Արցախի Պատմամշակութային Ոլորտին Համար Պիտի Յատկացուի Շուրջ 122 Միլիոն Դրամ

0
79

ՍՏԵՓԱՆԱԿԵՐՏ, «Արցախփրէս».- Արցախի Ազգային ժողովի գիտութեան, կրթութեան, մշակոյթի, երիտասարդութեան եւ մարմնակրթութեան հարցերու ու ելեւմտական եւ տնտեսական կառավարման հարցերու մնայուն յանձնաժողովներու միացեալ նիստին նախարար Լեռնիկ Յովհաննիսեան յայտնեց, որ Արցախի պատմամշակութային ոլորտին համար պիտի յատկացուի շուրջ 122 միլիոն դրամ:

Նախարարին համաձայն՝ ոլորտի կարգաւորման եւ զարգացման համար պետական պիւտճէով նախատեսուած ֆինանսաւորման հիմնական նպատակն է Արցախի մէջ պահպանուած պատմամշակութային յուշարձաններու ուսումնասիրութիւնը եւ պահպանումը՝ վկայագրման, պահպանական գօտիներու կազմութեան, օրէնսդրական դաշտի կատարելագործման, յուշարձաններու տարածքներու մաքրութեան եւ հանրահռչակման միջոցով:

2020 թուականին Գտչավանքի վանական համալիրի տարածքին մէջ կը նախատեսուի աշխատանքներ իրականացնել եկեղեցւոյ ներսի պատերուն վրայ: Վերջիններուն վրայ առկայ են բազմաթիւ փորագրութիւններ, որոնք, ըստ նախարարին, կատարուած են յուշարձանի անբարեխիղճ այցելուներուն կողմէ: Շուշիի շրջանի Յունոտի քարէ կամուրջի վերականգնման աշխատանքներու իրականացմամբ կը նախատեսուի շարունակել 2019-ին մեկնարկած կամուրջի վերականգնման աշխատանքները: Ասկերանի ամրոցի օգտագործման, տարածքի բարեկարգման եւ երկայնական պատերու վերականգնման աշխատանքները հիմնականին մէջ պիտի իրականացուին երկայնական պատերու վերականգնման ուղղութեամբ: Շուշիի պարսպապատերու եւ աշտարակներու վերականգնման աշխատանքներու իրականացման անհրաժեշտութիւնը կապուած է Շուշիի պարսպապատերու աշտարակներէն մէկուն վթարային վիճակին հետ: Նախատեսուած է իրականացնել Մարտակերտի շրջանի Վանք գիւղի տարածքին մէջ գտնուող «Վահան Բէյ» կոչուող կամուրջի ամրակայման եւ վերականգնման աշխատանքները ու Շուշի քաղաքի Գարեգին Նժդեհ եւ Զօրավար Անդրանիկ փողոցներու քառուղիին վրայ գտնուող նախկին թեմական դպրոցի վթարային պատի քանդման եւ վերաշարման աշխատանքները:

LEAVE A REPLY

Please enter your comment!
Please enter your name here