Ձերբակալուած Է Կրթութեան, Գիտութեան, Մշակոյթի Եւ Մարմնակրթութեան Փոխնախարար Գէորգ Լոռեցեանը

0
681

Հայաստանի Հանրապետութեան Ազգային անվտանգութեան ծառայութեան (ԱԱԾ) աշխատակիցներուն կողմէ փտածութեան դէմ պայքարի ծիրին մէջ ձեռնարկուած հետախուզական գործողութիւններուն իբրեւ արդիւնք 4 դեկտեմբեր 2019-ին, մեծաքանակ կաշառք ստանալու կասկածով բերման ենթարկուեցաւ Հայաստանի կրթութեան, գիտութեան, մշակոյթի եւ մարմնակրթութեան նախարարի տեղակալ Գէորգ Լոռեցեանը, ինչպէս նաեւ վերջինիս վարորդն ու Հայաստանի մէջ գործող ֆութպոլի ակումբներէն մէկուն նախագահը, որ միաժամանակ կը հանդիսանայ նաեւ շարք մը մատակարարող ընկերութիւններու փաստացի ղեկավարը:

«Ձեռք բերուած նախնական տուեալներուն համաձայն, Հայաստանի կրթութեան, գիտութեան, մշակոյթի եւ մարմնակրթութեան նախարարի տեղակալը, նախարարութեան ենթակայ հիմնարկներու կարիքներուն համար մարզագոյքի եւ մարզահագուստի ձեռքբերման նպատակով յայտարարուած մրցումներուն աջակցութիւն ցուցաբերելով վերոնշեալ տնտեսվարողին, անոր դիմաց վարորդի օժանդակութեամբ պայմանաւորուածութիւն ձեռք բերած է ստանալու խոշոր չափերով կաշառք գումար: Տնտեսվարողին կողմէ գումարի մէկ մասը նախարարի տեղակալի վարորդին փոխանցելէ անմիջապէս ետք վերջիններս բռնուած են», նշուած է ԱԱԾ-ի հաղորդագրութեան մէջ:

Գէորգ Լոռեցեան 30 հոկտեմբեր 2018-ին վարչապետ Նիկոլ Փաշինեանի որոշումով նշանակուած է Հայաստանի մարմնակրթութեան եւ երիտասարդութեան հարցերու նախարարի տեղակալ, 2016 թուականէն Քաղաքացիական պայմանագիր կուսակցութեան անդամ է:

LEAVE A REPLY

Please enter your comment!
Please enter your name here