Թէեւ Խորհրդարանը Այսօր Պիտի Սկսի Քննարկել Կառավարութեան Աշխատանքային Ծրագիրը, Սակայն Քաղաքական Ուժեր Արդէն Ճշդած Են Իրենց Շնորհելիք Վստահութեան Քուէի Պատկերը

0
248

Թէեւ խորհրդարանը այսօր պիտի սկսի քննարկել կառավարութեան աշխատանքային ծրագիրը, սակայն քաղաքական ուժեր արդէն իսկ ճշդած են իրենց շնորհելիք վստահութեան քուէի պատկերը:

Կառավարութեան ծրագիրի քննարկումները պիտի շարունակուին նաեւ վաղը:

Այս առիթով բանակը երէկ հրապարակեց հաղորդագրութիւն մը, որուն մէջ նշուեցաւ, թէ բանակը խորհրդարանին շրջակայքը որդեգրած է ապահովական խիստ միջոցառումներ Կեդրոնական Պէյրութի, Սայֆիի, Պըրժ Մըրի, Մոնրօ պանդոկի, Պըրժ Ղազալէի, ինչպէս նաեւ Ալենպի փողոցին վրայ:

Բանակը կոչ ուղղեց քաղաքացիներուն` հետեւելու որդեգրուած միջոցառումներուն եւ ճամբաները փակելու նախաձեռնութիւններուն վերջ տալու` պահպանելու համար երկրին ապահովական կայունութիւնը:

Հաղորդագրութեան մէջ ընդգծուեցաւ նաեւ հրապարակներուն վրայ ցոյցեր կատարելու քաղաքացիին արդար իրաւունքը:

Միւս կողմէ, ժողովրդային շարժումի ներկայացուցիչներ կոչեր ուղղեցին` առաւօտեան կանուխ ժամերէն ճամբաները փակելու, ինչպէս նաեւ մեծաթիւ ներկայութիւն ըլլալու իրենց հրաւիրած ցոյցերուն:

Անկախ այս բոլորէն, սակայն, կարգ մը քաղաքական ուժեր արդէն իսկ յայտարարեցին կառավարութեան շնորհուելիք վստահութեան քուէին մասին իրենց կեցուածքները:

Մուսթաքպալ պլոքը գումարեց նիստ մը, որուն ընթացքին հաստատեց, որ պլոքը պիտի մասնակցի խորհրդարանի նիստին, բայց իր վստահութեան քուէն պիտի չշնորհէ կառավարութեան:

Լիբանանեան ուժեր կուսակցութիւնը շեշտեց, որ Հզօր հանրապետութիւն պլոքը պիտի մասնակցի կառավարութեան աշխատանքային ծրագիրը քննարկելու խորհրդարանի նիստին, սակայն կառավարութեան պիտի չշնորհէ իր վստահութեան քուէն:

Փաղանգաւոր կուսակցութեան ղեկավար, երեսփոխան Սամի Ժեմայէլ շեշտեց, որ իրենք կառավարութեան վստահութեան քուէ պիտի չշնորհեն, որովհետեւ անիկա հիմնուած է նախորդ կառավարութիւններուն ծրագիրներուն վրայ:

Ղովմի կուսակցութեան պլոքը հաստատեց խորհրդարանի նիստին չմասնակցելու եւ կառավարութեան վստահութեան քուէ չշնորհելու իր որոշումը:

Անկախ կեդրոն պլոքը որոշեց չմասնակցիլ խորհրդարանի նիստին եւ իր վստահութեան քուէն չշնորհել կառավարութեան:

Երեսփոխան Նաամաթ Աֆրամ շեշտեց, որ ինք պոյքոթի պիտի ենթարկէ կառավարութեան վստահութեան քուէ շնորհելու խորհրդարանի նիստին իր մասնակցութիւնը` աւելցնելով, որ նախարարաց խորհուրդին պատրաստած աշխատանքային ծրագիրը Լիբանանի դիմագրաւած մարտահրաւէրներուն չի համապատասխաներ:

Երեսփոխան Նուհատ Մաշնուք հաստատեց, որ ինք կը մերժէ իր վստահութեան քուէն շնորհել կառավարութեան մը, որ Ժըպրան Պասիլը կը ներկայացնէ:

Նասըրական շարժումի նախագահ երեսփոխան Ուսամա Սաատ երէկ հրաւիրեց մամլոյ ասուլիսի մը, որուն ընթացքին շեշտեց, որ ինք կը մերժէ երկիրը քանդումի առաջնորդներու կողմէ կառավարուող նախարարաց խորհուրդին շնորհել իր վստահութեան քուէն:

Մարատա հոսանքի ղեկավար Սլէյման Ֆրենժիէ շեշտեց, որ իրենք կառավարութեան վստահութեան քուէ պիտի շնորհեն` մեկնելով քաղաքականութեան մէջ անոր ներկայացուցչութենէն, եւ ոչ թէ ելեկտրականութեան համակարգին համար առաջարկուած ծրագիրէն:

Հակառակ այս բոլոր կեցուածքներուն, խորհրդարանի փոխնախագահ Էլի Ֆըրզլի հաստատեց, որ կառավարութիւնը իր ներկայացնելիք աշխատանքային ծրագիրով պիտի ստանայ խորհրդարանին վստահութեան քուէն:

LEAVE A REPLY

Please enter your comment!
Please enter your name here