Հասսան Տիապ Նախագահեց Տնտեսական-Ելեւմտական Մարզերուն Յատուկ Նիստի Մը

0
357

Վարչապետ Հասսան Տիապ երէկ վարչապետարանին մէջ նախագահեց տնտեսական-ելեւմտական մարզերուն յատուկ նիստի մը, որուն ընթացքին շեշտեց, որ Լիբանանի ներկայ իրավիճակը տեսութիւններ եւ փորձեր չի հանդուրժեր, հետեւաբար պէտք է ունենալ գիտական եւ իրապաշտ տեսլական, որուն ընդմէջէն կարելի ըլլայ լուծել երկրին դիմագրաւած տնտեսական տագնապը:

Նիստին ներկայ գտնուեցան վարչական բարեկարգումի նախարար Տըմիանոս Քաթթար, ելեւմուտքի նախարար Ղազի Ուազնի, տնտեսութեան եւ առեւտուրի նախարար Ռաուլ Նեհմէ, ճարտարարուեստի նախարար Իմատ Հուպալլա, նախարարաց խորհուրդի ընդհանուր քարտուղար, դատաւոր Մահմուտ Մաքքիէ, որոնց միացան նաեւ Կեդրոնական դրամատան կառավարիչ Ռիատ Սալամէ, Դրամատուներու միութեան նախագահ Սելիմ Սֆէյր եւ Տնտեսական- ընկերային խորհուրդի նախագահ Շարլ Արպիտ:

Վարչապետ Տիապ հաստատեց, որ Լիբանանի տնտեսական իրավիճակին մէջ այն սեւ պատկերը, որ կը ներկայացուի մեզի եւ ժողովուրդին, անճիշդ է եւ ոչ հաւաստի` աւելցնելով սակայն, որ անիկա չի նշանակեր, որ երկրին տնտեսական տագնապը կարելի պիտի ըլլայ դիւրաւ լուծել:

Նիստին ընթացքին Տիապ շեշտեց, որ աշխատանքային այս նիստին նպատակն է մատը զետեղել տնտեսական եւ ելեւմտական վէրքերուն վրայ` աւելցնելով, որ այս աշխատանքը պիտի ամբողջացնէ կառավարութեան մշակած աշխատանքային ծրագիրը` նկատի ունենալով, որ այդ ծրագիրը հիմնականին մէջ պէտք է տնտեսական բնոյթ ունենայ եւ տնտեսական տագնապին լուծումներ կարենայ ապահովել:

Վարչապետ Տիապ նշեց, որ կառավարութեան աշխատանքային ծրագիրը մշակող նախարարական յանձնախումբը սպառիչ կերպով կը գործէ` աւելցնելով, որ ներկայ պայմանները չեն արտօներ, որ ժամավաճառ ըլլանք: «Բարձր կը գնահատեմ նախարարական յանձնախումբին աշխատանքը, ինչպէս նաեւ նախարարներուն ջանքերը` հասնելու համար մեր նպատակին», ըսաւ ան:

Միւս կողմէ, Տիապ ընդունեց Լիբանանցի կիներու ազգային խորհուրդի նախագահ Քլոտին Աուն-Ռուքոզը, որ շնորհաւորեց վարչապետը եւ յաջողութիւն մաղթեց անոր:

Քլոտին Աուն-Ռուքոզ բարձր գնահատեց կառավարութեան մէջ վեց կին նախարար նշանակելու վարչապետին քայլը` հաստատելով, որ այդպիսով Լիբանան առաջին անգամ ըլլալով գործադրեց կառավարութեան մէջ իգական սեռը 30 առ հարիւր մասնաբաժինով ներկայացնելու սկզբունքը:

Հանդիպումին ընթացքին քննարկուեցաւ նաեւ կառավարութեան աշխատանքային ծրագիրին մէջ կիներու իրաւունքներուն յատուկ բաժին մը նկատի ունենալու կարեւորութիւնը` երկու սեռերուն միջեւ հաւասարութեան, ինչպէս նաեւ կնոջ, խաղաղութեան ու ապահովութեան մասին ՄԱԿ-ի թիւ 1325 բանաձեւի գործադրութեան շրջագիծին մէջ` նկատի ունենալով, որ Լիբանան սկսած է գործադրել այդ ծրագիրը:

LEAVE A REPLY

Please enter your comment!
Please enter your name here