Պաշտպանութեան Գերագոյն Խորհուրդը Որոշեց Ապահովական Կայունութիւնը Պաշտպանել Եւ Պետութեան Հեղինակութիւնը Ու Հաստատութիւնները Հարուածող Որեւէ Փորձ Հակակշիռի Տակ Առնել

0
303

Հանրապետութեան նախագահ զօր. Միշել Աուն երէկ կէսօրէ առաջ Պաապտայի մէջ նախագահեց Պաշտպանութեան գերագոյն խորհուրդի նիստին, որուն ներկայ գտնուեցան վարչապետ Հասսան Տիապ, պաշտպանութեան նախարար Զէյնա Աքր, արտաքին գործոց նախարար Նասիֆ Հըթթի, ելեւմուտքի նախարար Ղազի Ուազնի, ներքին գործոց նախարար Մոհամետ Ֆահմի, տնտեսութեան եւ առեւտուրի նախարար Ռաուլ Նեհմէ, արդարութեան նախարար Մարի Քլոտ Նաժըմ, բանակի հրամանատար զօր. Ժոզեֆ Աուն, Ընդհանուր ապահովութեան ընդհանուր տնօրէն հազարապետ-զօրավար Ապպաս Իպրահիմ, Ներքին ապահովութեան ուժերու ընդհանուր տնօրէն հազարապետ-զօրավար Իմատ Օսման, Պետական անվտանգութեան ընդհանուր տնօրէն հազարապետ-զօրավար Անթուան Սալիպա, Պաշտպանութեան գերագոյն խորհուրդի ընդհանուր քարտուղար հազարապետ-զօրավար Մահմուտ Ասմար, ընդհանուր դատախազ Ղասսան Օուէյտաթ, Ներքին ապահովութեան ուժերու տեղեկահաւաքի բաժանմունքի նախագահ գնդապետ-զօրավար Խալետ Համմուտ, հանրապետութեան նախագահութեան ընդհանուր տնօրէն Անթուան Շքէյր եւ նախագահ Աունի ապահովական եւ զինուորական խորհրդատու գնդապետ-զօրավար Պուլոս Մաթար:

Նիստին ընթացքին նախագահ Աուն շեշտեց Լիբանանի ապահովական կայունութիւնը եւ քաղաքացիական անվտանգութիւնը պաշտպանելու կարեւորութիւնը, ինչպէս նաեւ ընդգծեց, որ պետութեան հեղինակութիւնն ու պետական կառոյցները հարուածող որեւէ փորձ հակակշիռի տակ պիտի առնուի:

Նիստէն ետք Պաշտպանութեան գերագոյն խորհուրդի ընդհանուր քարտուղար հազարապետ-զօրավար Մահմուտ Ասմար յայտնեց, որ վարչապետ Տիապ իր կարգին ընդգծած է զինուորական եւ ապահովական տարբեր կառոյցներուն միջեւ աշխատանքն ու գործակցութիւնը համադրելու կարեւորութիւնը` երկրին մէջ ապահովական կայունութիւնը ամրապնդելու առումով:

Պաշտպանութեան գերագոյն խորհուրդին որոշումները կը մնան գաղտնի` օրէնքին համաձայն:

LEAVE A REPLY

Please enter your comment!
Please enter your name here