Հակառակորդի Նախայարձակ Գործողութենէն Տուժած Զինուորները Հատուցում Պիտի Ստանան

0
369

ԵՐԵՒԱՆ, «Արմէնփրէս».- Հայաստանի Ազգային ժողովը առաջին ընթերցումով ընդունեց կառավարութեան կողմէ ներկայացուած օրէնքի նախագիծը, որ կ՛առաջարկէ ընդլայնել «Զինծառայողների ապահովագրութեան հիմնադրամ»էն օգտուողներուն շրջանակը, հատուցում տրամադրել նաեւ այն զինուորներուն, որոնց կեանքը կամ առողջութիւնը վնաս կրած է հակառակորդի նախայարձակ գործողութիւններէն։

«Հայաստանի Հանրապետութեան պաշտպանութեան ժամանակ զինծառայողների կեանքին կամ առողջութեանը պատճառուած վնասներու հատուցման մասին» Հայաստանի Հանրապետութեան օրէնքով փոփոխութիւն եւ լրացում կատարելու վերաբերեալ օրինագիծը Ազգային ժողովի նիստին ներկայացուց Հայաստանի պաշտպանութեան փոխնախարար Գաբրիէլ Պալայեան:

Նախագիծով կ՛առաջարկուի, որ հիմնադրամի շահառու հանդիսանան ոչ միայն այն զինուորները, որոնք ուղղակիօրէն մարտական գործողութիւններու, մարտական հերթապահութեան կամ յատուկ առաջադրանք կատարելու ատեն նահատակուած են կամ վիրաւորուած, այլ նաեւ անոնք, որոնք անմիջականօրէն շփման գիծին վրայ եղած ատեն հակառակորդի նախայարձակ գործողութիւններուն հետեւանքով կորսնցուցած են իրենց կեանքը կամ առողջութիւնը: Այսինքն, եթէ բանակայինը վնասուածքը ստացած է հակառակորդին կողմէ նախաձեռնած գործողութեան պատճառով եւ եղած է առաջին կամ երկրորդ կարգի հաշմանդամ պիտի ներառուի շահառուներու ցանկին վրայ եւ հատուցում պիտի ստանայ: Ան պիտի ներառուի շահառուներու ցանկին վրայ անկախ այն բանէն, թէ վնասը ստացած է մարտական հերթապահութեան ժամանակ, յատուկ առաջադրանք կատարելու ատեն կամ ոչ:

Նախագիծը ընդունուեցաւ 114 կողմ ձայներով:

LEAVE A REPLY

Please enter your comment!
Please enter your name here