Վարչապետը Որոշած Է, Թէ Որո՛նք Պիտի Ըլլան ԱԱԾի Տնօրէնը Եւ Ոստիկանապետը

0
549

ԵՐԵՒԱՆ, «Արմէնփրէս».- 19 Մարտին, Հայաստանի վարչապետ Նիկոլ Փաշինեան պիտի յայտարարէ Հայաստանի Ազգային անվտանգութեան ծառայութեան (ԱԱԾ) տնօրէն եւ ոստիկանութեան պետ նշանակելու որոշման մասին։ Հայաստանի Ազգային ժողովի նիստին կառավարութեան անդամներուն հետ հարցում-պատասխանի բաժինին ընթացքին այս հաստատումը կատարեց ի՛նք՝ Փաշինեան:

Ազգային ժողովի անկախ պատգամաւոր Արման Բաբաջանեան նկատել տուաւ, որ 19 Մարտին կ՛աւարտի ԱԱԾի տնօրէնին եւ ոստիկանապետին ժամանակաւոր պաշտօնատարներու լիազօրութիւններուն՝ օրէնքով սահմանուած 6ամսեայ ժամկէտը եւ հետաքրքրուեցաւ, որ արդեօք վարչապետը որոշում ունի՞, մտադի՞ր է վերանշանակել Հայաստանի ոստիկանապետը եւ ԱԱԾի տնօրէնի ժամանակաւոր պաշտօնակատարները ու խնդրեց գնահատել այդ պաշտօնակատարներուն աշխատանքը: Վարչապետը ըսաւ, որ որոշումը առած է եւ պիտի հրապարակէ 19 Մարտին։

Անդրադառնալով երկու մարմիններուն աշխատանքին՝ Նիկոլ Փաշինեան ըսաւ, որ իրաւապահ համակարգին մէջ ընդհանրապէս հարցեր կան եւ այդ հարցերը պէտք է համակարգուած ձեւով լուծել: «Բայց ես այս պրոբլեմների (հարցերու-Խմբ.) ամբողջ պատասխանատուութիւնը, բնականաբար, չեմ դնի ոստիկանապետի պաշտօնակատարին ու ԱԱԾի տնօրէնի պաշտօնակատարի վրայ: Ես այդ երկու թեմաները կը տարանջատէի, ընդ որում, ամբողջ պետական կառավարման համակարգում խնդիր ունենք», ըսաւ ան ու նշեց, թէ ցարդ հարցերը չեն լուծուած, որովհետեւ ճիշդ ախտորոշում չէ կատարուած։

Հարցում ուղղեց նաեւ «Լուսաւոր Հայաստան» խմբակցութեան ղեկավար Էտմոն Մարուքեան՝ նկատել տալով, թէ տեղեկութիւններ կան, որ ներկայիս կառավարութեան անդամները ծրարով գումար կը ստանան:

«Այնպէս չէ, որ այդպիսի տեղեկութիւններ կան միայն ձեր մատնանշած շրջանակի մարդկանց մասին: Ես չէի ուզում այդքան բացել այդ թեման, բայց այդպիսի տեղեկութիւններ կան նաեւ նախկին նախարարների մասին, որոնք հիմա Ազգային ժողովի պատգամաւոր են: Ես այդ նախկին նախարարներին չեմ կանչել, հարցրել՝ տեղեկութիւնը ճիշդ է, թէ ոչ, որովհետեւ այդ հարցով զբաղուելու համար կան մարմիններ», ըսաւ Փաշինեան:

Հայաստանի վարչապետը իրաւապահ մարմիններուն յանձնարարեց զբաղիլ այդ տեղեկութիւններով:

LEAVE A REPLY

Please enter your comment!
Please enter your name here