Վարչապետ Տիապ. «Կառավարութիւնը Լիբանանի Ապագայի Պատկերը Կերտող Կարեւոր Որոշում Մը Պիտի Տայ»

0
242
Newly-assigned Lebanese Prime Minister, Hassan Diab, speaks to journalists after his meeting with Lebanese President Michel Aoun at the presidential palace, in Baabda, east of Beirut, Lebanon, Thursday, Dec. 19, 2019. Aoun named Diab as prime minister after a day of consultations with lawmakers in which he gained a simple majority of the 128-member parliament. Sixty-nine lawmakers, including the parliamentary bloc of the Shiite Hezbollah and Amal movements as well as lawmakers affiliated with President Michel Aoun gave him their votes. (AP Photo/Hussein Malla)

Վարչապետ Հասսան Տիապ երէկ առաւօտեան վարչապետարանին մէջ ընդունեց Լիբանանի հիւպատոսական անձնակազմը` նախագահութեամբ պատուոյ հիւպատոս Ժոզեֆ Հապիսի:

Հանդիպումին ընթացքին Հապիս յայտնեց, որ իրենք վստահութիւն ունին կառավարութեան վրայ` հաստատելով, որ լիբանանցի բոլոր պատասխանատուներուն միջեւ գործակցութեամբ է, որ Լիբանան դէպի ապահով ափ պիտի հասնի:

Ան յոյս յայտնեց, որ Լիբանանի մէջ փոփոխութեան ժամանակը հասած ըլլայ, եւ Լիբանան իր անցեալի դաժան օրերուն չվերադառնայ:

Հապիս մաղթեց, որ կառավարութիւնը պայքարի փտածութեան եւ մսխումին դէմ, ինչպէս նաեւ ամբողջական լուծում ապահովէ ելեկտրականութեան տագնապին:

Հիւպատոսական անձնակազմին անունով ան յաջողութիւն մաղթեց Տիապի կառավարութեան:

Իր կարգին, վարչապետ Տիապ շեշտեց, որ կառավարութիւնը որոշած է կրակէ գնդակը գրկել իր ձեռքերով` փորձելով մեղմացնել անոր բոցը: «Ճիշդ է, որ անոր հուրը հրկիզած է թացն ու չորը, սակայն կը փորձենք պաշտպանել հողը եւ չարտօնել, որ այդ կրակով հրկիզուի նաեւ անիկա: Կառավարութիւնը յառաջիկայ օրերուն պիտի տայ անկիւնադարձային որոշում մը, որ պիտի ըլլայ նուրբ եւ զգայուն: Սակայն անիկա լաւ սերտուած պիտի ըլլայ եւ` Լիբանանի ապագայի պատկերը կերտող կարեւոր որոշում մը», հաստատեց ան:

Վարչապետ Տիապ նշեց, որ ամենայն անկեղծութեամբ կը յայտնէ, թէ պետութիւնը իր ներկայ վիճակով չի կրնար լիբանանցիները պաշտպանել եւ անոնց արժանապատիւ կեանք ապահովել: «Ամենայն թափանցիկութեամբ կը յայտնեմ, թէ լիբանանեան պետութիւնը կորսնցուցած է լիբանանցիներուն վստահութիւնը: Բայց եւ այնպէս, այս կառավարութիւնը քաջ գիտէ, թէ ինք ծանր բեռ վերցուցած է, եւ թէ իր ստանձնած պարտականութիւնը բարդ է: Սակայն մենք վճռակամ ենք այդ բարդութիւնները կազմաքանդելու, եւ յառաջիկայ օրերը պիտի վկայեն այդ մասին», հաստատեց վարչապետ Տիապ:

Ան շեշտեց, որ Լիբանան այս փուլին կարիքը ունի ամէն ջանքի եւ միտքի, ճակտի քրտինքի իւրաքանչիւր կաթիլի: «Պատմութիւնը պիտի գրէ այն բոլորին մասին, որոնք փտածութեան պատերը պիտի քանդեն եւ վստահութեան կամուրջներ պիտի կառուցեն` լիբանանցիներուն վերադարձնելով յոյսը եւ նպաստելով փրկութեան աշխատանքին», ընդգծեց ան:

Վարչապետ Տիապ. «Եուրոպոնտ»-ի Թղթածրարին Լուծումը Յառաջիկայ Ուրբաթ Կամ Շաբաթ Օր Կարելի Պիտի Ըլլայ Որոշել»

Երեսփոխան Ժամիլ Սէյիտ երէկ յայտնեց, որ Կեդրոնական դրամատունը 71 միլիոն տոլար վճարած է «Եուրոպոնտ»-ի թղթածրարին իբրեւ մուրհակ, իսկ նախարարները կը հերքեն, թէ այդ մասին տեղեակ են:

«Կեդրոնական դրամատան կառավարիչ Ռիատ Սալամէ այս մասին լուռ կը մնայ եւ նկատել կու տայ, որ ելեւմուտքի նախարարը համաձայն է, իսկ վճարումը կատարուած է «Քորոնա» ժահրին լոյսին տակ: Ռիատ Սալամէ ամերիկացիներուն զօրակցութիւնը կը վայելէ եւ ան գործակից է փտածներուն ու լիբանանեան պետութեան մէջ արձանագրուած փտածութեան, ինչպէս նաեւ կը ծածկէ ու կը հովանաւորէ փտածները», ըսաւ Սէյիտ:

Միւս կողմէ, Կեդրոնական դրամատան կառավարիչ Ռիատ Սալամէ հաստատեց, որ լիբանանեան պետութեան անունով պահ դրուած ոսկիին մարդ չի կրնար դպչիլ` աւելցնելով, որ ինք ոչ մէկ որոշում կրնայ տալ «Եուրոպոնտ»-ի թղթածրարին առումով:

«Եուրոպոնտ»-ի թղթածրարին առնչութեամբ միա՛յն կառավարութիւնը կրնայ որոշում տալ», ըսաւ ան:

Նշենք, որ վարչապետ Հասսան Տիապ երեկոյեան յայտարարեց, որ «Եուրոպոնտ»-ի թղթածրարին լուծման գծով յառաջիկայ ուրբաթ կամ շաբաթ օր կարելի պիտի ըլլայ որոշում տալ: Ան նշեց, որ այդ որոշումը պիտի պահպանէ փոքր եւ միջակ դասակարգի գումար ունեցողները, ինչպէս նաեւ` Լիբանանի շահերը:

LEAVE A REPLY

Please enter your comment!
Please enter your name here