Ահազա՛նգ Փարիզի քաղաքապետութեան՝ Ռաշիտա Տաթիի թեկնածութեան առնչութեամբ

0
391

ՖՐԱՆՍԱ – Քաղաքապետական ընտրութիւններ

15  եւ  22 Մարտին Ֆրանսայի մէջ տեղի ունենալիք քաղաքապետական ընտրութիւններուն՝ Փարիզի մէջ քաղաքապետի թեկնածու է Արդարադատութեան նախկին նախարարուհի, Հանրապետականներ կուսակցութեան (LR) ցանկը գլխաւորող Ռաշիտա Տաթի, որ ծանօթ է Ազէրպայճանի բռնատիրական վարչակարգին հետ իր որքան սերտ, այնքան ալ մութ յարաբերութիւններով։

Այս թեկնածութիւնը սկսած է հետզհետէ աւելի իր վրայ կեդրոնացնել ուշադրութիւնները։ Նախ զուտ ֆրանսական դիտանկիւնէն, այն պատճառով՝ որ Տաթի ըստ երեւոյթին կը շարունակէ յառաջընթաց արձանագրել եւ գրեթէ բոլոր հարցախոյզերը,– եթէ նոյնիսկ բոլորս ալ գիտենք, որ խիստ վերապահութեամբ պէտք է վերաբերիլ անոնց արդիւնքներուն,– զայն յաղթական ցոյց կու տան ընդդէմ իր գլխաւոր մրցակցին՝ հայանպաստ իր դիրքորոշումներով ծանօթ ներկայի քաղաքապետուհի Անն Հիտալկոյի։ Եւ յետոյ, աւելի նեղ առումով՝ հայկական դիտանկիւնէն, Տաթիի՝ Ազէրպայճանի հետ նման կապեր ունենալու հանգամանքը լուրջ մտահոգութիւն կը պատճառէ՝ Փարիզի ապագայ քաղաքապետութեան ընդհանրապէս Հայութեան եւ ի մասնաւորի՝ Հայաստանի ու Արցախի հետ յարաբերութիւններու տեսանկիւնէն։

Այս մասին, նշանաւոր «Marianne» շաբաթաթերթի առցանց հարթակին վրայ հրապարակուած յօդուածով ահազանգ կը հնչեցնեն CCAF-ի համանախագահներ Մուրատ Փափազեան եւ Արա Թորանեան, ինչպէս նաեւ Իլ-տը-Ֆրանսի Նահանգային խորհուրդի փոխնախագահ Փաթրիք Քարամ:

Յօդուածին մէջ եւս կը նշուի, որ Տաթի ծանօթ է բռնատիրական Ազէրպայճանի իշխանութեան հետ իր սերտ կապերով ու կ՚ընդգծուի, թէ ան անդամ է այդ երկրի բարեկամներու ընկերակցութեան, որ կը համարուի Ֆրանսայի մէջ «խաւիարային դիւանագիտութեան» գլխաւոր գործիքը:

«Հա՞րկ է յիշեցնել. տիկին Տաթի, որ Պաքուի կը յայտարարէ իր զօրակցութիւնը, դէմ արտայայտուած է 2017-ին Եւրոպայի խորհուրդին մէջ հետաքննութեան` եւրոպացի քաղաքական գործիչներու վրայ Ազէրպայճանի կողմէ ապօրէն միջոցներով ճնշում գործադրելու հարցով», նշուած է յօդուածին մէջ:

Ալիեւի վարչակարգին հետ իր մտերմութեան մասին Տաթի արտայայտուած է դեռ 2011-ին, Ազէրպայճանի առաջին տիկին Մեհրիպան Ալիեւայի ի պատիւ իր կազմակերպած մեծ խնջոյքի ընթացքին: Փարիզի քաղաքապետի թեկնածուն յատկապէս 2016 Ապրիլին Ազէրպայճանի կողմէ սանձազերծուած պատերազմէն ետք ալ հանդէս եկած էր Լեռնային Ղարաբաղի մէջ բնակող Հայերուն դէմ յայտարարութիւններով:

Յօդուածին հեղինակները յոյս կը յայտնեն, որ Տաթի վերջ կու տայ Ազէրպայճանի իշխանութիւններուն հետ իր յարաբերութիւններուն։

Փարիզի քաղաքապետութեան թեկնածու երրորդ անունն է Ֆրանսայի Առողջապահութեան նախկին նախարարուհի Անիէս Պիւզին. անոր թեկնածութիւնը առաջադրած է նախագահ Մաքրոնի LREM կուսակցութիւնը:

Մեր յաջորդ թիւով կ՚անդրադառնանք Ֆրանսայի Հայ դատի յանձնախումբի թելադրած թեկնածուներուն։ ■

ՆՈՐ ՅԱՌԱՋ

 

LEAVE A REPLY

Please enter your comment!
Please enter your name here