Դատ Կը Բացուի Ցեղասպանութեան Համար Ցաւակցութիւն Յայտնած Տիգրանակերտի Փաստաբանական Կաճառին Դէմ

0
451

ԵՐԵՒԱՆ, «Էրմենիհապեր».- Թուրքիոյ արդարադատութեան նախարարութեան արտօնութեամբ, Պաթմանի դատարաններէն մէկը Տիգրանակերտի փաստաբանական կաճառի նախորդ շրջանի նախագահին եւ վարչութեան 9 անդամներուն դէմ դատ բացաւ, Հայոց Ցեղասպանութեան առնչութեամբ այդ մարմինին կատարած ցաւակցական հրատարակութեան առթիւ։

«Ակօս» թերթը հաղորդեց, որ Տիգրանակերտի փաստաբանական կաճառը կ՛ամբաստանուի «ժողովուրդի մէջ ատելութիւն եւ թշնամանք սերմանելու» յանցանքով։

Յիշեցնենք, որ նշեալ կաճառը 2018-ի Ապրիլ 24-ին հրատարակած էր «Կը Բաժնենք Հայ Ժողովուրդին Անվերջանալի Ցաւը» խորագրեալ ցաւակցական հաղորդագրութիւն մը, որուն մէջ կը պատմուէր, որ 1915-ին հայ ժողովուրդին դէմ կազմակերպուեցաւ նախ մտաւորականներու ու քաղաքական գործիչներու սպանութիւն, ապա պետական ուժերու ալ կազմակերպումով աւելի քան մէկ միլիոն հայ քաղաքացի դէպի մահ ղրկուեցաւ Սուրիոյ անապատները։ «Ապրուած ցաւը այնքան մեծ եղաւ, որ տարիներ վերջ ՄԱԿ-ի կողմէ ցեղասպանութիւններու արգելք հանդիսանալու համար գրի առնուած համաձայնագիրը ներշնչուեցաւ հայոց դէմ գործուած ցեղասպանութենէն», նշուած էր հոն։

ՓԱՍՏԱԲԱՆԱԿԱՆ ԿԱՃԱՌԻ ՊԱՏԱՍԽԱՆԸ

Տիգրանակերտի փաստաբանական կաճառի նախորդ շրջանի ղեկավարներուն դէմ բացուած այս դատի կապակցութեամբ պատասխան մը եկաւ փաստաբանական կաճառի ներկայ վարչութենէն։ Կաճառի վարչութիւնը պաշտպանեց նախկին շրջանի վարիչները ու դիտել տուաւ, որ անոնց դէմ եղած ամբաստանութիւնը անհիմն է ու արժէք մը չի ներկայացներ իրենց համար։

Կաճառը իր պատասխանին մէջ անգամ մը եւս հաստատեց Հայոց Ցեղասպանութեան պատմական իրողութիւնը ու ըսաւ, որ ասոնք յերիւրածոյ պատմութիւններ չեն, աւելցնելով. «1915-ին պատահածներուն մասին մեր մտածումները հիմնուած չեն ո՛չ գիրքերու, ո՛չ յօդուածներու, ո՛չ ալ քաղաքական գործիչներու կողմէ մեզի թելադրուածներուն վրայ. մեր գրածներն ու մտածումները ուղղակի զանոնք ապրածներուն բերանով պատմուածներուն, մեր մեծ մայրերէն ու մեծ հայրերէն մեր մտիկ ըրած պատմութիւններուն վրայ հիմնուած են։ Ասոնք պատմութիւններն են այն մարդոց, որոնք իրենց ապրածներուն բեռը չկրցան աւելի երկար վերցնել ու պոռթկացին։ Այս պատմութիւններուն ականատես վկաներն ալ կան։ Երբեմն անուն մը, երբեմն տուն մը, երբեմն դաշտ մը ու ծառ մը, ճամբայ մը կամ ջաղացք մը, երբեմն ալ աւերակ դարձած եկեղեցի մը։ Մեր ապրած ցաւն ու պատասխանատուութիւնը հաւաքական է, ճշմարտութիւններու հետ առերեսումն ալ պէտք է ըլլայ հաւաքական»։

LEAVE A REPLY

Please enter your comment!
Please enter your name here