Կառավարութեան Կազմութեան Ճիգերը Ընթացքի Մէջ Են, Սակայն Ցարդ` Ապարդիւն

0
329

Երկրին մէջ տիրող կացութիւնը երէկ ստացաւ սառած իրավիճակ մը, որուն պատճառով աւելի եւս շեշտուեցաւ տիրող անորոշութիւնը:

Ժողովրդային շարժումը սկսելէն 35 օր ետք, երէկ փողոցը բաւական հանդարտ էր` ցոյցերու եւ ցուցարարներու առումով:

Նշենք, որ երէկ առաւօտեան ազատ արձակուեցան գիշեր մը առաջ Ռիատ Սոլհի հրապարակին մէջ ձերբակալուած երիտասարդները, որոնք Հըլու ոստիկանատան մէջ արգելափակուած էին:

Բողոքի միակ շարժումը, որ արձանագրուեցաւ երէկ Սայտայի մէջ էր, երբ ցուցարարներ իջան փողոց եւ փակեցին կարգ մը լումայափոխներու վաճառատուները, իսկ Սայտայի դպրոցները յաճախող աշակերտներ բողոքի նստացոյցեր կատարեցին Ելեկտրականութեան ընկերութեան եւ «Օժերօ»-ի դիմաց:

Կառավարութեան կազմութեան առումով Ամալ շարժումն ու Հըզպալլան կառչած մնացին հրաժարեալ վարչապետ Սաատ Հարիրին վերստին վարչապետ նշանակելու կարելիութեան, ինչպէս նաեւ շարունակեցին զայն համոզել կազմելու մասնագէտներէ եւ քաղաքական անձնաւորութիւններէ բաղկացող կառավարութիւն մը:

Երեկոյեան շուրջ ժամը 7:00-ին (Պէյրութի ժամանակացոյցով), ՄԱԿ-ը կոչ ուղղեց Լիբանանին ամէնէն արագ ժամանակամիջոցին կազմելու կառավարութիւն մը, որ կ՛ընդառաջէ ցուցարարներու ձգտումներուն, ինչպէս նաեւ կոչ ուղղեց Լիբանանի ապահովութեան ուժերուն` պաշտպանելու խաղաղ ցուցարարները:

Նշենք, որ յետմիջօրէին ՄԱԿ-ի ընդհանուր քարտուղարի տեղակալ Ճեֆրի Ֆելթման կատարեց յայտարարութիւն մը, որուն մէջ ան շեշտեց, որ ռուսերը կը փափաքին Միջերկրական ծովը իրենց հակակշիռին տակ առնել:

Ֆելթման նշեց, որ իրենց կատարած կարեւորագոյն աշխատանքներէն մէկը այն է, որ իրենք կը նսեմացնեն Հըզպալլայի այն պատճառաբանութիւնը, թէ ինք առանձինն կարողութիւնը ունի պաշտպանելու Լիբանանը` բանակին օժանդակութեամբ:

«Հըզպալլա այս պատճառաբանութեամբ պէտք չէ հպարտանայ, որովհետեւ անոր հրթիռները Լիբանանը պաշտպանելու փոխարէն զայն պատերազմի վտանգին դիմաց կը զետեղեն», յայտնեց Ֆելթման:

Դատախազ Ալի Իպրահիմ Ամբաստանագիրներ Հրապարակեց Հաղորդակցութեան Միջոցներու Նախկին Նախարարներու Դէմ

Ելեւմտական հարցերու ընդհանուր դատախազ Ալի Իպրահիմ երէկ երեկոյեան հաղորդակցութեան միջոցներու նախկին նախարարներ Նիքոլա Սահնաուիի, Պութրոս Հարպի եւ Ժամալ Ժարրահի դէմ ամբաստանագիրներ հրապարակեց եւ զանոնք փոխանցեց Իշխանութեան պետերու եւ նախարարներու դատավարութեան գերագոյն խորհուրդին:

Դատախազ Իպրահիմ «Ալֆա»-ի, «Թաչ»-ի տնօրէնները, ինչպէս նաեւ «Օժերօ»-ի ընդհանուր տնօրէնութիւնը ամբաստանեց մսխումի, հանրութեան գումարները իւրացնելու եւ ապօրինի կերպով հարստանալու յանցանքով:

Միւս կողմէ, ան լսեց  նախկին վարչապետ Ֆուատ Սինիորայի թղթածրարին հարցով ելեւմուտքի նախարարութեան ընդհանուր տնօրէնին վկայութիւնը:

Իբրեւ առաջին հակազդեցութիւն, Ժամալ Ժարրահ շեշտեց, որ դատախազ Իպրահիմ օրինական կարգերը շրջանցած է զիրենք ամբաստանելով` աւելցնելով, որ ան պէտք է իրենց թղթածրարները փոխանցէր խորհրդարան եւ ստանար անոր երկու երրորդին հաւանութիւնը, ապա ամբաստանագիր հրապարակէր:

Ժարրահ յայտնեց, որ ասիկա քաղաքական ուժի մը դէմ սկսած ծրագրուած արշաւ մըն է:

Պութրոս Հարպ յայտնեց, որ ինք դատական իշխանութիւններուն տրամադրութեան տակ կը գտնուի` կոչ ուղղելով, որ իր դատավարութիւնը ուղղակի սփռուի, որպէսզի թափանցիկութիւնը ըլլայ ամբողջական, եւ բոլոր փտածները հաշուետուութեան կանչուին:

Նիքոլա Սահնաուի յայտնեց, որ ինք տակաւին պաշտօնապէս չէ տեղեկացուած իր դէմ կատարուած ամբաստանութեան մասին` ընդգծելով, որ ինք դատական իշխանութիւններուն տրամադրութեան տակ է եւ դատական իշխանութիւնները իրենց դերակատարութիւնը ունենալու հրաւիրող ռահվիրաներէն մէկը:

Սահնաուի հաստատեց, որ ինք խիղճը հանգիստ կը քնանայ, որովհետեւ հանրային գործիչ դարձած է միայն օգտակար դառնալու համար եւ ոչ թէ օգտուելու:

Պըրրի Նախագահեց Չորեքշաբթի Օրուան Խորհրդարանական Նիստին

Խորհրդարանի նախագահ Նեպիհ Պըրրի երէկ Այն Թինէի մէջ նախագահեց չորեքշաբթի օրուան երեսփոխանական հանդիպումին, որուն ընթացքին յայտնեց, որ նախանցեալ օր մեծագոյն պարտուողը սադրանքն էր, իսկ մեծագոյն յաղթականը` Լիբանանն ու անոր քաղաքացիական անվտանգութիւնը: Ան նշեց, որ գրաւը դրուած էր անիշխանութեան մատնելու Լիբանանը, բան մը, որմէ միշտ զգուշացուցած ենք:

«Անկախ պատահածէն, մեզի համար ամէնէն կարեւորը այն է, որ արեան ոչ մէկ կաթիլ թափած է, որովհետեւ մութ սենեակներու մէջ ծրագրուածը արիւն թափելն է, իսկ մեր առաջնահերթութիւնը Լիբանանն է եւ անոր քաղաքացիական անվտանգութիւնը», հաստատեց Պըրրի:

Ան հաստատեց խորհրդարանական յանձնախումբերուն ընդմէջէն օրէնսդրական աշխատանքը աշխուժացնելու կարեւորութիւնը:

Պըրրի ընդգծեց, որ պէտք է աշխուժացնել ելեւմտական եւ պետական ամավարկի երեսփոխանական յանձնախումբին աշխատանքը, յատկապէս 2020-ի պետական ամավարկը վաւերացնելու առումով:

Պըրրի շեշտեց, որ խորհրդարանը համազօր է իր զաւակները պաշտպանող մօր:

Ապա Պըրրի ընդունեց խորհրդարանի փոխնախագահ Էլի Ֆըրզլին, որ հանդիպումէն ետք յայտնեց, թէ վարչապետի պաշտօնին համար Սաատ Հարիրիի անուան կառչած մնալ կը նշանակէ Լիբանանը բաղկացնող քաղաքական բաղադրիչներուն հաւատարիմ մնալ եւ յարգել զանոնք:

Ֆըրզլի նշեց, որ ասիկա քաղաքական եւ տնտեսական կայունութիւնը երաշխաւորելու մուտք մըն է:

Ֆըրզլի շեշտեց, որ խորհրդարանը կ՛որդեգրէ ժողովրդային շարժումին արդարացի պահանջները` աւելցնելով, որ նախանցեալ օրուան խորհրդարանի նիստին մասնակցող եւ չմասնակցող երեսփոխաններուն ձգտումն է այս:

Պըրրիի այցելուներէն եղաւ նաեւ Հաւատարմութիւն դիմադրութեան պլոքի երեսփոխան Ալի Ամմար, որ հաստատեց, որ խորհրդարանի մուտքին զինուորականներ եւ բանակայիններ իրենց անցարգելներուն վրայ կանգնած եւ դիտած են ժողովուրդի ներկայացուցիչներուն վարկաբեկումը` առանց քայլի մը իսկ դիմելու:

«Հակառակ բանակի հրամանատար զօր. Ժոզեֆ Աունի կատարած այն խոստումներուն, թէ բանակը ցուցարարներուն կողքին յանձնառու է պաշտպանելու նաեւ երթեւեկի իրաւունքը, իրականութիւնը այդպէս դուրս չեկաւ», ըսաւ Ամմար:

Հանրապետութեան Նախագահը Այսօր Կ՛ուղղէ Անկախութեան Պատգամը

Միւս կողմէ, հանրապետութեան նախագահութեան աղբիւրները ոչինչ յայտնեցին վարչապետի նշանակման պարտադիր խորհրդակցութիւնները սկսելու մասին, իսկ հանրապետութեան նախագահ զօր. Միշել Աուն հանդիպում մը ունեցաւ ուժանիւթի եւ ջուրի հարցերու նախարարի պաշտօնակատար Նատա Պուսթանիի հետ:

Հանդիպումին ընթացքին քննարկուեցան նաւթի եւ բնական կազի հորերը պեղելու աշխատանքի հոլովոյթին վերաբերող հարցեր:

Նախագահական պալատին մօտիկ աղբիւրներ հաստատեցին, որ կառավարութեան կազմութեան առումով ուղղուածութիւնը կ՛երթայ կազմելու մասնագէտներէ եւ քաղաքական անձնաւորութիւններէ բաղկացող կառավարութիւն մը:

Լիբանանի անկախութեան 76-ամեակին, ինչպէս նաեւ Լիբանանի ներկայ իրադարձութիւններուն առիթով, այսօր երեկոյեան ժամը 8:00-ին նախագահ Աուն պիտի ուղղէ պատկերափռուած պատգամ մը:

Նշենք, որ նախագահ Աուն հեռաձայնային հաղորդակցութիւն մը ունեցաւ Պէյրութի Իրաւաբաններու սենտիքայի նորընտիր նախագահ Մըլհեմ Խալաֆի հետ եւ շնորհաւորեց զինք` իր ստանձնած նոր պատասխանատուութեան առիթով:

Մուսթաքպալ Պլոքը Կառչած Կը Մնայ Մասնագէտներու Կառավարութեան Կազմութեան

Հրաժարեալ վարչապետ Սաատ Հարիրի երէկ նախագահեց Մուսթաքպալ պլոքի արտակարգ նիստին, որուն ներկայ գտնուեցաւ նաեւ պլոքի նախագահ, երեսփոխան Պահիա Հարիրի:

Նիստին ընթացքին քննարկուեցան լիբանանեան իրադարձութիւնները, յատկապէս քաղաքական բեմը յուզող հարցերը:

Նիստէն ետք երեսփոխաններ յայտնեցին, որ Հարիրի կառչած կը մնայ մասնագէտներու կառավարութեան կազմութեան` լուծում գտնելու համար տիրող տագնապին, որ տնտեսական է ու ելեւմտական:

Նոյն աղբիւրները նշեցին, որ ներկայ կառավարութիւնը մասնագէտներու ու քաղաքական անձնաւորութիւններու կառավարութիւն մըն է եւ փաստած է իր ձախողութիւնը:

Անոնք յայտնեցին նաեւ, որ կառավարութեան կազմութեան առումով Հարիրիի հետ Հըզպալլայի, Ամալ շարժումի եւ Ազգային ազատ հոսանք կուսակցութեան հաղորդակցութիւնները վերահաստատուած են` մաղթելով, որ անոնք կրնան լուծում ապահովել երկրին դիմագրաւած կառավարական տագնապին:

Հարիրի մօտիկ աղբիւրներ հաստատեցին, որ կառավարութեան կազմութեան առումով անոր հետ ուղղակի եւ անուղղակի հաղորդակցութիւններ կան, սակայն ցարդ այդ իմաստով ոչ մէկ զարգացում արձանագրուած է:

Աւելցնենք, որ արաբատառ «Ինտիփենտընթ» թերթը երէկուան իր թիւով հրապարակեց լուր մը, որուն մէջ նշուեցաւ, որ Սաատ Հարիրի կը մտածէ արմատական լուծումներու մասին, ինչպէս` այս փուլին ընթացքին քաղաքական ասպարէզէն հեռանալու եւ Մուսթաքպալ հոսանքին ներքին կազմակերպական կեանքը բարելաւելու:

Ազգային Ազատ Հոսանքը Մերժեց Համաներումի Բոլոր Օրինագիծերը

Ազգային ազատ հոսանք կուսակցութեան քաղաքական խորհուրդը հրապարակեց հաղորդագրութիւն մը, որուն մէջ հաստատեց, թէ ինք կը մերժէ համաներումի օրինագիծի ամէն տեսակ տարբերակ:

«Կը պահանջենք դատական իշխանութեան անկախ գործունէութիւնը եւ կը զօրակցինք անոր` գործելու իբրեւ անկախ իշխանութիւն եւ հաշուետուութեան կանչելու փտածները», յայտնեց ան:

Հաղորդագրութեան մէջ ընդգծուեցաւ, որ Ազգային ազատ հոսանք կուսակցութիւնը կառչած կը մնայ սահմանադրական հաստատութիւններուն օրինականութեան` բարեկարգումի եւ տնտեսական բարգաւաճումի իբրեւ միակ միջոց:

«Ազգային ազատ հոսանք կուսակցութիւնը յանձնառու կը մնայ բարեկարգումի ուղիին եւ ըմբոստացած լիբանանցիներէն զօրակցութիւն կը խնդրէ` վաւերացնելու համար փտածութեան դէմ պայքարի մասին խորհրդարանին առաջարկուած օրինագիծերը», նշուեցաւ հաղորդագրութեան մէջ:

Ազգային ազատ հոսանք կուսակցութիւնը զգուշացուց երկրին սահմանադրական հաստատութիւնները անդամալուծելէ` աւելցնելով, որ անիկա երկրին քաղաքական ապակայունութեան միակ միջոցն է, ինչպէս նաեւ այն քաոսը, որ մտահոգիչ է եւ երկիրն ու անոր տնտեսութիւնը կրնայ քանդել:

Քաղաքական Անձնաւորութիւններ Կը Հակազդեն Տիրող Կացութեան

Իշխանութեան պետերուն կողքին, քաղաքական անձնաւորութիւններ եւս արձանագրեցին շարք մը կեցուածքներ, որոնք ընդգծեցին կառավարութիւն մը կազմելու անհրաժեշտութիւնը:

Լիբանանեան ժողովրդավարական կուսակցութեան նախագահ, երեսփոխան Թալալ Արսլան յայտնեց, որ քաղաքական բոլոր ուժերէն կը պահանջուի զիջումներ կատարել եւ համեստ ըլլալ` միայն Լիբանանի շահերը ապահովելու համար:

Արսլան յայտնեց, որ Լիբանան իր արդի պատմութեան ընթացքին կը գտնուի քաղաքական, տնտեսական եւ ելեւմտական ամէնէն վատ կացութեան մէջ` աւելցնելով, որ Լիբանանի դէմ շրջանային եւ միջազգային արշաւ կը մղուի:

Արսլան կոչ ուղղեց ամէնէն արագ ժամանակամիջոցին կազմելու կառավարութիւն մը, որպէսզի Լիբանանը կարելի ըլլայ պաշտպանել:

Ընկերվար յառաջդիմական կուսակցութեան ղեկավար Ուալիտ Ժոմպլաթ շեշտեց, որ երկրին իշխանութիւնը եւ Թաէֆի համաձայնագիրը վերջ գտած են` աւելցնելով, որ ինք Սաատ Հարիրիին խորհուրդ տուած է յաջորդ կառավարութեան մաս չկազմել:

Հզօր Լիբանան համախմբումի երեսփոխան Էտկար Թրապուլսի զգուշացուց լիբանանցիները` հաստատելով, որ շահերու եւ վնասներու հաշիւներուն հետեւանքները լիբանանցի ժողովուրդին վրայ կ՛ազդեն եւ ոչ թէ իշխանութեան:

Հզօր հանրապետութիւն պլոքի երեսփոխան Էտի Ապի Լամաա ընդգծեց, որ մասնագէտներու կառավարութիւնը ամէնէն աւելի կրնայ աշխատիլ, եթէ արտօնեն անոր, որ կողմնակցութենէ հեռու մնալով աշխատի:

Հաւատարմութիւն դիմադրութեան պլոքի երեսփոխան Հասան Ֆատլալլա յայտնեց, որ կառավարութեան հրաժարականը խանգարած է կառավարութեան բարեկարգումի փաստաթուղթին գործադրութիւնը:

Հզօր Լիբանան պլոքի երեսփոխան Շամել Ռուքոզ կոչ ուղղեց թակարդուած կառավարութիւն մը չկազմելու եւ քաղաքական ուժերն ու կուսակցութիւնները հեռու պահելու նախարարաց խորհուրդէն:

Նախկին նախարար Աշրաֆ Ռիֆի հարցազրոյցի մը ընթացքին յայտնեց, որ Հըզպալլա թիրախ կը դարձնէ լիբանանեան բանակն ու Լիբանանի մէջ ամէն բան, որ Իրանի դէմ է: Ան նշեց, որ Հըզպալլա ամէն ջանք ի գործ կը դնէ երկրին իշխանութիւնը, բանակն ու ելեւմտական իրավիճակը քանդելու:

Ան հաստատեց, որ բանակին եւ անոր հրամանատարին դէմ յարձակումը կը միտի հարուածել երկիրը կանգուն պահող վերջին սիւնը:

Ան կոչ ուղղեց քաղաքական անձնաւորութիւնները կառավարութենէն հեռացնելու:

Քաղաքական անձնաւորութիւններուն կողքին մարոնի համայնքի Պշարա Ռայի պատրիարքը իր կարգին ունեցաւ կեցուածք մը, որուն համաձայն, երիտասարդները իրաւունք ունին յեղափոխութիւն կատարելու, որովհետեւ անոնք կորսնցուցած են լիբանանեան պետութեան նկատմամբ իրենց վստահութիւնը: «Սակայն անոնք պէտք է նաեւ զգուշանան մութ ձեռքերէն, որոնք կրնան վտանգել անոնց նպատակները», ըսաւ Ռայի պատրիարքը:

Նշենք, որ ելեւմուտքի նախարարի պաշտօնակատար Ալի Հասան Խալիլ երէկ հանդիպում մը ունեցաւ Լիբանանի մէջ Եւրոպական Միութեան դեսպան Ռալֆ Թրաֆի հետ:

Հանդիպումին ընթացքին քննարկուեցան Լիբանանի մէջ տիրող իրադարձութիւններն ու տագնապը լուծելու հեռանկարները:

Իր կարգին, ճարտարարուեստի նախարարութիւնը հրապարակեց որոշում մը, որուն համաձայն, ըմպելի ջուրի 15 ընկերութիւններ պիտի փակեն իրենց դռները` նկատի ունենալով, որ անոնք աշխատանքի արտօնագիրներ չունին, եւ անոնց արտադրած ըմպելի ջուրը առողջական չափանիշները չ՛ամբողջացներ:

Մարոնի ընդհանուր խորհուրդը երէկ գումարեց ընթացիկ նիստ մը` գլխաւորութեամբ խորհուրդի նախագահ Ուատիհ Խազենի:

Խորհուրդը կոչ ուղղեց հանրապետութեան նախագահին արագօրէն ճշդելու վարչապետի նշանակման պարտադիր խորհրդակցութիւններու թուականը:

LEAVE A REPLY

Please enter your comment!
Please enter your name here