«Ժողովրդային Շարժումը Փշրեց Բացարձակ Արգելքներ, Իսկ Երիտասարդները Պէտք Չէ Տարուին Ատելութիւն Սերմանող Բառամթերքով» Շեշտեց Նախագահ Աուն

0
292

Լիբանանի անկախութեան 76-ամեակին առիթով հանրապետութեան նախագահ զօր. Միշել Աուն երէկ երեկոյեան ժամը 8:00-ին ուղղեց պատկերասփռուած պատգամ մը, որուն մէջ հաստատեց, որ Լիբանան կը սպասէ նոր կառավարութեան մը, որուն վրայ պիտի զետեղէ իր յոյսերը: Այդ կառավարութիւնը արդէն իսկ կազմուած պէտք էր ըլլար եւ աշխատանքի սկսած:

«Սակայն լիբանանեան քաղաքական կեանքին մէջ տիրող հակադրութիւնները մղեցին համբերելու` շրջանցելու համար վտանգները», ըսաւ ան:

Նախագահ Աուն ընդգծեց, որ պէտք է կազմել կառավարութիւն մը, որ կը գոհացնէ լիբանանցիներուն ձգտումներն ու անոնց պատկերացումները, ինչպէս նաեւ կ՛ըլլայ աշխուժ, արդիւնաբեր եւ կազմակերպուած, որովհետեւ Լիբանանի դէմ ծառացող մարտահրաւէրները հսկայական են:

Հանրապետութեան նախագահը շեշտեց, որ շրջանին դէմ պատրաստուած գործարքները ո՛չ միայն կը սպառնան խնդրոյ առարկայ երկիրներուն անկախութեան, այլեւ` անոնց գոյութեան եւ գոյացութեան: «Լիբանանի անկախութիւնը չի նշանակեր այս կամ այն երկրին հետ հակառակորդ կամ թշնամի ըլլալ: Մենք կը ջանանք անկեղծ բարեկամութիւններ հաստատել եւ մեր բարեկամներուն նկատմամբ դրական վարուելակերպ ցուցաբերել: Այս բոլորին կողքին, մենք կ՛ուզենք, որ մեր որոշումը ըլլայ ազատ, իսկ յարաբերութիւնը` հաւասարէ հաւասար: Մենք կը փափաքինք ընտրել այն, ինչ որ մեր երկրին վայել է եւ կը համապատասխանէ անոր շահերուն, ինչպէս նաեւ մերժել այն, ինչ որ վնաս կը հասցնէ անոր», յայտնեց նախագահ Աուն:

Հանրապետութեան նախագահը հաստատեց, որ անկախութիւնը ազգային ազատ ու անկախ որոշում է, որ ոչ մէկ հոգատարութեան ենթակայ է, ըլլայ այդ հոգատարութիւնը ծածուկ կամ բացայայտ: «Մենք կառչած կը մնանք ազգային ազատ ու անկախ որոշումին եւ մեր ամբողջ ուժովն ու կամքովը կը պաշտպանենք զայն` ինչ ալ ըլլայ մեր վճարելիք գինը», ըսաւ ան:

Նախագահ Աուն մաղթեց, որ յառաջիկայ տարին ըլլայ տնտեսական իսկական անկախութեան տարի մը, որուն ընթացքին երկրին տնտեսութիւնը շահընկալ ըլլալու իրականութենէն կը փոխուի արդիւնաբեր տնտեսութիւն մը ըլլալու, ինչպէս նաեւ կարելի կ՛ըլլայ լիբանանեան ջուրերուն մէջ Ա. նաւթահորին պեղումները կատարել: «Կը յուսանք նաեւ, որ յառաջիկայ տարին Լիբանանի համար ըլլայ աշխարհագրական անկախութեան տարի մը, որուն ընթացքին կառչած կը մնանք լիբանանեան ջուրերուն, լիբանանեան հողերուն, ինչպէս նաեւ կ՛ունենանք կենսոլորտային եւ ընկերային իսկական անկախութիւն մը, եւ կը կարենանք ձերբազատիլ համայնքային եւ յարանուանական տագնապներէն` քաղաքացիական պետութիւն մը հիմնելու նախաքայլերը առնելով», շեշտեց նախագահ Աուն:

Ան կոչ ուղղեց լիբանանցիներուն օժանդակելու փտածութեան դէմ պայքարին` ընդգծելով, որ անիկա կարծր ճակատամարտ մըն է, որ պիտի մղուի: «Լիբանանցիներէն բացի ոչ ոք կրնայ ճնշում բանեցնել` գործադրելու առկայ օրէնքները, ինչպէս նաեւ օրէնսդիր աշխատանքին ճամբով յանգելու այնպիսի օրէնքներու, որոնց հիման վրայ կարելի կ՛ըլլայ վերադարձնել իւրացուած գումարները, ինչպէս նաեւ հետապնդել փտածները:

«Փտածութեան բոյները հրապարակներուն վրայ եւ տեղեկատուական միջոցներուն կողմէ լուսարձակի տակ առնելը առողջ է եւ կ՛օժանդակէ այդ պայքարին, ինչպէս նաեւ իր նպաստը կ՛ունենայ պէտք եղած թղթածրարները դատական իշխանութիւններուն ներկայացնելու: Սակայն տեղեկատուական մարզը եւ փողոցը քաղաքական բանավէճի, դատախազի, ընդհանուր դատախազի, դատաւորի եւ միաժամանակ բանտապահի չեն կրնար վերածուիլ: Այս իրականութիւնը ամէնէն աւելի կրնայ վնաս հասցնել փտածութեան դէմ պայքարին», հաստատեց հանրապետութեան նախագահը:

Ան շեշտեց, որ ժողովրդային շարժումը փշրած է բացարձակ արգելքները եւ դատական իշխանութիւնները մղած քայլերու դիմելու: Ան կոչ ուղղեց ցուցարարներուն մօտէն հետեւելու իրենց իսկական պահանջներուն եւ մտածելու անոնց գործադրութեան միջոցներուն մասին, «որովհետեւ տագնապներու լուծման միակ ճշգրիտ ճամբան երկխօսութիւնն է», նշեց ան:

Նախագահ Աուն կոչ ուղղեց դատական իշխանութիւններուն յանձնառու մնալու իրենց երդումին եւ իրենց աշխատանքը կատարելու պարկեշտութեամբ, որովհետեւ փտածութեան դէմ պայքարը, ուր որ ալ սկսի ան, կրնայ յաղթանակով աւարտիլ, եթէ զայն մղեն պարկեշտութեամբ ու քաջութեամբ:

Նախագահ Աուն իր խօսքը ուղղելով յատկապէս երիտասարդներուն հաստատեց, որ փողոցը արտասանուած սանձարձակ խօսքերը երկրին եւ ընկերութեան դէմ մեծագոյն սպառնալիքներն են: Մի՛ մոռնաք, որ այս տագնապին աւարտէն ետք պիտի վերադառնաք միասնաբար ապրելու:

«Երիտասարդները պէտք չէ տարուին ատելութիւն սերմանող եւ գրգռութիւններ հրահրող բառամթերքով, ինչպէս նաեւ պէտք չէ քանդեն լիբանանեան ընկերութեան ողնասիւնը, որ հիմնուած է ուրիշին նկատմամբ յարգանքի, ինչպէս նաեւ միտքի, տեսակէտի եւ խօսքի ազատութեան վրայ», ըսաւ հանրապետութեան նախագահը:

Նախագահ Աուն ողջունեց նաեւ բանակայինները` նկատել տալով, որ զինուորական իմաստով ամէնէն դժուար պարտականութիւնները, որոնք կը ստանձնուին` ներքին պարտականութիւններն են: «Այս պարագային բանակայինները պիտի պաշտպանեն իրենց կարծիքը արտայայտել փափաքող ցուցարարներուն ազատութիւնը, ինչպէս նաեւ իր աշխատանքին ուղղուող կամ բնակարանը հասնիլ փափաքող քաղաքացիներուն երթեւեկի ազատութիւնը: Այս պարտականութեան մէջ բանակայիններուն արձանագրելիք յաջողութիւնը կը կայանայ անոնց նկատմամբ քաղաքացիներուն վստահութիւնը հաւասարակշռելով», եզրափակեց նախագահ Աուն:

Նշենք, որ նախագահական պալատէն հրապարակուեցաւ հաղորդագրութիւն մը, որուն մէջ հաստատուեցաւ, որ Լիբանանի Անկախութեան տօնին առիթով Պաապտայի մէջ աւանդական տօնակատարութիւն պիտի չկատարուի, ինչպէս նաեւ նախագահ Աուն շնորհաւորութիւն պիտի չընդունի:

Նախագահ Աունի ճառէն ետք, ցուցարարները փակեցին Թաալպայայի ճամբան եւ Ռինկի կամուրջը:

Աւելի ուշ անոնք փակեցին նաեւ Նաամէի մայրուղին, Խալտէի ճամբան եւ Սայտայի Էլիա հրապարակը: Իսկ այլ ցուցարարներ հասան նախագահական պալատի ճամբայ, ուր նստացոյց մը կատարեցին:

Միւս կողմէ, հանրապետութեան նախագահը երէկ առաւօտեան ընդունեց Լիբանանի մէջ Ֆրանսայի դեսպան Պրունօ Ֆուշէն, որուն հետ քննարկեց լիբանանեան իրադարձութիւնները:

Հանդիպումին ընթացքին Ֆուշէ նախագահ Աունին ներկայացուց Փարիզի մէջ Լիբանանի տագնապին հարցով տեղի ունեցած ֆրանսական-ամերիկեան-բրիտանական եռակողմանի հանդիպումին արդիւնքները` հաստատելով, որ Փարիզ, Ուաշինկթըն եւ Լոնտոն կը շարունակեն զօրակցիլ Լիբանանի անկախութեան եւ գերիշխանութեան, ինչպէս նաեւ սահմանադրական հաստատութիւններու աշխատանքի վերսկսումին:

Ֆուշէ յայտնեց, որ Ֆրանսայի նախագահ Էմանուէլ Մաքրոնի յատուկ պատուիրակ, Ֆրանսայի արտաքին գործոց նախարարութեան Ափրիկէի եւ Միջին Արեւելքի բաժանմունքի տնօրէն Քրիսթոֆ Ֆարնօ ընդգծած է Լիբանանի տարբեր մարզերուն մէջ բարեկարգումները գործադրելու կարեւորութիւնը:

Երկրին Անկախութեան տօնին առիթով, նախագահ Աուն ստացաւ շնորհաւորագիրներ Միացեալ Նահանգներու նախագահ Տանըլտ Թրամփէն եւ Բրիտանիոյ Էլիզապեթ թագուհիէն:

Թրամփ իր եւ ամերիկացի ժողովուրդին անունով նախագահ Աունին փոխանցեց լաւագոյն բարեմաղթութիւնները: Ան հաստատեց, որ լիբանանեան-ամերիկեան երկկողմանի յարաբերութիւնները ամուր են` աւելցնելով, որ Ուաշինկթըն պատրաստ է գործակցելու լիբանանցիներուն կարիքներուն անսացող եւ երկրին կայունութիւնն ու անկախութիւնը պաշտպանող լիբանանեան կառավարութեան մը հետ:

Իր կարգին, Էլիզապեթ թագուհին մաղթեց, որ յառաջիկայ տարուան համար անկախութեան տօնը բարեբեր ըլլայ լիբանանցիներուն համար:

Լիբանանի մէջ ֆրանսական դեսպանատունը հրապարակեց հաղորդագրութիւն մը` յոյս յայտնելով, որ Լիբանանի մէջ ամէնէն մօտիկ ապագային կը կազմուի նոր եւ աշխուժ կառավարութիւն մը, որ կը վայելէ բոլորին վստահութիւնը եւ կ՛աշխուժացնէ երկրին տնտեսութիւնը` Լիբանանի դիմագրաւած տնտեսական բաւական վատ կացութեան լոյսին տակ:

«Լիբանանի Անկախութեան տօնին առիթով Ֆրանսա կը փոխանցէ իր շնորհաւորութիւններն ու բարեմաղթութիւնները եւ կը հաստատէ, որ միշտ պիտի զօրակցի իրեն շատ մտերիմ այս երկրին», նշուեցաւ հաղորդագրութեան մէջ:

Անկախութեան 76-ամեակին առիթով, Լիբանանի մէջ ամերիկեան դեսպանատունը հրապարակեց հաղորդագրութիւն մը, որուն մէջ նշեց, որ լիբանանցի ժողովուրդին կը զօրակցի այսօր եւ ապագային:

Պէտք է աւելցնել, որ երէկ իշխանութեան երեք պետերուն անունով ծաղկեպսակներ զետեղուեցան Լիբանանի անկախութիւնը կերտած անձնաւորութիւններուն յուշարձաններուն եւ դամբարաններուն, ինչպէս նաեւ անկախութիւնը խորհրդանշող վայրերուն մէջ:

Երեսփոխան Նիքոլա Սահնաուի ծաղկեպսակ մը զետեղեց Պշարա Խուրիի յուշարձանին:
Երեսփոխան Ֆարիտ Պուսթանի ծաղկեպսակ մը զետեղեց Քամիլ Շամունի դամբարանին:
Երեսփոխան Ռոժէ Ազար ծաղկեպսակներ զետեղեց Ֆուատ Շեհապի եւ Սելիմ Թաքլայի դամբարաններուն:
Երեսփոխան Միշել Մուսա ծաղկեպսակ մը զետեղեց Ատել Օսէյրանի դամբարանին:
Երեսփոխան Ղազի Զաայթեր ծաղկեպսակ մը զետեղեց Սապրի Համատէի դամբարանին:
Երեսփոխան Ապտել Ռահիմ Մըրատ ծաղկեպսակ մը զետեղեց Ռիատ Սոլհի դամբարանին:
Երեսփոխան Նազիհ Նաժըմ ծաղկեպսակ մը զետեղեց Սաէպ Սալամի դամբարանին:
Երեսփոխան Սամիր Ժսըր ծաղկեպսակ մը զետեղեց Ռաֆիք Հարիրիի դամբարանին:
Երեսփոխան Սեզար Ապի Խալիլ ծաղկեպսակ մը զետեղեց Մաժիտ Արսլանի դամբարանին:
Երեսփոխան Ըսթֆեն Տուէյհի ծաղկեպսակ մը զետեղեց Համիտ Ֆրենժիէի դամբարանին:
Երեսփոխան Ֆատի Ալամէ ծաղկեպսակ մը զետեղեց Հապիպ Ապու Շահլայի դամբարանին:
Երեսփոխան Նիքոլա Նահհաս ծաղկեպսակ մը զետեղեց Ապտել Համիտ Քարամէի դամբարանին:
Երեսփոխան Թարեք Մերեհպի ծաղկեպսակ մը զետեղեց Ատնան Հաքիմի դամբարանին:
Երեսփոխան Ֆարիտ Պուսթանի ծաղկեպսակ մը զետեղեց Պշամունի Անկախութեան տան մէջ, իսկ երեսփոխան Քասեմ Հաշեմ ծաղկեպսակ մը զետեղեց Ռաշայայի բերդին մէջ:

LEAVE A REPLY

Please enter your comment!
Please enter your name here