Մնացականեան Ղարաբաղեան Հարցին Մէջ Կարեւոր Նկատեց ՀԱՊԿ Երկիրներու Համաձայնեցուած Մօտեցումներու Պահպանումը

0
189

ԵՐԵՒԱՆ, «Արմէնփրէս».- Աշխատանքային այցելութեամբ Պիշքեք գտնուող Հայաստանի արտաքին գործոց նախարար Զօհրապ Մնացականեան 27 Նոյեմբերին մասնակցեցաւ ՀԱՊԿ անդամ պետութիւններու արտաքին գործոց նախարարներու խորհուրդի, պաշտպանութեան նախարարներու խորհուրդի, անվտանգութեան խորհուրդի քարտուղարներու կոմիտէի միացեալ նիստին՝ իր խօսքին մէջ կարեւոր նկատելով միջազգային բոլոր հարթակներուն վրայ ՀԱՊԿ անդամ պետութիւններուն կողմէ Լեռնային Ղարաբաղի տագնապին առնչութեամբ համաձայնեցուած մօտեցումներու պահպանումը:

Օրակարգի վրայ եղած են ՀԱՊԿ շրջանակներուն մէջ եւ միջազգային հարթակներուն վրայ անդամ պետութիւններու փոխգործակցութեան, արտաքին քաղաքականութեան համադրման, միջազգային ու տարածաշրջանային անվտանգութեան սպառնալիքներուն ու մարտահրաւէրներու հակազդելու առնչուող հարցեր: Հանգամանալից կերպով անդրադարձ կատարուեցաւ Սուրիոյ մէջ ստեղծուած իրավիճակին:

Անդրադառնալով կառոյցի շրջանակներուն մէջ անդամ պետութիւններու համագործակցութեան հայկական կողմի տեսլականին՝ նախարար Մնացականեան առանձնայատուկ կերպով ընդգծեց արտաքին քաղաքականութեան համակարգման առնչուող հարցերու շուրջ միջազգային հարթակներու վրայ դաշնակցային համագործակցութեան զարգացումը:

Ներկայացնելով Լեռնային Ղարաբաղի տագնապի խաղաղ լուծման գործընթացին առնչուող վերջին զարգացումները՝ Զօհրապ Մնացականեան ընդգծեց, որ խաղաղութեան համար բարենպաստ միջավայր ձեւաւորելու եւ ժողովուրդները խաղաղութեան նախապատրաստելու պայմանաւորուածութիւններու առկայութեան պայմաններուն մէջ առաւել քան արդիական կը մնայ ռազմատենչ եւ ատելութեան հռետորաբանութենէն, անվերահսկելի սպառազինութիւններու մրցավազքէն հրաժարելու, ինչպէս նաեւ հակամարտութեան շփման գիծին մէջ լարուածութեան թուլացման համար յաւելեալ միջոցառումներու ձեռնարկման անհրաժեշտութիւնը:

Նախարար Մնացականեան կարեւոր նկատեց միջազգային բոլոր հարթակներուն վրայ ՀԱՊԿ անդամ պետութիւններուն կողմէ Լեռնային Ղարաբաղի հիմնախնդիրին առնչութեամբ համաձայնեցուած մօտեցումներու պահպանումը:

Ան խօսեցաւ նաեւ Սուրիոյ հիւսիս-արեւելքը Թուրքիոյ ներխուժմամբ ստեղծուած իրադրութեան մասին՝ յատուկ մտահոգութիւն յայտնելով ազգային եւ կրօնական փոքրամասնութիւններու վիճակին վերաբերեալ: Նախարար Մնացականեան ընդգծեց, որ Հայաստան կը շարունակէ մարդասիրական օգնութիւն ցուցաբերել բարեկամ Սուրիոյ ժողովուրդին՝ ի շահ տարածաշրջանային խաղաղութեան եւ անվտանգութեան հաստատման:

Հարկ է նշել, որ նախարարներուն կողմէ նիստին իբրեւ արդիւնք ընդունուած «Մերձաւոր Արեւելքի եւ Հիւսիսային Ափրիկէի մէջ իրավիճակի կայունացման վերաբերող ջանքերուն մասին» ՀԱՊԿ անդամ պետութիւններու արտաքին գործոց նախարարներու միացեալ յայտարարութեան մէջ նախարարները անդրադարձ կատարեցին Սուրիոյ մէջ Հայաստանի մարդասիրական առաքելութեան՝ ընդգծելով անոր կարեւորութիւնը:

LEAVE A REPLY

Please enter your comment!
Please enter your name here