Սաատ Հարիրի. «Ես Թեկնածու Պիտի Չըլլամ Յաջորդ Կառավարութեան Կազմութեան»

0
405

Նոր վարչապետի նշանակման վերաբերեալ այսօր նախագահական պալատին մէջ տեղի ունենալիք երեսփոխանական պարտադիր խորհրդակցութիւններու նախօրեակին, հրաժարեալ վարչապետ Սաատ Հարիրի երէկ հրապարակեց հաղորդագրութիւն մը, որուն մէջ վերահաստատեց, որ ինք չ՛ուզեր գլխաւորել նոր կազմուելիք կառավարութիւնը: Հաղորդագրութեան մէջ մասնաւորապէս նշուեցաւ.

«Ընդառաջելով լիբանանցիներու պոռթկումին` 50 օր առաջ ներկայացուցի հրաժարականս եւ այդ օրէն իսկ ճիգ թափեցի կազմելու ժողովուրդին պահանջած մասնագէտներէ բաղկացած կառավարութիւնը, որովհետեւ նկատեցի, որ ատիկա միակն է, որ կրնայ լուծել Լիբանանի դիմագրաւած տնտեսական եւ ընկերային վտանգաւոր տագնապը:

Եւ երբ պարզուեցաւ, որ հակառակ մասնագէտներէ բաղկացած կառավարութիւն կազմելու իմ յանձնառութեանս` նախորդ քանի մը օրերուն արտայայտուած դիրքորոշումները իմ նշանակումիս գծով փոփոխութեան ենթակայ չեն, ես կը յայտարարեմ, որ թեկնածու պիտի չըլլամ կազմելու յաջորդ կառավարութիւնը: Եւ ես վաղը պիտի մասնակցիմ երեսփոխանական պարտադիր խորհրդակցութիւններուն այս հիման վրայ` պնդելով, որ անոնք ոչ մէկ պատրուակով չյետաձգուին: Վաղը առտու պիտի հրաւիրեմ Մուսթաքպալ հոսանքի երեսփոխանական պլոքի ժողովի, որպէսզի ճշդուի պլոքին կեցուածքը նշանակումի հարցով»:

Յայտնենք, որ այսօրուան երեսփոխանական պարտադիր խորհրդակցութիւններուն գծով կը տիրէ բաւական անորոշ մթնոլորտ, սակայն երէկ երեկոյեան յայտնի դարձաւ, որ Ազատագրում եւ բարգաւաճում, Հաւատարմութիւն դիմադրութեան, Ազգային ազատ հոսանքի եւ Ազգային համախմբում պլոքներու երեսփոխանները այսօր կ՛ուղղուին առաջադրելու կրթութեան նախկին նախարար Հասսան Տիապի անունը` վարչապետի պաշտօնը ստանձնելու համար:

LEAVE A REPLY

Please enter your comment!
Please enter your name here