ՄԱՄԼՈՅ ՀԱՂՈՐԴԱԳՐՈՒԹԻՒՆ. Վենետիկի Ս. Ղազարը Ողողուեցաւ

0
1131

Երեքշաբթի, 12 Նոյեմբեր 2019-ի երեկոյեան ժամը 9-էն սկսեալ, մակընթացութեան նախատեսուած բարձրագոյն մակարդակը 40 սմ. գերազանցելով՝ հարաւային ուժգին քամիին պատճառով Վենետիկի լճակի մակարդակը հասաւ 180 սմ.ի:

Այսպիսի իրավիճակ տեղի չէր ունեցած 1966-էն ի վեր: Վենետիկի Ճուտեքքա շրջանի հարաւային քարափները ուժգին ալիքներու հարուածին տակ քանդուեցան, նաւեր խորտակուեցան, եւ աւանդական կոնտոլաները Ս. Մարկոսի հրապարակը հասան, ու քաղաքը ամբողջ ջուրով ողողուեցաւ:

Ս. Ղազար կղզին ալ զերծ չմնաց բնութեան այս աղէտէն: Գետնայայրկի բոլոր սենեակները ողողուեցան լճակի տղմուտ ջուրով, քառանկիւնի խոտածածկը ջուրի տակ սուզուեցաւ: Սեղանատունը եւս խուժեցին ջուրերու յորձանքները եւ դժբախտաբար եկեղեցին անգամ լեցուեցաւ կէս մեթր ջուրով, որ հասաւ դասը եւ աւանդատունը՝ վնասելով որոշ եկեղեցական զգեստներ, ձեռագործ զարդարանքներ եւ գորքեր:

Միայն վաղ առաւօտեան անդրադարձանք, որ ամեհի ալիքներու հարուածներուն տակ, ամբողջ հարաւային կողմը եզերող պարսպապատը քանդուած էր:

Այս տխուր համայնապատկերը հասաւ իր գագաթնակէտին վանքին ծովախորշին կայանած «Արմէնիա» առագաստանաւին պատճառած վնասները տեսնելով. առագաստանաւը ալիքներէն քշուած, ցռուկով քանդած էր պարիսպէն հատուած մը մինչեւ լայնքով բարձրանալով քարափը, փլելով ետեւի պարիսպը:

Մեր բոլոր հայրենակիցներուն եւ բարեկամներուն կ՛ուզենք ապահովցնել, որ վանքին մատենադարանը, պատկերասրահը, ձեռագրատունը եւ դիւանը անվնաս մնացին Ամենասուրբ Կոյսին մայրախնամ հովանիին ներքոյ:

LEAVE A REPLY

Please enter your comment!
Please enter your name here