեսպանատուն եւ բողոքի ցոյց մը կատարեցին դեսպանատան դիմաց` Ֆրանսան մեղադրելով Լիբանանի ներքին հարցերուն միջամուխ դառնալու յանցանքով:

Մինչ ցոյցերը կը շարունակուէին, Ֆրանսայի նախագահ Էմանուէլ Մաքրոնի անձնական պատուիրակ Քրիսթոֆ Ֆարնօ յետմիջօրէին յատուկ առաքելութեամբ մը ժամանեց Լիբանան, ուր այսօր հանդիպումներ պիտի ունենայ իշխանութեան պետերուն եւ համաժողովրդային շարժումի ներկայացուցիչներուն հետ:

Երէկ գիշեր ժամը 10:00-ին շուրջ Ֆարնօ այցելեց Ընկերվար յառաջդիմական կուսակցութեան ղեկավար Ուալիտ Ժոմպլաթի, որուն հետ քննարկեց լիբանանեան եւ շրջանային իրադարձութիւնները:

Հանդիպումին ներկայ գտնուեցան նաեւ երեսփոխան Թայմուր Ժոմպլաթ եւ Լիբանանի մէջ Ֆրանսայի դեսպան Պրունօ Ֆուշէ:

Հանրապետութեան նախագահ զօր. Միշել Աուն երեկոյեան պատկերասփռուած հարցազրոյցի մը ընթացքին յայտնեց, որ համաժողովրդային շարժումը սկսաւ տնտեսական պահանջներով, որոնք ձեւափոխուեցան եւ վերածուեցան քաղաքական պահանջներու:

«Բնական է, որ երբ ժողովուրդին եւ կառավարութեան միջեւ վստահութիւնը կորսուած է, ապա ժողովուրդը պիտի պահանջէ կառավարութեան փոփոխութիւնը, որպէսզի նոր կազմուելիք կառավարութիւնը լսէ անոր պահանջները եւ գործադրէ զանոնք: Ես անսացի համաժողովրդային շարժումին, որուն պահանջները արդարացի են, եւ զայն խորհրդակցութեան հրաւիրեցի, սակայն պատասխան չստացայ», ըսաւ ան:

Նախագահ Աուն յայտնեց, որ Լիբանանի մէջ քաղաքական հակադրուած ընկերութիւն մը կայ, եւ կարելի չէ մթնոլորտը աւելի եւս բարդացնել, այլ պէտք է ստեղծել ներդաշնակ մթնոլորտ մը, որպէսզի կարելի ըլլայ գործադրել ժողովուրդին պահանջները գոհացնող ծրագիրը, ինչպէս նաեւ պայքարիլ փտածութեան դէմ:

«Նախագահութեան պաշտօնին հասայ միայն պետութիւն կառուցելու համար: Ցուցարարներուն երեք անգամ կոչ ուղղեցի հրապարակները միասնականացնելու եւ միասնաբար գործելու, որպէսզի բարեկարգումները գործադրուին, սակայն անոնք չօժանդակեցին ինծի: Գիտակցութիւնը ունիմ, սակայն ոչ իշխանութիւնը, որովհետեւ կաշկանդուած եմ իշխանութեան ու հասարակութեան միջեւ հակասութիւններով, եւ ժողովուրդին ըմբոստութեան շնորհիւ ստեղծուեցաւ բարեկարգումներ կատարելու կարելիութիւն մը», ըսաւ ան:

Նախագահ Աուն յայտնեց, որ «Բոլորը, այսինքն` բոլորը» կարգախօսը կը նշանակէ, որ երկրին մէջ պարկեշտ մարդ չկայ: «Ասիկա սխալ է, որովհետեւ Լիբանանի մէջ կան ատակ անձնաւորութիւններ, որոնք կրնան երկիրը փրկել», հաստատեց ան:

Հանրապետութեան նախագահը անհրաժեշտ նկատեց, որ կազմուի կառավարութիւն մը, որ փտածութեան դէմ պայքարելու եւ տնտեսական նախագիծը գործադրելու յանդգնութիւն ունենայ:

Վարչապետի նշանակման պարտադիր խորհրդակցութիւնները հինգշաբթի կամ ուրբաթ կատարելու մասին հարցումի մը պատասխանելով` նախագահ Աուն անիկա հաւանական նկատեց` աւելցնելով սակայն, որ անոնք կախեալ են խնդրոյ առարկաներուն պատասխաններէն, որովհետեւ կան բազմաթիւ դժուարութիւններ: «Եթէ առնչակից կողմերէն պատասխաններ չստանանք, ապա խորհրդակցութիւնները կրնան քանի մը օրով ուշանալ», յայտնեց ան:

Նախագահ Աուն ընդգծեց, որ ինք ճակատաբաց կրնայ ամբողջ աշխարհին ըսել, թէ լիբանանցիներէն բացի ոչ ոքի պարտական է: Ան աւելցուց, որ ինք նախագահութեան չէ հասած միջազգային աջակցութեան շնորհիւ` շեշտելով, որ իր անկախութիւնը իրեն հարցեր պատճառած է:

Դատական իշխանութեան համակարգին անդրադառնալով նախագահ` Աուն յայտնեց, որ այդ իշխանութեան մէջ փտածութեան գոյութեան հիմնական պատճառը քաղաքական միջամտութիւններն են, որոնք պէտք է վերջ գտնեն:

Յաջորդ կառավարութեան մէջ արտաքին գործոց նախարարի պաշտօնակատար Ժըպրան Պասիլը դարձեալ նախարար նշանակելու մասին հարցումի մը պատասխանելով` նախագահ Աուն ըսաւ. «Պասիլ ինք կ՛որոշէ նոր կառավարութեան մաս կազմել, թէ ոչ, եւ ոչ ոք կրնայ իրեն այդ մէկը կատարելը արգիլել», ըսաւ ան:

Անդրադառնալով մասնագէտներէ բաղկացած կառավարութեան մը կազմութեան` նախագահ Աուն յայտնեց, որ նման կառավարութիւն մը չի կրնար երկրին քաղաքականութիւնը վարել: «Կը փափաքիմ, որ կառավարութեան մաս կազմեն խորհրդարանին անդամ չեղող քաղաքագէտներ եւ մասնագէտներ», ըսաւ ան:

Ան նշեց, որ հրաժարեալ վարչապետ Սաատ Հարիրի տակաւին վարչապետի պաշտօնը ստանձնելու վերաբերեալ պատասխան չէ տուած:

Նախագահ Աուն լիբանանցիներուն ըսաւ. «Մի՛ փութաք դէպի դրամատուներ` ձեր պահ դրուած գումարները ստանալու համար, որովհետեւ անոնք ամբողջութեամբ երաշխաւորուած են»:

Ան նշեց, որ ինք իշխանութեան վրայ վախ չունի, այլ` Լիբանանին: Ան նաեւ յայտնեց, որ իրենք պատրաստ են սխալները սրբագրելու, սակայն համաժողովրդային շարժումը իր գործելաոճը պէտք է փոխէ, որովհետեւ այդ ձեւով ան երկիրը կը սպաննէ:

Ան կոչ ուղղեց լիբանանցիներուն փոփոխութեան ենթարկելու իրենց ժխտական վարուելակերպը, որովհետեւ ատիկա փոխադարձ ժխտական վարուելակերպ կը ստեղծէ եւ անխուսափելիօրէն կրնայ հասցնել լիբանանցիներու միջեւ բախումի:

Հարցազրոյցին մասին նախագահական պալատի տեղեկատուական գրասենեակը հրապարակեց հաղորդագրութիւն մը, որուն մէջ նշուեցաւ, թէ նախագահ Աունի խօսքը աղաւաղուած ձեւով կը տարածուի լրատուամիջոցներուն կողմէ:

Ըստ հաղորդագրութեան, աղաւաղուած տարբերակն է հետեւեալը. «Եթէ ցուցարարները ոչ մէկուն կը հաւնին, եւ իշխանութեան մէջ ոչ մէկը պարկեշտ է, թող արտագաղթեն»:

Հաղորդագրութեան համաձայն, ճիշդ տարբերակը կ՛ըսէ. «Եթէ ժողովրդային շարժումին մէջ չկան պարկեշտ անձնաւորութիւններ, որոնք երկխօսութեան կրնան մասնակցիլ, ապա անոնք թող արտագաղթեն, որովհետեւ այս ընթացքով պիտի չհասնին իշխանութեան»:

Նախագահ Աունի հարցազրոյցէն ետք ցուցարարները ցասումի պահեր ապրեցան եւ հրկիզուող անիւներով փակեցին Տահր Պայտարի կամուրջը, Ռինկի կամուրջը, Մարզական աւան տանող ճամբան, Պարժայի ճամբան, Նաամէի, Թրիփոլիի, Նահր Քալպի եւ Աքքարի մայրուղիները:

Աւելի ուշ փակուեցան նաեւ Ժալ էլ Տիպի, Զալքայի, Ժիպէյլի, Պըհսասի եւ Սայտայի մայրուղիները, Տորայի եւ Շեւրոլէի ճամբաները, ինչպէս նաեւ Քոլայի կամուրջը:

Սակայն ամէնէն ցնցիչը, որ աւելի եւս բռնկեցուց փողոցը, եղաւ Խալտէի միջադէպը, երբ ցուցարարներուն մէջ գտնուող Ընկերվար յառաջդիմական կուսակցութեան Շուէյֆաթի ընդհանուր քարտուղար Ալա Ապու Ֆախըր ծանրօրէն վիրաւորուեցաւ ու ապա մահացաւ:

Ընկերվար յառաջդիմական կուսակցութեան ղեկավար Ուալիտ Ժոմպլաթ իր զաւկին` երեսփոխան Թայմուր Ժոմպլաթի հետ շտապեց դէպքին վայրը ու ապա ուղղուեցաւ «Քամալ Ժոմպլաթ»-ի անուան հիւանդանոցը, ուր քանի մը վայրկեան ետք Ալա Ապու Ֆախըր մահացաւ:

Հանդարտեցնելու համար հիւանդանոցին մուտքին հաւաքուած մեծաթիւ երիտասարդները` Ժոմպլաթ շեշտեց, որ հակառակ այս գիշեր պատահածին` միակ հեղինակութիւնը պետութիւնն է, «որովհետեւ եթէ պետութեան նկատմամբ մեր յոյսը կորսնցնենք, ապա քաոսի մէջ կը մտնենք», յայտնեց ան:

Ժոմպլաթ յայտնեց, որ ինք հեռաձայնային հաղորդակցութիւն ունեցած է լիբանանեան բանակի հրամանատարին հետ, որ խոստացած է ցուցարարին սպանութեան մասին հետաքննութիւն բանալ:

Ժոմպլաթ իր խօսքը եզրափակեց հաստատելով, որ ինք պաշտօնապէս որոշած է մաս կազմել ժողովրդային շարժումին:

Բանակի հրամանատարութիւնը իսկոյն հրապարակեց հաղորդագրութիւն մը, որուն մէջ նշուեցաւ, որ երբ բանակի մը ինքնաշարժը Խալտէի շրջանէն կ՛անցնէր, զուգադիպեցաւ ճամբաները փակող ցուցարարներու գոյութիւնը:

«Այս պատճառով բանակին եւ ցուցարարներուն միջեւ արձանագրուեցան վարկաբեկիչ խօսքեր եւ հրմշտուք, որուն պատճառով բանակային մը կրակ բացաւ` ցրուելու համար ցուցարարները, եւ այդ պահուն ցուցարարներէն մէկը վիրաւորուեցաւ: Բանակը այս մասին հետաքննութիւն բացաւ եւ անմիջապէս ձերբակալեց կրակ բացող բանակայինը», նշուեցաւ հաղորդագրութեան մէջ:

Կրթութեան նախարար Աքրամ Շեհայէպ կէս գիշերին յայտարարեց, որ այսօր բոլոր դպրոցներն ու համալսարանները պէտք է մնան փակ:

Կէս գիշերէն ետք, Քոլայի կամուրջին վրայ բանակը փորձեց ճամբաները բանալ, երբ ցուցարարները քարկոծեցին բանակը:

Ցուցարարներուն եւ բանակին միջեւ բախումները հետզհետէ սաստկացան եւ տեւեցին մինչեւ առաւօտեան կանուխ ժամեր:

Հրաժարեալ վարչապետ Սաատ Հարիրիի տեղեկատուական գրասենեակը առաւօտեան ժամը 2:00-ին հրապարակեց հաղորդագրութիւն մը, որուն մէջ նշուեցաւ, որ Հարիրի ամբողջ գիշերը հետեւած է մայրաքաղաքին եւ արուարձաններուն մէջ արձանագրուող ժողովրդային շարժումի զարգացումներուն, եւ անոնց լոյսին տակ հեռաձայնային հաղորդակցութիւններ ունեցած է բանակի հրամանատար զօր. Ժոզեֆ Աունի եւ Ներքին ապահովութեան ուժերու ընդհանուր տնօրէն հազարապետ-զօրավար Իմատ Օսմանի հետ` ընդգծելով քաղաքացիներուն անվտանգութիւնը պաշտպանելու կարեւորութիւնը:

Հաղորդագրութեան մէջ նշուեցաւ, որ Հարիրի հեռաձայնային հաղորդակցութիւն մը ունեցած է Ուալիտ Ժոմպլաթի հետ եւ ցաւակցութիւն յայտնած Շուէյֆաթի քաղաքապետական խորհուրդի անդամ Ալա Ապու Ֆախըրի ողբերգական մահուան առիթով:

«Հարիրի դրուատեց Ժոմպլաթի պատասխանատու կեցուածքը եւ կոչ ուղղեց բոլոր շրջաններուն մէջ գտնուող ցուցարարներուն` պահպանելու իրենց բողոքի ցոյցին խաղաղ բնոյթը, որպէսզի պղտոր ջուրերուն մէջ որսացողներուն առիթ չտան չարաշահելու այդ ցոյցերը: Բոլորը պատասխանատու են երկրին պահպանումին եւ պէտք է համախմբուին` դիմագրաւելու համար մարտահրաւէրները», նշուեցաւ հաղորդագրութեան մէջ:

Միւս կողմէ, առաւօտեան նախագահ Աուն Պաապտայի մէջ ընդունեց Լիբանանի օժանդակ երկիրներու դեսպանները, որոնց ներկայացուց իր կեցուածքը` ներկայ իրադարձութիւններուն վերաբերեալ:

Հանդիպումին ներկայ գտնուեցան արտաքին գործոց նախարարի պաշտօնակատար Ժըպրան Պասիլ եւ հանրապետութեան նախագահութեան հարցերու պետական նախարարի պաշտօնակատար Սելիմ Ժրայսաթի:

Հանդիպումին ընթացքին նախագահ Աուն հաստատեց, որ մօտիկ ապագային Լիբանան պիտի ունենայ կառավարութիւն մը, որ պիտի իրագործէ պէտք եղած բարեկարգումները:

Նախագահ Աուն անդրադարձաւ համաժողովրդային շարժումի պահանջներուն ու անոնց մասին իր կեցուածքներուն եւ երեսփոխան եղած օրերէն խորհրդարանին ներկայացուցած իր օրինագիծերուն:

Լիբանանի օժանդակ երկիրներու դեսպանները իրենց երկիրներուն զօրակցութիւնը յայտնեցին Լիբանանին` ընդգծելով նոր կառավարութիւն մը կազմելու անհրաժեշտութիւնը:

Նախագահ Աուն ընդունեց նաեւ Լիբանանի մէջ արաբական երկիրներուն դեսպանները եւ անոնց հետ քննարկեց լիբանանեան իրադարձութիւններն ու զարգացումները` պահանջելով անոնց օժանդակութիւնը` լիբանանեան տնտեսութիւնը վերականգնելու առումով:

Նախագահ Աունի առած քայլերուն առընթեր, նախանցեալ գիշեր երրորդ հանդիպում մը տեղի ունեցաւ հրաժարեալ վարչապետ Սաատ Հարիրիի եւ արտաքին գործոց նախարարի պաշտօնակատար Ժըպրան Պասիլի միջեւ:

Հարիրիի Կեդրոնական Պէյրութի բնակարանէն մեկնելէ ետք, Պասիլ իսկոյն հանդիպում մը ունեցաւ Հըզպալլայի պատասխանատուներուն հետ:

Լիբանանի նոր կառավարութեան կազմութեան շրջագիծին մէջ Ռուսիոյ արտաքին գործոց նախարար Սերկէյ Լաւրով յայտնեց, որ Մոսկուա կը զօրակցի Սաատ Հարիրիի կողմէ նոր կառավարութիւն մը ձեւաւորելու ջանքերուն` աւելցնելով, որ մասնագէտներէ բաղկացած կառավարութիւն մը կազմելու կարելիութիւնը Լիբանանի համար իրապաշտ մօտեցում չէ:

Լիբանանի մէջ ՄԱԿ-ի ականաւոր պատասխանատու մը «Ռոյթըրզ» լրատու գործակալութեան յայտնեց, որ Լիբանան ամէնէն արագ ժամանակամիջոցին պէտք է նշանակէ իր յաջորդ վարչապետը, որպէսզի կարենայ կազմել պարկեշտ եւ ատակ անձնաւորութիւններէ բաղկացող նոր կառավարութիւն մը:

ՄԱԿ-ի պատասխանատուն կոչ ուղղեց Լիբանանի նոր կազմուելիք կառավարութեան որդեգրելու այնպիսի միջոցառումներ, որոնք լիբանանցիներուն մօտ կը վերահաստատեն լիբանանեան պետութեան նկատմամբ վստահութիւնը:

Ան նշեց, որ պարկեշտ կազմով նախարարաց խորհուրդ մը աւելի ատակ պիտի ըլլայ Լիբանանի համար օժանդակութիւններ խնդրելու:

«Լիբանանի տնտեսական ու ելեւմտական կացութիւնը խոցելի է եւ աւելի երկար կարելի չէ սպասել` կացութիւնը սրբագրելու համար», ըսաւ ան:

Նշենք, որ Եւրոպական Միութեան արտաքին գործոց նախարարները իրենց կարգին մաղթեցին, որ Լիբանանի մէջ ամէնէն արագ միջոցին կարելի ըլլայ նոր կառավարութիւն մը կազմել:

Ֆատի Ժեմայէլ Վտանգի Փողեր Կը Հնչեցնէ

Ճարտարարուեստի մարզի սեփականատէրերու ընկերակցութեան նախագահ Ֆատի Ժեմայէլ երէկ կէսօրին ընկերակցութեան կեդրոնին մէջ հրաւիրեց մամլոյ ասուլիսի մը, որուն ներկայ գտնուեցան նաեւ ընկերակցութեան փոխնախագահներ Զիատ Պաքտաշ եւ Ժորժ Նասրաուի, ընդհանուր քարտուղար Ամին Շըրրի, գանձապահ Նազարէթ Սապունճեան եւ դիւանի այլ անդամներ:

Մամլոյ ասուլիսին ընթացքին Ժեմայէլ հաստատեց, որ Լիբանան մօտեցած է վտանգի մեծագոյն օղակին` աւելցնելով, որ երկրին դիմագրաւած տագնապներուն լուծման մէջ արձանագրուելիք յապաղումը կրնայ երկիրը ամբողջական քանդումի առաջնորդել:

Ան կոչ ուղղեց քաղաքական բոլոր ուժերուն միասնականութեամբ վարուելու եւ ամէնէն արագ ժամանակամիջոցին կազմելու կառավարութիւն մը, որ փրկութեան կառավարութիւն մը ըլլայ եւ անհրաժեշտ բարեկարգումները կատարէ` երկիրը զետեղելով ապաքինման, բարգաւաճման եւ հաշուետուութեան ուղիին վրայ:

Իր խօսքը ուղղելով երիտասարդութեան` Ժեմայէլ յայտնեց, որ անոնք են Լիբանանի կարողութեան հիմնասիւներն ու երկրին ապագան:

Ան նշեց, որ իրենք իրենց յոյսը զետեղած են անկախ եւ պարկեշտ դատական իշխանութեան վրայ` կոչ ուղղելով դրամատուներուն բաւարար գումար յատկացնելու եւ ելեւմտական համապատասխան քաղաքականութիւնները որդեգրելու, այլապէս անհրաժեշտ առարկաներ շուկայի վրայ գոյութիւն պիտի չունենան:

Ան նշեց, որ Կեդրոնական դրամատան որդեգրած միջոցառումները չգործադրելու պարագային տասնեակ հազարաւոր ընտանիքներ լուրջ տագնապ պիտի դիմագրաւեն` աւելցնելով, որ ճարտարարուեստի մարզին պարագային մեծ թիւով գործարաններ կազմալուծուած են, երկրին տնտեսական կեանքը կը նահանջէ եւ վստահութիւնը օրըստօրէ կը վերանայ:

Վառելանիւթի Հարցը` Լուծման Ուղիին Վրայ

Պենզինի կայարաններու սեփականատէրերու համախմբումը երէկ առաւօտեան Ժիէի, Տորայի, Տըպպայէի, Ամշիթի եւ Թրիփոլիի մէջ փակեց վառելանիւթ յանձնող ընկերութիւններուն դռները` բողոքելով կայարաններուն ամերիկեան տոլարով վառելանիւթ յանձնելու քայլին դէմ եւ պահանջելով լիբանանեան դրամանիշով զայն ստանալ:

Սակայն յետմիջօրէին վառելանիւթ բաշխող ընկերութիւններու ներկայացուցիչ Ֆատի Ապու Շաքրա յայտնեց, որ այդ ընկերութիւնները սկսած են պենզինի կայարանները օժտել վառելանիւթով:

Օր մը առաջ «Քորալ» վառելանիւթի ընկերութեան ընդհանուր տնօրէն Օսքար Եամմին մամլոյ ասուլիսի մը ընթացքին յայտնեց, որ վառելանիւթի մարզի բոլոր ներկայացուցիչները հանդիպում մը ունեցած են ելեւմուտքի նախարարի պաշտօնակատար Ալի Հասան Խալիլի հետ եւ աւելի ուշ հանդիպում մը պիտի ունենան նաեւ հրաժարեալ վարչապետ Սաատ Հարիրիի հետ:

Եամմին շեշտեց, որ վառելանիւթի խնդիրին վերջնական լուծում պէտք է ապահովել: «Վառելանիւթի ընկերութիւնները, պենզինի կայարանները եւ նաւթ բաժնող ընկերութիւնները զիջումներ կը կատարեն, սակայն կարելի չէ սնանկացումի երթալ: Լիբանանեան պետութիւնը պէտք է անդրադառնայ այս իրականութեան եւ բոլորին տէր կանգնի», ըսաւ ան` աւելցնելով, որ սպառողներուն վրայ յաւելեալ ծախս չեն ուզեր պարտադրել:

Ան հարց տուաւ, թէ ինչպէ՞ս կարելի է վառելանիւթ յանձնել, եթէ կարելի չըլլայ դրամատուներէն գումարները ստանալ` անոնց փակ ըլլալուն պատճառով:

Եամմին մաղթեց, որ Հարիրիի հետ հանդիպումը վերջնական լուծում կարենայ ապահովել:

Թրիփոլիի Մէջ Զինեալ Միջադէպ Մը Կը Պատճառէ Զոհ Մը Եւ Վիրաւորներ

Նախանցեալ օր ուշ գիշերին, Թրիփոլիի Ապի Սամրա շրջանին մէջ արձանագրուեցաւ զինեալ բախում մը, որուն պատճառով սպաննուեցաւ Մուսթաքպալ հոսանքի Թրիփոլիի պատասխանատուներէն Զիատ Հասսունը, ինչպէս նաեւ վիրաւորուեցան ուրիշներ` դարձեալ Հասսուն ընտանիքէն:

Մուսթաքպալ հոսանքը հրապարակեց հաղորդագրութիւն մը` խստիւ դատապարտելով Թրիփոլիի մէջ արձանագրուած զինեալ միջադէպը:

Մուսթաքպալ կոչ ուղղեց ապահովական կառոյցներուն եւ դատական իշխանութիւններուն անմիջապէս բանալու հետաքննութիւն մը` բացայայտելու համար դէպքին դրդապատճառները եւ պատժելու համար յանցագործները:

Հաղորդագրութեան մէջ ցաւակցութիւն յայտնուեցաւ Հասսուն ընտանիքին` Զիատ Հասսունի կորուստին առիթով, ինչպէս նաեւ վիրաւորներուն համար կատարուեցան շուտափոյթ ապաքինման մաղթանքներ, եւ կոչ ուղղուեցաւ ինքնազսպումի ենթարկուելու ու վրէժխնդրութեան քայլերու չդիմելու:

Նշենք, որ օր մը առաջ արձանագրուած էին շարք մը կարեւոր իրադարձութիւններ, ինչպէս` Կեդրոնական դրամատան կառավարիչ Ռիատ Սալամէի մամլոյ ասուլիսը, Նահատակի օրուան առիթով Հըզպալլայի ընդհանուր քարտուղար սէյիտ Հասան Նասրալլայի արտասանած խօսքը, խորհրդարանի օրէնսդրական նիստի յետաձգումն ու դրամատուներն եւ դպրոցները փակ պահելու, ցուցարարներուն կողմէ ճամբաները փակելու վերաբերող հարցեր:

Պըրրի. «Օրէնսդրական Նիստը Խոչընդոտելու Քայլերուն Նպատակն Է Ներկայ Քաղաքական Բացը Շարունակել»

Խորհրդարանի նախագահ Նեպիհ Պըրրի, նախագահելէ ետք Ազատագրում եւ բարգաւաճում երեսփոխանական պլոքի նիստին, յայտարարեց, որ օրէնսդրական նիստը գումարելու դէմ հակադրուելու նպատակը ներկայ քաղաքական բացը շարունակելն է եւ ոչ թէ համաներումի կամ այլ օրինագիծերու դէմ ըլլալը:

«Քաղաքական այս ապակայուն իրավիճակը ամրապնդելու համար տարուած արշաւը ոչ ոքի շահերուն կը ծառայէ: Փտածութեան դէմ պայքարելու, ներկայ եւ նախկին իշխանութեան պետեր, նախարարներ եւ երեսփոխաններ դատավարութեան կանչելու, ելեւմտական ոճիրներու յատուկ ատեաններ հիմնելու, ծերութեան ապահովագրութեան օրինագիծերը վաւերացնելու համար գումարուելիք օրէնսդրական այս նիստը ժողովուրդին պահանջներուն անսալու ճիգ է, հետեւաբար զայն խոչընդոտողները կը փորձեն ժողովուրդին պահանջները առկախ պահել», ըսաւ ան:

Պըըրի նշեց, որ ժողովրդային շարժումին շնորհիւ է, որ այս օրինագիծերը պիտի վաւերացուին խորհրդարանին կողմէ` աւելցնելով, որ իր նախագահած պլոքի անդամ երեսփոխաններէն ու նախարարներէն (ներկայ եւ նախկին)  խնդրած է իրենց դրամատնային հաշիւներուն գաղտնիութիւնը վերացնել:

Ան ընդգծեց նաեւ միացեալ կառավարութիւն մը կազմելու անհրաժեշտութիւնը` կառավարութեան կազմին մէջ նկատի ունենալով նաեւ ժողովրդային շարժումի ներկայացուցիչը:

Պըրրի հաստատեց, որ պլոքը կառչած կը մնայ երկրին ապահովութեան եւ քաղաքացիական անվտանգութեան` աւելցնելով, որ այդ դիտանկիւնէն մեկնելով խորհրդարանի օրէնսդրական նիստը յետաձգած է երեքշաբթի, 19 նոյեմբեր 2019-ին:

Պըրրի ընդգծեց, որ ինք 1963-էն ի վեր քաղաքացիական պետութիւն եւ ամբողջ Լիբանանը մէկ ընտրաշրջանի վերածող ընտրական օրէնք մը կը պահանջէ` վերացնելու համար համայնքային դրութիւնը:

Պըրրի իր եւ իր կնոջ` Ռանտա Պըրրիի ներքին եւ արտաքին դրամատնային հաշիւներուն գաղտնիութիւնը վերացուց:

Պըրրի հարցազրոյցի մը ընթացքին յայտնեց, որ վարչապետի նշանակումին առումով ինք կառչած կը մնայ Սաատ Հարիրիի թեկնածութեան: «Մենք Հարիրիին թռչունի կաթ հրամցուցինք, եւ եթէ ան մերժէ վարչապետի պաշտօնը ստանձնել, ապա ընդմիշտ պիտի հակադրուիմ անոր հետ», ըսաւ Պըրրի:

Հրաժարեալ վարչապետ Սաատ Հարիրի երէկ Պըրրիի այս յայտարարութեան պատասխանեց հետեւեալ ձեւով. «Պըրրի մեծ եղբայր է եւ լայն սիրտ ունի, այն աստիճան, որ չի կրնար ընդմիշտ հակադրուիլ ինծի: Ես շնորհակալ եմ հրամցուած թռչունի կաթին համար, սակայն կաթնեղէն ճաշակելը կասեցուցած եմ: Իսկ երկրին իրավիճակը «քաղաքական սննդականոն»-ի կարիք ունի: Ինծի համար Պըրրիի բարեկամութիւնը, սէրն ու յարգանքը առաջնահերթութիւն են, եւ ոչինչ մեզի կրնայ թշնամանքի կացութեան մատնել»:

Ռիատ Սալամէ. «Մեր Գերագոյն Նպատակը Լիբանանեան Դրամանիշը Կայուն Պահելն Է. Այդ Կարողութիւնը Ունինք»

Երկրին տնտեսական եւ ելեւմտական իրավիճակին անդրադառնալով` Կեդրոնական դրամատան կառավարիչ Ռիատ Սալամէ մամլոյ ասուլիսի մը ընթացքին հաստատեց, որ Կեդրոնական դրամատան գերագոյն նպատակը լիբանանեան դրամանիշը կայուն պահելն է` աւելցնելով, որ իրենք այդ կարողութիւնը ունին:

Սալամէ հասատատեց նաեւ, որ Կեդրոնական դրամատունը կը պաշտպանէ լիբանանցիներուն պահ դրած գումարները եւ ոչ մէկ քայլի պիտի դիմէ այդ գումարները մասնատելու իմաստով: «Կեդրոնական դրամատունը նման բան կատարելու իրաւասութիւն իսկ չունի, որովհետեւ անոնք լիբանանցիներուն կը պատկանին: Կեդրոնական դրամատան կողմէ capital control-ի եւ haircut-ի ոչ մէկ միտում գոյութիւն ունի: Մեր որդեգրած գործիքակազմը կը միտի պաշտպանել պահ դրուած դրամ ունեցող քաղաքացին` առանց դրամատան վնաս հասցնելու», ըսաւ Սալամէ:

Ան նկատել տուաւ, որ Կեդրոնական դրամատան պահ դրուած գումարը` եուրոպոնտի եւ Կեդրոնական դրամատան ներդրումներով միասին, 38 միլիառ տոլար է, «իսկ ներկայիս Կեդրոնական դրամատան դրամական կարողութիւնը եւ անմիջական կերպով օգտագործելի գումարը 30 միլիառ տոլար է», հաստատեց ան:

Ան նշեց, որ Լիբանանի տնտեսութիւնը «տոլարացուած» է եւ այդ պատճառով ալ երբ տոլար չկայ` տնտեսութիւն չկայ:

Սալամէ յայտնեց, որ ելեւմտական ճարտարագիտութիւնը օժանդակած է, որ պահեստի հսկայ գումարներ ապահովուին` պաշտպանելու համար լիբանանեան դրամանիշին կայունութիւնը` աւելցնելով, որ այդ ճարտարագիտութիւնը կը նպաստէ նաեւ ընդունելի տոկոսներով տոլար ապահովելու:

«Լիբանան ներկայիս արտակարգ իրավիճակ մը կը դիմագրաւէ: Այս փուլին կը պահանջուի լիբանանեան դրամանիշին կայունութիւնը պահպանել», ըսաւ ան:

Սալամէ ընդգծեց, որ դրամատուները 20 առ հարիւրի տոկոսով կրնան տոլար փոխ առնել Կեդրոնական դրամատունէն, սակայն այդ գումարները կարելի չէ դուրս փոխանցել: «Դրամատուներէն պահանջած ենք, որ արտօնեն լիբանանցիին` իր պարտքերը լիբանանեան դրամանիշով վճարել, առանց անկէ պահանջելու, որ լումայափոխէն ամերիկեան տոլար ապահովէ», ընդգծեց Սալամէ:

Կեդրոնական դրամատան կառավարիչը նաեւ յայտնեց, որ Լիբանան այսօր պատմական փուլ մը կը դիմագրաւէ` մաղթելով, որ ան ուղղուի դէպի աւելի փայլուն ապագայ մը:

«Պետական ամավարկին մէջ նիւթական բաց պէտք չէ արձանագրուի, իսկ քաղաքացիները յաւելեալ տուրքեր չեն կրնար հանդուրժել», ըսաւ ան` յոյս յայտնելով, որ կը գործադրուին հիմնական բարեկարգումներ` բարելաւելու համար քաղաքացիներուն մատուցուած ծառայութիւնները, ինչպէս` ելեկտրականութեան եւ ջուրի մատակարարումը:

Ռիատ Սալամէ շեշտեց, որ ինք կը գործադրէ Լիբանանի եւ լիբանանցիներու շահերուն ծառայող քաղաքականութիւն մը` հաստատելով, որ Լիբանանի շահերը իրեն համար հիմք կը կազմեն: «Կեդրոնական դրամատունը կը փորձէ Լիբանանը պաշտպանել շրջանին դիմագրաւած դժուար պայմաններէն, որոնք Լիբանանի եւ Կեդրոնական դրամատան կարողութիւններէն վեր են», ըսաւ ան:

Դրամատուներու Միութիւնը Կ՛ողջունէ Սալամէի Մօտեցումները

Դրամատուներու միութիւնը նախանցեալ օր գումարեց արտակարգ նիստ մը, որուն ընթացքին ողջունեց Ռիատ Սալամէի մօտեցումները` հաստատելով, որ քաղաքական կայունութեան վերահաստատումը կ՛օժանդակէ երկրին ընդհանուր իրավիճակին բնականոնացման:

Դրամատուներու միութիւնը նշեց, որ Սալամէի ցուցմունքները դրական ազդեցութիւն պիտի ունենան դրամատուներու գործունէութեան վրայ` դրուատելով Կեդրոնական դրամատան կողմէ երկրին ելեւմտական կայունութիւնը պաշտպանելու յանձնառութիւնը:

Դրամատուներու միութիւնը բարձր գնահատեց Սալամէի կատարած այն յայտարարութիւնը, թէ Կեդրոնական դրամատան կողմէ capital control-ի եւ haircut-ի ոչ մէկ միտում գոյութիւն ունի, եւ շեշտեց ժողովուրդին կարիքները հոգալու դրամատուներուն յանձնառութիւնը:

Դրամատուներու Պաշտօնեաներու Համադաշնակցութիւնը Բաց Գործադուլ Յայտարարեց

Նախքան Սալամէի մամլոյ ասուլիսը, դրամատուներու պաշտօնեաներու համադաշնակցութիւնը յայտարարած էր, որ երեքշաբթի, 12 նոյեմբերէն սկսեալ բաց գործադուլի մը պիտի սկսի, մինչեւ որ երկրին մէջ կայունութիւնը վերահաստատուի:

Համադաշնակցութեան կողմէ գործադուլը գործադրուեցաւ եւ դրամատուները փակ պահեցին իրենց դռները:

Դրամատուներու պաշտօնեաներու համադաշնակցութիւնը երէկ յայտնեց, որ դրամատուներուն ելեկտրոնային դրամարկղները («Էյ. Թի. Էմ.» մեքենաները) դրամով պիտի օժտուին: «Գործադուլին նպատակը այն է, որ դրամատուներուն տնօրէնները այս դժուար կացութեան ընթացքին համապատասխան միջոցառումներու դիմեն: Դրամատուներու պաշտօնեաներուն նկատմամբ անցեալ շաբաթ ցուցաբերուած վարուելակերպը խիստ մերժելի է, որովհետեւ կարելի չէ ընդունիլ, որ պաշտօնեաներուն արժանապատուութիւնը ոտնակոխ ըլլայ», հաստատեց ան:

Դրամատուներու պաշտօնեաներու համադաշնակցութիւնը ընդգծեց նաեւ, որ գործադուլին ժխտական կէտերէն կը նկատուի այն, որ եթէ քաղաքացին դրամատան ծառայութիւններէն օգտուելու համապատասխան բացիկ չունի եւ ստանալիք չէք ունի` անելի կը մատնուի:

Դրամատուներու պաշտօնեաներու համադաշնակցութիւնը երէկ հաստատեց, որ իր յայտարարած բաց գործադուլը պիտի շարունակուի նաեւ այսօր:

Բջիջային հեռաձայնի ընկերութիւններուն` «Ալֆա»-ի եւ «Թաչ»-ի պաշտօնեաները երէկ եւս սկսան բաց գործադուլի մը, կասեցնելով քաղաքացիներուն մատուցուող բոլոր ծառայութիւնները:

Իսկ դպրոցները փակ պահելու կրթութեան եւ բարձրագոյն ուսման նախարար Աքրամ Շեհայէպի որոշումը գրեթէ չգործադրուեցաւ, որովհետեւ մեծ թիւով դպրոցներ բացին իրենց դռները` վերադառնալով սովորական դպրոցական դասաւանդութեան դրութեան:

Դատական Իշխանութիւններու Գերագոյն Խորհուրդը Կոչ Կ՛ուղղէ Վաւերացնելու Փտածութեան Դէմ Պայքարի Օրէնքը

Դատական իշխանութիւններու գերագոյն խորհուրդը նախանցեալ օր գումարեց արտակարգ նիստ մը, որուն ընթացքին կոչ ուղղեց խորհրդարանին վաւերացնելու փտածութեան դէմ պայքարի օրէնքը:

Խորհուրդը իր հրապարակած հաղորդագրութեան մէջ նկատել տուաւ, որ Լիբանան պատմական անկիւնադարձային փուլ մը կը դիմագրաւէ` աւելցնելով սակայն, որ կարելի է թեւակոխել նոր փուլ մը, որուն խորագիրն է օրէնքի եւ իրաւունքի պետութեան ամրապնդումը:

«Արդի պետութեան հիմնադրութիւնը  պէտք է իր քաղաքացիներուն եւ ժողովուրդին ձգտումներուն համահունչ ըլլայ: Իսկ արդի պետութիւնը կարելի չէ հիմնել առանց ազատ եւ պարկեշտ դատական իշխանութիւններու, որոնք անկախ կերպով եւ արդարօրէն կը գործեն` պաշտպանելով լիբանանցիներուն իրաւունքները», նշուեցաւ հաղորդագրութեան մէջ:

Սէյիտ Նասրալլա. «Միացեալ Նահանգներ Կ՛արգիլեն Լիբանանի Տնտեսական Ապաքինումը» 

Հըզպալլայի ընդհանուր քարտուղար սէյիտ Հասան Նասրալլա նախանցեալ օր Նահատակի օրուան առիթով արտասանեց պատկերասփռուած ճառ մը, որուն մէջ անդրադարձաւ այդ օրուան կարեւորութեան` ընդգծելով, որ Ահմետ Քասիրի կատարած անձնասպանական գործողութիւնը անկիւնադարձային եւ կարեւորագոյն գործողութիւն կը նկատուի` արաբեւիսրայէլեան տագնապի պատմութեան մէջ:

Սէյիտ Նասրալլա հակիրճ ակնարկով մը խօսեցաւ նաեւ շրջանային իրադարձութիւններուն մասին` հիմնականին մէջ ընդգծելով Եմէնի Դիմադրութեան զօրութիւնը եւ տոկունութիւնը, որ իր յատուկ կշիռը ունի, ինչպէս նաեւ անդրադարձաւ Իրանի յաղթանակին` հաստատելով, որ Իրանի նկատմամբ Միացեալ Նահանգներու նախագահ Տանըլտ Թրամփի ռազմավարութիւնը ձախողած է:

Ներքին լիբանանեան իրադարձութիւններուն մասին սէյիտ Նասրալլա շեշտեց պարկեշտ եւ անկախ դատական իշխանութիւններու կարեւորութիւնը, «որովհետեւ անոնք են, որ արդար դատավարութիւններով պիտի պայքարին փտածութեան դէմ ու պատժեն փտածները եւ երկիրը փրկեն այդ ախտէն` երկրին վերադարձնելով իւրացուած բոլոր գումարները», ըսաւ ան:

Սէյիտ Նասրալլա նշեց, որ փտածութեան դէմ պաքարը ժամանակի եւ հսկայական ճիգերու կը կարօտի: «Նահատակի օրուան առիթով, կոչ կ՛ուղղեմ Դատական իշխանութիւններու գերագոյն խորհուրդին Հըզպալլայի երեսփոխաններէն եւ նախարարներէն սկսելու փտածութեան դէմ պայքարը: Փտածը գործակալին համազօր է, ան ո՛չ կրօն ունի եւ ո՛չ ալ համայնք: Ձեզմէ կը պահանջուի քաջ եւ փրկարար քայլերու դիմել` առանց որեւէ ճնշումի ենթարկուելու», ըսաւ ան:

Ապա ան անդրադարձաւ ամերիկեան վարչակազմին կողմէ Լիբանանի տնտեսութեան վրայ պարտադրուած ճնշումներուն` հաստատելով, որ Միացեալ Նահանգներ կ՛արգիլեն Լիբանանի տնտեսական ապաքինումը:

Սէյիտ Նասրալլա շեշտեց, որ ամերիկեան վարչակազմը կը խոչընդոտէ չինական ընկերութիւններուն կողմէ Լիբանանի մէջ ներդրումներ կատարելու նախաձեռնութիւնները:

«Գոյութիւն ունին չինական կարեւոր ընկերութիւններ, որոնք միլիառաւոր տոլարներու ներդրումներ կ՛ուզեն կատարել Լիբանանի մէջ, սակայն Միացեալ Նահանգներ կ՛արգելակեն այդ քայլերը», ըսաւ ան` աւելցնելով նաեւ, որ նոյնը կը վերաբերի իրանեան պետական եւ սեփական ընկերութիւններուն, որոնք կը փափաքին Լիբանանի մէջ ներդրումներ կատարել, սակայն կը բախին ամերիկեան արգելքներուն:

Սէյիտ Նասրալլա յայտնեց նաեւ, որ ամերիկեան վարչակազմը չ՛արտօներ, որ լիբանանեան ընկերութիւնները իրենց դերակատարութիւնը ունենան Սուրիոյ վերակառուցման մէջ:

Ան կոչ ուղղեց երկրին երկրագործական եւ ճարտարարուեստի մարզերուն արդիւնաբերութիւնը արտածելու դէպի Իրաք` աւելցնելով, որ Լիբանանի կառավարութիւնը այս իմաստով պէտք է խորհրդակցի Սուրիոյ կառավարութեան հետ, որպէսզի լիբանանեան արտադրութիւնները կարելի ըլլայ դիւրաւ Իրաք փոխադրել` Պու Քամալ անցքով:

Սէյիտ Նասրալլա իր խօսքը եզրափակեց կոչ ուղղելով լիբանանցիներուն կառչած մնալու իրենց միասնականութեան եւ ոչ ոքի արտօնելու, որ զիրենք մղեն քաղաքացիական պատերազմի եւ ներլիբանանեան բախումներու:

«Մենք անձնատուր չենք ըլլար, այլ կը մնանք ճակատամարտի դաշտերուն վրայ, որպէսզի մեր դրօշը ամէնէն բարձր գագաթներուն վրայ ծածանեցնենք», շեշտեց ան:

Ժողովրդավարական Հանդիպում Պլոքը Կոչ Կ՛ուղղէ Կանխահաս Երեսփոխանական Ընտրութիւններու

Ժողովրդավարական հանդիպում երեսփոխանական պլոքը նախանցեալ օր գումարեց իր նիստը` նախագահութեամբ երեսփոխան Թայմուր Ժոմպլաթի:

Նիստին ընթացքին զարմանք յայտնուեցաւ, որ նախքան վարչապետի նշանակման խորհրդակցութիւններ կատարելը, կառավարութեան կազմութեան կողմնակի քննարկումներ տեղի կ՛ունենան:

Պլոքը անհրաժեշտ նկատեց հետեւիլ սահմանադրական կարգին` ընդգծելով նոր կառավարութեան անմիջական կազմութեան կարեւորութիւնը:

Պլոքը կոչ ուղղեց նաեւ կատարելու կանխահաս երեսփոխանական ընտրութիւններ` ձեւաւորելու համար քաղաքական նոր իշխանութիւն մը:

Ժահժահ. «Համաժողովրդային Շարժումը Իրական Է Եւ Զուտ Լիբանանեան»

Հզօր հանրապետութիւն երեսփոխանական պլոքը երկուշաբթի յետմիջօրէին գումարեց իր նիստը` նախագահութեամբ Լիբանանեան ուժեր կուսակցութեան ղեկավար Սամիր Ժահժահի:

Ժահժահ ընդգծեց, որ համաժողովրդային շարժումը իրական է ու զուտ լիբանանեան, իսկ պահանջուածը փորձագէտներու եւ կուսակցութիւններէ անկախ անձնաւորութիւններու կառավարութիւն մըն է:

LEAVE A REPLY

Please enter your comment!
Please enter your name here