Պապը Կ՛անդրադառնայ Գամիշլիի Հայ Կաթողիկէ Ժողովրդապետին Սպանութեան

0
466

ՀԱԼԷՊ, ԵՐԵՒԱՆ, «Գանձասար», «Արմէնփրէս».- Սուրիոյ հայ երեք համայնքապետները՝ Բերիոյ Հայոց թեմի առաջնորդ Մասիս եպս. Զօպուեան, Բերիոյ թեմի կաթողիկէ Հայոց առաջնորդ Պետրոս արք. Միրիաթեան եւ Սուրիոյ Հայ աւետարանական համայնքի համայնքապետ վեր. Յարութիւն Սելիմեան խստօրէն դատապարտեցին զինեալ ահաբեկիչներու կողմէ Գամիշլիի Հայ կաթողիկէ ժողովրդապետ Յովսէփ քհնյ. Պետոյեանի եւ անոր հօր դաւադրական սպանութիւնը, որ կատարուեցաւ Երկուշաբթի, 11 Նոյեմբերին, Տէր Զօրի Ալ Զար գիւղին մէջ:

«Ահաբեկչական խմբաւորումներու գործունէութիւնը կը վերաշխուժանայ Սուրիոյ հիւսիս-արեւելեան շրջաններուն մէջ՝ թրքական ներխուժումներուն հետ զուգահեռաբար: Ահաբեկչական այս արարքը կը հակասէ մարդկային եւ կրօնական բոլոր սկզբունքներուն ու թիրախ կը դարձնէ սուրիական ընկերութիւնը՝ սպառնալով երկրի խաղաղութեան եւ բնակչութեան ապահովութեան», կը նշուի առաջնորդներուն հրապարակած միացեալ յայտարարութեան մէջ:

Նշենք, որ ահաբեկիչ զինեալները կրակ բացած էին տէր հօր ինքնաշարժին վրայ եւ տեղն ու տեղը սպաննած էին զինք։ Ինքնաշարժին մէջ կը գտնուէր նաեւ տէր հօր հայրը՝ Աբրահամ Պետոյեան, որ վիրաւորուելով՝ աւելի ուշ նոյնպէս կնքեց իր մահկանացուն։

Աւելի ուշ, «Իսլամական պետութիւն» ահաբեկչական կազմակերպութիւնը ստանձնեց ոճիրին պատասխանատուութիւնը։

Յովսէփ քհնյ. Պետոյեանի եւ անոր հօր վերջին հրաժեշտի արարողութիւնը տեղի ունեցաւ 12 Նոյեմբերին, Գամիշլիի Հայ կաթողիկէ համայնքի Սուրբ Յովսէփ առաջնորդանիստ եկեղեցւոյ մէջ, կը յայտնէ «Արեւելք» կայքը:

Ֆրանսիս պապը 12 Նոյեմբերին իր զօրակցութիւնը յայտնեց Գամիշլիի Հայ կաթողիկէ համայնքին՝ Յովսէփ քհնյ. Պետոյեանի եւ անոր հօր սպանութեան գծով:

«Ես, Սուրիոյ Գամիշլի քաղաքի հայ կաթողիկէներուն կողքին եմ, երբ անոնք յուղարկաւորութիւնը կը կատարեն իրենց հովուապետին՝ հայր Յովսէփ Պետոյեանին, որ սպաննուեցաւ երէկ, իր հօր հետ: Ես կ՛աղօթեմ անոնց, անոնց ընտանիքներուն եւ Սուրիոյ բոլոր քրիստոնեաներուն համար», կը գրէ Ֆրանսիս պապը զօրակցական իր նամակին մէջ:

LEAVE A REPLY

Please enter your comment!
Please enter your name here