Բակօ Սահակեանը Մասնակցած Է Շարք Մը Զինուորական Ու Թիկունքային Նշանակութեան Նորակառոյց Շինութիւններու Բացման Հանդիսաւոր Արարողութիւններու

0
307

12 յունուարին Արցախի Հանրապետութեան նախագահ Բակօ Սահակեանը, հանրապետութեան պաշտպանութեան նախարար զօր. Կարէն Աբրահամեանի ընկերակցութեամբ, աշխատանքային շրջապտոյտով եղած է հիւսիսարեւելեան եւ կեդրոնական ուղղութեամբ գործող շարք մը զօրամասերու մէջ, մասնակցած զինուորական ու թիկունքային նշանակութեան նորակառոյց շինութիւններու բացման հանդիսաւոր արարողութիւններու. կը յայտնէ պաշտպանութեան բանակի պաշտօնական կայքը:

Շահառու զօրամասերու զինուորները 2019-ին իրականացած շինարարական աշխատանքներու արդիւնքով ապահովուած են նորակառոյց եւ արդի բոլոր չափորոշիչներուն համապատասխանող զօրանոցներով, որոնց մէջ, բացի կենցաղային ու ծառայողական պայմաններէն, լուծուած են նաեւ անվտանգութեան եւ մարտական պատրաստականութեան առնչուող յարակից խնդիրները:

Նշուած զօրամասերուն մէջ շահագործման յանձնուած են նաեւ թեքնիք սպասարկման ու բժշկական կէտեր, լցակայան եւ այլ կառոյցներ: Զօր. Կարէն Աբրահամեան վստահեցուցած է, որ 2020-ին եւս պաշտպանութեան բանակին մէջ իրականացուող շինարարական աշխատանքները պիտի գտնուին համապատասխան ստորաբաժանումներու մնայուն վերահսկողութեան ներքեւ եւ միտուած պիտի ըլլան զինուորներու համար ծառայողական ու կենցաղային ամէնէն բարձր մակարդակի պայմաններ ապահովելուն:

Աշխատանքային շրջապտոյտի ընթացքին հանրապետութեան նախագահը նաեւ շարք մը յանձնարարականներ տուած է զինուորականներուն եւ շինարարական կազմակերպութիւններու ներկայացուցիչներուն` հետագայ աշխատանքները աւելի բարձր մակարդակով իրականացնելու համար:

LEAVE A REPLY

Please enter your comment!
Please enter your name here