ՄԻԵԴը Հաստատեց Սարիբէկեանի Մահուան Հարցին Մէջ Ատրպէյճանի Իշխանութիւններուն Մեղաւորութիւնը

0
547

ԵՐԵՒԱՆ, «Փանորամա».- 30 Յունուարին, Մարդու իրաւունքներու եւրոպական դատարանին տուած վճիռով՝ Ատրպէյճանի իշխանութիւնները պատասխանատու նկատուեցան Մանուէլ Սարիբէկեանի մահուան համար: Մասնաւորապէս՝ հաստատուեցաւ, որ տեղի ունեցած է ուխտին 2-րդ (կեանքի իրաւունք) եւ 3-րդ (խոշտանգումներու արգիլում) յօդուածներու խախտում:

Ըստ դատարանին՝ Մանուէլ Սարիբէկեան մահացած է այլոց կողմէ, մասնաւորաբար Պաքուի ռազմական ոստիկանութեան վարչութեան աշխատակիցներուն կողմէ գործադրուած բռնութեան իբրեւ արդիւնք: Ընդունելի չնկատուեցաւ ատրպէյճանական իշխանութիւններուն բացատրութիւնը, որ Սարիբէկեան կախուած է:

Տուժողին իրաւայաջորդներուն Ատրպէյճան պիտի վճարէ 60.000 եուրօ եւ 2200 եուրօ՝ դատական ծախսերուն համար:

Նշենք, թէ հայցը ՄԻԵԴ-ին ներկայացուցած էին ծնողները՝ Մամիկոն Սարիբէկեան ու Սիրանոյշ Բալեան:

Յիշեցնենք, որ Թթուջուր գիւղի բնակիչ, 20-ամեայ Մանուէլ Սարիբէկեան 11 Սեպտեմբեր 2010-ին եղանակային վատ պայմաններու պատճառով մոլորուած եւ յայտնուած էր Ատրպէյճանի մէջ, ապա տեղափոխուած էր Պաքու, ուր 5 Հոկտեմբերին մահացած էր բանտախուցին մէջ:

LEAVE A REPLY

Please enter your comment!
Please enter your name here