Երեսփոխան Նորա Արիսեանի Մասնակցութեամբ Սուրիոյ Սահմանադրութիւնը Քննարկող Ընդլայնուած Յանձնախումբը Կ՛աւարտէ Առաջին Փուլը

0
317

Ժընեւի` ՄԱԿ-ի կեդրոնական գրասենեակի շէնքին մէջ 29-31 հոկտեմբերին տեղի ունեցաւ Սուրիոյ սահմանադրութիւնը քննարկող ընդլայնուած յանձնախումբին բացման նիստն ու քննարկումներու յաջորդական նիստերը:

Յանձնախումբը կը բաղկանայ 150 անդամներէ` բաժնուած այսպէս. 50 անդամ` սուրիական պետութեան աջակցութիւնը վայելող պատուիրակութիւնը, 50` ընդդիմութեան պատուիրակութիւնը եւ 50` քաղաքացիական հասարակութեան պատուիրակութիւնը:

Նշենք, որ սուրիական պետութեան աջակցութիւնը վայելող պատուիրակութեան մաս կը կազմէր Սուրիոյ խորհրդարանի երեսփոխան, պատմաբան դոկտ. Նորա Արիսեանը:

Լրատուամիջոցներէն հեռու ընթացող նիստերուն ներկայ գտնուեցաւ Սուրիոյ հարցով ՄԱԿ-ի յատուկ բանագնաց Կիր Փեթերսընը, իսկ նիստերը համանախագահեցին Ահմատ Քըզպարին եւ Հատի Ալպահրան:

Բացման խօսքով հանդէս եկաւ Քըզպարին` հաստատելով մերժումը սահմանադրութիւնը քննարկող յանձնախումբին գործերուն որեւէ արտաքին միջամտութեան:

Փեթերսըն իր խօսքին մէջ սոյն յանձնաժողովի աշխատանքներուն սկիզբը դէպի մշտական քաղաքական լուծում կարեւոր քայլ համարեց` շեշտելով որ սահմանադրութիւնը միայն սուրիացի ժողովուրդին սեփականութիւնն է:

Յատկանշական էր, որ նիստերուն ընթացքին մշակուեցաւ եւ ընդունուեցաւ «Վարքի օրէնսգրքի եւ ընթացակարգերու ատենագրութիւն», որ պիտի սահմանէ ընդլայնուած եւ փոքրացուած յանձնախումբերու աշխատանքը:

Նիստերու ընթացքին ներկաները արտայայտուեցան սահմանադրութեան շուրջ իրենց տեսակէտի մասին, հնչեցին տեսակէտներ, որոնք կը պնդեն յաջորդ նիստը Դամասկոսի մէջ գումարելու մասին, իսկ սուրիական պետութեան աջակցութիւնը վայելող պատուիրակութեան անդամները հաստատեցին, որ յանձնախումբին աշխատանքը կը կեդրոնանայ սահմանադրական բարեփոխումները քննարկելու վրայ, որ կրնայ ընդգրկել նաեւ գործող սահմանադրութեան որոշ յօդուածներու փոփոխութիւններ եւ միեւնոյն ժամանակ բաց է նոր սահմանադրութեան նախագիծի մշակման համար, պայմանաւ որ ան լրացնէ սուրիական պետութեան բոլոր նպատակները եւ պահպանէ ազգային սկզբունքներն ու ստանայ սուրիացի ժողովուրդի համաձայնութիւնը:

Իսկ նոյեմբեր 4-8 կայացաւ ընդլայնուած յանձնաժողովին ճշդած փոքրացուած յանձնախումբին աշխատանքը:

Ան կը բաղկանայ 45 անդամներէ, բաժնուած` 15 պատուիրակութիւններու:

Քննարկուեցան բազմաթիւ կէտեր, մասնաւորաբար` ահաբեկչութեան դէմ պայքարի մասին պարբերութիւն մը աւելցնելու կարեւորութիւնը, ինչպէս նաեւ` սուրիական պետութեան աջակցութիւնը վայելող պատուիրակութիւնը առաջարկ-փաստաթուղթ ներկայացուց դատապարտելու բոլոր ահաբեկչական գործողութիւնները, որոնք իրականացուեցան Սուրիոյ մէջ ահաբեկչական խմբաւորումներու կողմէ, որպէսզի կարելի ըլլայ յառաջխաղացում արձանագրել քննարկումներուն ընթացքին, սակայն ընդդիմութեան պատուիրակութիւնը մերժեց զայն:

Նշենք, որ յանձնախումբը փաստաթուղթին մէջ հաստատած է Սուրիոյ ամբողջ տարածքին պետութեան վերահսկողութիւնը վերականգնելու կարեւորութիւնը:

Փոքրացուած յանձնախումբին նիստերը պիտի շարունակուին 25 նոյեմբերին:

LEAVE A REPLY

Please enter your comment!
Please enter your name here