Ազգային Առաջնորդարանին Մէջ. Լիբանանի Հայ Երեք Համայնքապետերու Հանդիպում

0
164

Լիբանանի հայոց թեմի առաջնորդ Նարեկ արքեպիսկոպոսի հրաւէրով, երկուշաբթի, 2 դեկտեմբեր 2019-ին, Պուրճ Համուտի Ազգային առաջնորդարանին մէջ, հայ երեք համայնքապետներ` Նարեկ արքեպիսկոպոս, Պէյրութի Հայ կաթողիկէ պատրիարքական թեմի օգնական Գէորգ եպս. Ասատուրեան եւ Մերձաւոր Արեւելքի Հայ աւետարանական եկեղեցիներու միութեան Կեդրոնական մարմինի ատենապետ վեր. Րաֆֆի Մսըրլեան հանդիպում մը ունեցան եւ քննարկեցին Լիբանանի աւելի քան միամսեայ ժողովրդային պահանջներուն եւ ընկերային-քաղաքական ու տնտեսական անցուդարձերուն հոլովոյթը եւ անոնց լիբանանահայութեան վրայ գործած ազդեցութիւնը: Անոնք ընդգծեցին, որ Լիբանանի մէջ պարզուած ներկայ կացութիւնը խորացող տագնապի վերածուած է, եւ ժողովրդային ցասումին ի պատասխան` պետութիւնը արագ եւ արմատական լուծումներ պէտք է գտնէ, որպէսզի լիբանանցին արժանապատիւ կեանք ունենայ:

Համայնքապետները շեշտեցին, որ այս դժուարին փուլին լիբանանահայութիւնը հաւաքական ճիգերով պէտք է դիմագրաւէ բազմաբնոյթ մարտահրաւէրները` առարկայական եւ հեռանկարային ծրագիրներով:

Հոգեւոր երեք պետերը նաեւ համաձայնեցան հայ առաքելական, կաթողիկէ եւ աւետարանական հոգեւորականներու մասնակցութեամբ Լիբանանի խաղաղութեան համար համատեղ աղօթք կատարել երեքշաբթի, 10 դեկտեմբեր, երեկոյեան ժամը 6.00-ին, Սրբոց Վարդանանց եկեղեցւոյ մէջ` հաստատելով, որ յառաջիկայ փուլին պիտի իրականացնեն համապատասխան հանդիպումներ` սերտելու միասնական գործակցութեան կարելիութիւնները:

LEAVE A REPLY

Please enter your comment!
Please enter your name here