Թրամփի Ճառը Երկրին Մասնատումը Աւելիով Ամրապնդեց

0
538

ՈՒԱՇԻՆԿԹԸՆ, «Ինտիփենտընթ», «Պի.Պի.Սի.».- 4 Փետրուարի երեկոյեան, Միացեալ Նահանգներու նախագահ Տոնալտ Թրամփ Քոնկրեսին առջեւ տուած իր «Միութեան վիճակը» տարեկան ելոյթին ընթացքին, որ մօտաւորապէս մէկ ու կէս ժամ տեւեց, լուսարձակի տակ առաւ իր իրական եւ երեւակայական իրագործումները, դարձեալ դատապարտելով (միայն) ներգաղթողներու ոճիրները եւ խոստանալով զանոնք երկրէն դուրս պահել իր «գեղեցիկ պատը» կառուցելով։

Ան նաեւ իրենց վերագրեց առողջապահութեան մարզին մէջ այն բարեկարգումը, որ ապահովագրական ընկերութիւններուն կը պարտադրէ չմերժել արդէն հիւանդ քաղաքացիներուն դիմումները, մինչ այդ պայմանը տարիներէ ի վեր ի զօրու է եւ մաս կը կազմէր նախորդ նախագահ Պարաք Օպամայի իրականացուցած առողջապահութեան մարզի յատկանշական բարեկարգումին՝ «Օպամաքեր» անունով մկրտուած ծրագիրին, որուն դէմ պայքարած է եւ կը շարունակեն պայքարիլ Թրամփ եւ անոր վարչակազմը։ Ան նաեւ պնդեց, թէ երկրին տնտեսութիւնը իր լաւագոյն վիճակին մէջ է ներկայիս, մինչ թէ՛ նախագահ Պիլ Քլինթընի եւ թէ նապագահ Օպամային օրերուն տնտեսական աճը Թրամփի օրերուն արձանագրուած 2-3 տոկոսէն շատ աւելին եղած էին (4-5,5), իսկ 1950-ականներուն եւ 60-ականներուն նոյնիսկ անոնցմէ աւելին էր։

Նախագահական Ազատութեան շքանշանը շնորհեց իր ազգայնամոլ եւ պահպանողական կեցուածքներով երկիրը մասնատելուն մէջ կարեւոր դերակատարութիւն ունեցած հաղորդավար Ռաշ Լիմպաուին, քայլ մը, որ խստօրէն քննադատուեցաւ անոր ընդդիմախօսներուն կողմէ։

Ելոյթին ընթացքին, Ֆլորիտայի վարժարաններէն մէկուն մէջ 2018-ին իր 14-ամեայ դուստրը հրազէնային յարձակումի մը ընթացքին կորսնցուցած հայր մը բողոքի իր ձայնը բարձրացուց, երբ Թրամփ խոստացաւ պաշտպանել հրազէն կրելու իրաւունքը. ենթական սրահէն դուրս բերուեցաւ։

Աւարտին, Թրամփը սահմանադրութիւնը խախտելու յանցանքներով ամբաստանած Ներկայացուցիչներու տան խօսնակ Նենսի Փելոսի ցուցադրականօրէն պատռեց Թրամփի ճառին իրեն յանձնուած օրինակը, իր արարքը նկատելով նման ելոյթի մը հետ վարուելու «ամենաքաղաքավար» ձեւը։ Թրամփ խստօրէն դատապարտեց Փելոսիի այս քայլը։

Յատկանշական է, որ Թրամփ մերժած էր Փելոսիի հետ ձեռնուիլ, նշեալ թուղթերը յանձնելուն ընթացքին։

Շարք մը դեմոկրատ քոնկրեսականեր ներկայ չեղան ելոյթին, իսկ ուրիշներ դուրս եկան անոր ընթացքին՝ շեշտելով, որ անյարմար կը նկատեն սահմանադրութիւնը ոտնակոխող նախագահի մը ճառախօսութեան ներկայ գտնուիլը։

LEAVE A REPLY

Please enter your comment!
Please enter your name here