«Մասրահ Մատինա»-ի Մէջ. «Գասպար Իփէկեան» Թատերախումբը Արաբերէնով Կը Ներկայացնէ «Չմօտենա՛ք Ինծի, Տիկի՛ն» Թատերախաղը

0
2528

Համազգայինի «Գասպար Իփէկեան» թատերախումբը` Յակոբ Տէր Ղուկասեանի բեմադրութեամբ, երեքշաբթի, 28 եւ չորեքշաբթի, 29 յունուարին, կը ներկայացնէ Հայկ Յակոբեանի «Չմօտենա՛ք ինծի, տիկի՛ն» թատրերգութիւնը` արաբերէնով: Երկու դերասաններ` Սենտի Ղազարեանն ու Նժդեհ Մկրտիչեանը, Համրայի «Մասրահ Մատինա»-ի բեմին վրայ պիտի արծարծեն անձնասպանութեան նիւթը: Մկրտիչեանի կերպարը մուտք գործելով պատահական տուն մը պիտի փորձէ վերջ տալ իր դժբախտ կեանքին, սակայն ճակատագիրը զինք դէմ յանդիման դնելով Ղազարեանի կերպարին հետ` նոր ծալքեր պիտի բացուին, ու նիւթը զարգացում պիտի ստանայ զաւեշտական եւ կատակերգական դարձուածքներով:

Նշենք, որ սոյն ներկայացումը կը կայանայ «Մասրահ Մատինա»-ի կազմակերպութեամբ` «Մասրահ ֆի զաման իսթիսնա՛ի» (Թատրոն` աննախընթաց ժամանակներու ընթացքին) ծրագիրին շրջագիծին մէջ: Նկատի ունենալով երկրին քաղաքական եւ ընկերային-տնտեսական կացութիւնը, «Մասրահ Մատինա» այս նախաձեռնութեամբ իր դռները կը բանայ գեղարուեստի բոլոր ճիւղերուն առջեւ (դեկտեմբեր 2019-յունուար 2020) ու խորհրդանշական գումարով (10.000 լ.ո., իսկ աշակերտութեան` 5.000 լ.ո.) ջանք կը թափէ կենդանի պահելու արուեստի ու ստեղծագործութեան ոգին լիբանանցի ժողովուրդին մէջ:

Տոմսերը ապահովելու համար հեռաձայնել whatsapp-ի 03-799472 թիւին, կամ զանոնք ստանալ ելոյթի օրերը` կիշէէն:

LEAVE A REPLY

Please enter your comment!
Please enter your name here