Հայաստան Համահայկական Հիմնադրամի Դրամահաւաքին Գումարը Անցած Է 11 Միլիոն Տոլարը

0
50

ԵՐԵՒԱՆ.- 14 Փետրուար թուակիր հաղորդագրութեամբ, Հայաստան Համահայկական հիմնադրամը կը տեղեկացնէ, թէ անցեալ տարուան պատկեասփռուած դրամահաւաքէն (հեռուստամարաթոն) գրեթէ երեք ամիս ետք կը շարունակուի նուիրատուութիւններու հոսքը, որուն իբրեւ արդիւնք արդէն իսկ հաւաքուած գումարը հասած է 11.155.985 տոլարի։

«2019-ի Դեկտեմբերի սկիզբը նուիրատուութիւնները աւելցած են 920.138 տոլարով: Խոստումներուն մեծ մասը արդէն իսկ փոխանցուած է հիմնադրամին եւ ցանցի տեղական մարմիններու հաշիւներուն:

«Այս տարի աննախադէպ թիւով մարդիկ մասնակցեցան համահայկական դրամահաւաքին. միայն Հայաստանէն եւ Արցախէն շուրջ 10.000 անհատներ եւ կազմակերպութիւններ մասնակցութիւն բերած են: Եթէ նկատի առնենք, որ ներգրաւուած կազմակերպութիւնները քանի անձեր կը ներկայացնեն, մասնակցողներուն թիւը շատ աւելին է: Սփիւռքի մասնակցութիւնը, մօտաւոր գնահատականներով շուրջ 25.000 է: Ըստ հիմնադրամին նոր ռազմավարութեան՝ ընդգծուած կարեւորութիւն կը տրուի մասնակցութեան, ուրեմն այս տարուան արձանագրուած ցուցանիշը առանձնապէս ոգեւորիչ է: Շնորհակալ ենք հիմնադրամին բոլոր նուիրատուներուն: Միասնական ջանքերով է, որ կը կերտենք աւելի ուժեղ հայրենիք:

«Միայն առցանց նուիրատուութիւններով՝ հիմնադրամին ցանցը արդէն ունի շուրջ 5000 առցանց նուիրատուններ (որոնցմէ 1550-ը Լոս Անճելըսի տեղական մարմինին կայքով), որոնք միասին մէկ տարուան մէջ կը գոյացնեն 560.000 տոլար: Անկէ 1938-ը միացած են պարբերական վճարման համակարգին (#Մէկբաժակսուրճ):

«#ArmeniaFundChallenge-ին միացած էին շարք մը հանրային գործիչներ Հայաստանէն եւ Սփիւռքէն: Անոնց մէջ էին՝ Հայաստանի վարչապետը, խորհրդարանի նախագահը եւ փոխնագահները, Սերժ Թանքեան, Ալեքսիս Օհանեան, Էրիք Էսրաելեան, Վահէ Պէրպէրեան, Իվետա Մուկուչեան, Խորէն Լեւոնեան եւ այլք: «Ես իմ անուշ Հայաստանի. կենարար արեւ ու ջուր համայնքներուն» կարգախօսին հաւատարիմ՝ հաւաքուած գումարները հիմնականօրէն պիտի յատկացուին խմելու ջուրի հասանելիութեան եւ արեւային վահանակներու տեղադրման՝ Արցախի եւ Հայաստանի որոշ համայնքներու մէջ», կը գրէ հիմնադրամը:

Հայաստան Համահայկական հիմնադրամին առաքելութիւնը համահայկական ցանցային համակարգի ձեւաւորումն է, որուն նպատակը Հայաստանի, Արցախի, ինչպէս նաեւ աշխարհասփիւռ հայկական համայնքներու համաչափ, կայուն եւ փոխկապակցուած զարգացման ապահովումն է՝ հիմնուելով ընդհանուր ինքնութեան վրայ:

LEAVE A REPLY

Please enter your comment!
Please enter your name here