Ռուսիա Վճռորոշ Դեր Ունեցած Է Ապրիլեան Պատերազմի Դադրեցման Մէջ. Մոսկուա

0
277

ՍՏԵՓԱՆԱԿԵՐՏ, «Արցախփրէս».- Ռուսիա վճռորոշ դերակատարութիւն ունեցած է 2016-ի Ապրիլին տեղի ունեցած լայնածաւալ մարտական գործողութիւնները դադրեցնելու ջանքերուն մէջ, Երեքշաբթի, 11 Փետրուարին յայտարարեց Ռուսիոյ արտաքին գործոց փոխնախարար Անտրէյ Ռուտենքօ՝ «Ռուսիան Այսօր» լրատու գործակալութեան հետ ունեցած հարցազրոյցի մը ընթացքին։

Ըստ «Թերթ»ին՝ փոխնախարարը աւելցուց ըսելով. «Ռուսիա միշտ աշխոյժ միջնորդական դեր ունեցած է Ղարաբաղի հակամարտութեան կարգաւորման գործին մէջ: Այս ձգձգուած հակամարտութեան կարգաւորման գործին մէջ կողմերուն աջակցիլը մեր արտաքին քաղաքականութեան անվերապահ առաջնահերթութիւններէն է»:

Ռուս պաշտօնատարը նշեց, որ Արցախի հիմնահարցը կը շարունակէ գտնուիլ Ռուսիոյ նախագահին եւ արտաքին գործոց նախարարին ուշադրութեան կեդրոնին:

Ան յիշեցուց, որ Ռուսիոյ անմիջական աջակցութեամբ ստորագրուած փաստաթուղթերուն մէջ է 1994-ին կնքուած Հրադադարի մասին համաձայնագիրը, որ մինչեւ այսօր հրադադարի հիմքը կը հանդիսանայ:

«Մեր երկրին միջնորդական ջանքերու ճամբուն վրայ կարեւոր փուլ էր՝ ընդունումը 2008ի Մոսկուայի հռչակագիրին, որուն մէջ կը խօսի Լեռնային Ղարաբաղի հակամարտութեան քաղաքական կարգաւորման մասին: Այս առաջին եւ առայժմ միակ փաստաթուղթն է Լեռնային Ղարաբաղի հակամարտութեան կարգաւորման վերաբերեալ, որուն տակ կան Հայաստանի եւ Ատրպէյճանի առաջնորդներու ստորագրութիւնները: Ինչպէս գիտէք, Ռուսիա որոշիչ դեր խաղցաւ 2016-ի լայնամաշտապ ռազմական գործողութիւնները դադրեցնելու գործին մէջ՝ Ատրպէյճանի եւ Հայաստանի սպայակոյտներուն պետերը Մոսկուա հրաւիրելով», եզրակացուց Անտրէյ Ռուտենքօ:

LEAVE A REPLY

Please enter your comment!
Please enter your name here