«Յատուկ Խնամքի Կարօտ Հայորդիներու Տարի» Հռչակագիրը Կը Կարդացուի Կաթողիկոսութեանս Բոլոր Եկեղեցիներուն Մէջ

0
365

Մեծի Տանն Կիլիկիոյ Արամ Ա. կաթողիկոսը 2020 տարին հռչակեց «Յատուկ խնամքի կարօտ հայորդիներու տարի», իսկ հայրապետին պատգամը Անթիլիասի մայրավանքի Ս. Գրիգոր Լուսաւորիչ մայր տաճարին մէջ կարդաց Մակար եպս. Աշգարեան, կիրակի, 12 յունուար 2020-ին, յընթացս պատարագին: Սրբատառ կոնդակը կարդացուեցաւ նաեւ կաթողիկոսութեանս թեմերու եկեղեցիներուն մէջ:

Կոնդակին մէջ նորին սրբութիւնը հիմնականօրէն կ՛անդրադառնայ յատուկ խնամքի կարօտ եզրի սահմանումին` ընդգծելով, որ ոմանք ի ծնէ կամ հետագային` արկածի պատճառով, կրնան ունենալ ֆիզիքական, մտային կամ հոգեկան որոշ տարբերութիւններ, որոնք մասնաւոր հոգածութեան կը կարօտին: Հայրապետը կը նշէ, որ ինչպէս որեւէ ժողովուրդի, մեր ժողովուրդի կեանքին ալ մաս կը կազմեն յատուկ խնամքի կարօտեալներ, որոնց թիւը հետզհետէ աճ կ՛արձանագրէ` ընկերատնտեսական, առողջապահական եւ այլ ազդակներու պատճառով, ու կ՛աւելցնէ, որ անոնք ընկերութեան անբաժանելի մասնիկն են:

Հռչակագիրին մէջ հայրապետը կը խօսի նաեւ հայ կեանքին մէջ յատուկ խնամքի կարօտ հայորդիներուն ներկայութեան մասին ու կը թելադրէ հրաժարիլ խտրութիւն կամ անտեսում ցուցաբերելէ անոնց հանդէպ, ինչպէս նաեւ կը յորդորէ միջոցներ եւ առիթներ ստեղծել անոնց համար, որպէսզի անոնք եւս մեր ընկերութեան մէջ ներառուին նոյնիսկ մեր կազմակերպութիւններուն, կառոյցներուն եւ զանազան յանձնախումբերու մէջ` ի հարկին պատասխանատուութիւն վերցնելով:

Եզրափակելով` վեհափառ հայրապետը կը խօսի եկեղեցւոյ, Հայաստանի պետութեան ու մեր կազմակերպութիւններուն դերակատարութեան մասին եւ կոչ կ՛ուղղէ ժողովուրդին, որ իր աղօթքներուն ու մտածումներուն մէջ յիշէ յատուկ խնամքի կարօտ հայորդիներն ու խորացնէ անոնց նկատմամբ սէրն ու գուրգուրանքը, հոգեւոր, պետական, ազգային. կոչ կ՛ուղղէ բարեսիրական կազմակերպութիւններուն, որ առաւելագոյն չափով օգտակար հանդիսանան անոնց մասնագիտական, ընկերային կամ տնտեսական մակարդակներու վրայ, թեմերու առաջնորդներուն, որ գործնապէս օգտակար դառնան անոնց, եւ վերջապէս` ունեւոր ազգայիններուն, որ նիւթական կարելիութենէն բաժին մը յատկացնեն` յատուկ հիմնադրամներ հաստատելով անոնց համար:

LEAVE A REPLY

Please enter your comment!
Please enter your name here