Ազգային Առաջնորդարանին Մէջ. Նարեկ Արքեպիսկոպոս Հանդիպեցաւ Հոգեւոր Խմբակներու Ներկայացուցիչներուն Հետ

0
299

Հինգշաբթի, 12 դեկտեմբեր 2019-ին, Ազգային առաջնորդարանի «Երջօ Սամուէլեան – Եռագոյն» սրահին մէջ, Լիբանանի հայոց առաջնորդ Նարեկ արքեպիսկոպոս հանդիպում մը ունեցաւ Հայ եկեղեցւոյ հոգեւոր խմբակներու ներկայացուցիչներուն հետ: Մասնակցող խմբակներն էին` Հայ առաքելական եկեղեցասիրաց եղբայրակցութիւնը (Կեդրոն), Հայ եկեղեցասէր հոգեւոր միութիւնը, Հայ առաքելական եկեղեցւոյ եղբայրակցութիւնը եւ «Լուսաւորչի կանթեղ» համայնքը:

Հանդիպման սկիզբը Ղեւոնդ քհնյ. Լոշխաճեան շնորհակալութեան խօսք ուղղեց սրբազան հօր այս հրաւէրին համար եւ ներկայացուց հոգեւոր խմբակներու գործունէութիւնը:

Այս առիթով Նարեկ արքեպիսկոպոս հաստատեց, որ հայ եկեղեցին հայ ժողովուրդի զաւակներուն ամբողջութիւնն է` համախմբուած Քրիստոսի անունով եւ Աստուծոյ առաքելութիւնը ապրելու ու տարածելու կոչումով: Առաջնորդ սրբազանը գնահատեց գործող հոգեւոր խմբակներուն կապուածութիւնը հայ եկեղեցւոյ` շեշտելով, որ գործակցութեամբ եւ միացեալ ճիգերով մեր հայ քրիստոնէական հաւատքը կ՛ամրապնդուի եւ ազգանուէր աշխատանքները առաւել եւս կ՛արդիւնաւորուին:

Առաջնորդ սրբազանը յայտնեց, որ Ղեւոնդ քհնյ. Լոշխաճեանը հոգեւոր խմբակներու խորհրդատու նշանակած է` անհրաժեշտ համակարգումները կատարելու համար: Նարեկ արքեպիսկոպոս նշեց, որ յառաջիկայ շաբաթներուն պիտի այցելէ հոգեւոր խմբակներու աղօթավայրերը` մօտէն ծանօթանալու իւրաքանչիւր խմբակի գործունէութեան:

Սրբազան հայրը լսեց հոգեւոր խմբակներու ներկայացուցիչներուն մտահոգութիւններն ու առաջարկները` հաստատելով, որ յառաջիկային նմանօրինակ հանդիպումներ տարբեր առիթներով եւս պիտի կրկնուին:

Ներկաները որոշեցին առաջնորդ սրբազան հօր օրհնութեամբ կանոնաւոր յաճախականութեամբ հաւաքական աղօթքի պահեր ունենալ եկեղեցիներուն մէջ եւ 2020-ի ամառը միօրեայ համագումար կազմակերպել` Արամ Ա. վեհափառ հայրապետի հռչակած «Յատուկ խնամքի կարօտ հայորդիներու տարուան» նիւթին շուրջ:

Հանդիպումը փակուեցաւ «Տէրունական աղօթք»-ով:

LEAVE A REPLY

Please enter your comment!
Please enter your name here