Նունէ Սարգսեան ԵՈՒՆԻՍԵՖի Կողմէ Նշանակուեցաւ Երեխաներու Իրաւունքներու Պաշտպան

0
1840

ԵՐԵՒԱՆ, «Արմէնփրէս».- Հայաստանի Հանրապետութեան առաջին տիկին Նունէ Սարգսեան Մեսրոպ Մաշտոցի անուան հին ձեռագիրներու գիտահետազօտական հիմնարկին մէջ (Մատենադարան) մասնակցեցաւ Հայաստանի մէջ ԵՈՒՆԻՍԵՖ-ի գործունէութեան 25-ամեակին նուիրուած հանդիսաւոր ձեռնարկին:

Հայաստանի մէջ ԵՈՒՆԻՍԵՖ-ի ներկայացուցիչ Թանիա Ռատոչայ յայտարարեց, որ Նունէ Սարգսեան ԵՈՒՆԻՍԵՖ-ի կողմէ նշանակուած է երեխաներու իրաւունքներու արտակարգ պաշտպան:

«Երբ անցեալ տարի առաջին անգամն ըլլալով հանդիպեցայ տիկին Սարգսեանի հետ, ան անմիջապէս մանկական հիմնարկին իր աջակցութիւնը եւ օգնութիւնը առաջարկեց: Այնուհետեւ ես ծանօթացայ անոր գործունէութեան, աւելի լաւ ճանչցայ զայն, տեղեկացայ, որ մանկագիր է, որուն գիրքերը շատ յայտնի են եւ որոնք կը թարգմանուին զանազան լեզուներու՝ այլ մշակոյթ ունեցող երեխաներուն եւս կարելիութիւն տալով զանոնք կարդալու», ըսաւ Թանիա Ռատոչայ՝ դիտել տալով, որ Ն. Սարգսեան երեխաներուն հոգ տանող եւ անոնց կեանքը աւելի բարօր դարձնելու ճիգ թափող անձերէն է։ Մեզի համար մեծ պատիւ է առաջարկել տիկին Սարգսեանին՝ ստանձնել երեխաներու իրաւունքներու արտակարգ պաշտպանի առաքելութիւնը, այս ձեւով միաւորելով մեր ջանքերը եւ կարեւոր նկատելով այս աշխատանքը ո՛չ միայն Հայաստանի, այլ նաեւ Հայաստանէն դուրս», շեշտեց Ռատոչայ:

Նունէ Սարգսեան շնորհակալութիւն յայտնեց նման պատիւի արժանանալուն համար եւ շնորհաւորեց ԵՈՒՆԻՍԵՖ-ի Հայաստանի մէջ 25 տարիներու գործունէութիւնը։ Ան շեշտեց, որ 25 տարի շարունակ մարդիկ նուիրուածութեամբ՝ իրենց աշխատանքը, ջանքերը եւ եռանդը ներդրած են՝ երեխաներուն համար աւելի լաւ կեանք ապահովելու առաջադրանքով: «ԵՈՒՆԻՍԵՖ-ը համամարդկային կառոյց է, որը պէտք է շարունակի գոյութիւնը, եւ դա է պատճառը, որ մենք նրան չպէտք է միայնակ թողնենք թէ՛ այստեղ՝ Հայաստանում, թէ՛ ամբողջ աշխարհում: Մենք պէտք է համախմբուենք ԵՈՒՆԻՍԵՖ-ի շուրջը, որպէսզի մանուկներն ունենան երջանիկ մանկութիւն: Երեխաներն են մեր հարստութիւնը եւ ամենամեծ արժէքը», յայտնեց Նունէ Սարգսեան:

Առաջին տիկինը կարեւոր նկատեց երեխաներուն համար հաւասար կարելիութիւններ եւ պայմաններ ապահովելը՝ ընդգծելով, որ անոնք բոլորը երջանիկ ըլլալու, ապահով, առողջ մանկութիւն ունենալու իրաւունք ունին: Ան մասնաւորապէս առանձնացուց Հայաստանի հեռաւոր գիւղերուն մէջ երեխաներուն համար պատշաճ որակի կրթութիւն ապահովելու հարցը: «ԵՈՒՆԻՍԵՖ-ի եւ իմ ծրագրերից մէկը նուիրուած կը լինի կրթութեանը եւ հեռաւոր գիւղերում ուսուցիչների պակասը լրացնելուն։ Ես մեծ պատուով կը կատարեմ այս՝ երեխաների իրաւունքների արտակարգ պաշտպանի պարտականութիւնները: Պաշտպան կը լինեմ, իսկ արտակարգն ինձ համար երեխաներն են, որովհետեւ ամէն երեխայ արտակարգ է, հրաշք է, տիեզերք է: Ամէն երեխայ տաղանդ, ձիրք ունի, միայն խնդրում եմ բոլորին՝ գտէք այդ տաղանդը, փայփայէք այն եւ զարգացրէք, օգնէք, որ երեխան կատարելագործի այն եւ յետագայում օգտագործի մեր ազգի, ժողովրդի, հայրենիքի համար: Մեր երեխաները մեր կարիքն ունեն, մենք բոլորս պէտք է փորձենք տալ նրանց մեր սէրը, մեր գուրգուրանքը եւ ցոյց տալ, որ նրանք միայնակ չեն եւ գտնւում են մի երկրում, որը կարող է նրանց մասին հոգ տանել ու ապահովել նրանց ապագան», եզրափակեց ան:

LEAVE A REPLY

Please enter your comment!
Please enter your name here