Գերագոյն հոգեւոր խորհուրդը աւարտած է իր աշխատանքը

0
459
ՍՈՒՐԲ ԷՋՄԻԱԾԻՆ
3-էն 6 Մարտի միջեւ, նախագահութեամբ Գարեգին Բ. Ամենայն Հայոց կաթողիկոսի եւ ատենապետութեամբ Պոլսոյ Հայոց պատրիարք Սահակ արք. Մաշալեանի, Մայր Աթոռ Սուրբ Էջմիածնի մէջ տեղի ունեցած է Գերագոյն հոգեւոր խորհուրդի (ԳՀԽ) ընդլայնուած կազմով ժողովը:
Չորսօրեայ ժողովի նիստերը վարած են Արեւմտեան Եւրոպայի Հայրապետական պատուիրակ եւ Վատիկանի մէջ Մայր Աթոռ Սուրբ Էջմիածնի ներկայացուցիչ Խաժակ արք. Պարսամեան եւ ԱՄՆ-ու Հայոց Արեւմտեան թեմի առաջնորդ Յովնան արք. Տէրտէրեան: Ժողովի տարբեր նիստերուն մասնակցելու հրաւիրուած են Հայկական Բարեգործական Ընդհանուր Միութեան նախագահ Պերճ Սեդրակեան եւ ՀՀ վարչապետի աշխատակազմի Սփիւռքի գործերու գլխաւոր յանձնակատար Զարեհ Սինանեան: Ժողովին ներկայ եղած է նաեւ ԱՄՆ-ու Հայոց Արեւելեան թեմի առաջնորդ Դանիէլ եպիսկ. Ֆընտըգեան:
Սահակ արք. Մաշալեան Գերագոյն հոգեւոր խորհուրդին տեղեկութիւններ հաղորդած է Պոլսոյ Հայոց պատրիարքութեան վերջին զարգացումներուն, առկայ մարտահրաւէրներուն մասին: ԳՀԽ-ի անդամները Սահակ Բ. պատրիարքին յղած են իրենց շնորհաւորանքները ընտրութեան կապակցութեամբ եւ մաղթած՝ քաջառողջ ու արդիւնաւէտ երկար գահակալութիւն:
Ժողովին անդրադարձ կատարուած է Մայր տաճարի հիմնական նորոգութեան եւ ամրացման հարցերուն: Կատարուած աշխատանքներուն մասին անհրաժեշտ լուսաբանութիւններ տուած են Մայր Աթոռի վարչատնտեսական բաժնի տնօրէն Մուշեղ եպիսկ. Բաբայեան եւ վերականգնման նախագծի գլխաւոր ճարտարապետ Ամիրան Բադիշեան: ԳՀԽ-ի անդամները ծանօթացած են տաճարի վերականգնման ժամանակ ի յայտ եկած խնդիրներուն, որոնք կը կարօտին նոր ուսումնասիրութիւններու եւ լրացուցիչ աշխատանքներու: Տեղեկացուած է, որ՝ նկատի ունենալով վերականգնման եւ բարեկարգման աշխատանքներու ընդհանուր ծաւալը եւ յառաջացած նոր խնդիրները՝ Մայր տաճարի հիմնական նորոգութեան աշխատանքները կարելի կ՚ըլլայ իրենց աւարտին հասցնել 2021 թուականին:
Գերագոյն հոգեւոր խորհուրդը լսած է նաեւ Մայր տաճարի հիմնական նորոգման համար յայտարարուած համահայկական հանգանակութեան, անհրաժեշտ միջոցներու հաւաքի գործընթացին եւ այդ նպատակով կազմակերպուած այցելութիւններուն մասին հանգանակութեան կազմակերպման աշխատանքային յանձնախումբի ատենապետ Յովնան արք. Տէրտէրեանի զեկոյցը:
Ժողովականները գնահատանքով ողջունած են Միածնաէջ տաճարի հիմնական նորոգութեան եւ պահպանութեան, ինչպէս նաեւ համազգային հանգանակութեան կազմակերպման ուղղուած բոլոր պատասխանատուներու ջանքերը:
Ժողովի օրակարգին մէջ կարեւոր տեղ գրաւած են Մայր Աթոռ Սուրբ Էջմիածնի մէջ գումարուելիք Ազգային-եկեղեցական ժողովի (ԱԵԺ) կազմակերպական աշխատանքներուն վերաբերող հարցերը:
Ազգային-եկեղեցական ժողովի կազմակերպման ընթացքին մասին զեկոյց ներկայացուցած է ԱԵԺ կազմակերպիչ յանձնախումբի ատենապետ Արշակ եպիսկ. Խաչատրեան: Ժողովականները լսած են նաեւ ԱԵԺ-ի օրակարգային նիւթերու նախապատրաստման նպատակով ստեղծուած եօթը յանձնախումբերու զեկոյցները: Յանձնախումբերու գործունէութեան եւ պատրաստուած փաստաթուղթերու վերաբերեալ զեկոյցներ ներկայացուցած են Կանոնադրութիւններու մշակման եւ Թեմական ու ծխական կեանքի կազմակերպման յանձնախումբերու համաատենապետ Յովնան արք. Տէրտէրեան, Հայց առաքելական եկեղեցւոյ կրթադաստիարակչական առաքելութեան յանձնախումբի ատենապետ Աբրահամ արք. Մկրտչեան, Ընկերային ծառայութեան յանձնախումբի ատենապետ Միքայէլ արք. Աջապահեան, Հայաստան-Սփիւռք կապերու ամրապնդման եւ ազգային ինքնութեան պահպանութեան գործին մէջ Հայց առաքելական եկեղեցւոյ առաքելութեան յանձնախումբի ատենապետ Վազգէն եպիսկ. Միրզախանեան, Հոգեւորականաց պատրաստութեան յանձնախումբի ատենապետ Եզնիկ արք. Պետրոսեան, Քրիստոնէական արժեհամակարգին յղուած մարտահրաւէրներու յանձնախումբի ատենապետ Բագրատ եպիսկոպոս Գալստանեան, Հայց առաքելական եկեղեցւոյ ֆինանսատնտեսական վիճակի բարելաւման յանձնախումբի ատենապետ Մուշեղ եպիսկ. Բաբայեան:
Գերագոյն հոգեւոր խորհուրդը, մանրակրկիտ քննարկելով ներկայացուած փաստաթուղթերը, գնահատանքով ողջունած է կատարուած աշխատանքը: Անհրաժեշտ թելադրութիւններէ յետոյ ժողո-
վականները յանձն առած են շարունակել փաստաթուղթերու հետագայ մշակումը: Այս գործընթացին մէջ Գերագոյն հոգեւոր խորհուրդը կարեւոր նկատած է յանձնախումբերու մշակած փաստաթուղթերուն՝ մասնագիտական եւ հանրային լրացուցիչ քննարկումներու կազմակերպումը՝ ԱԵԺ-ի յանձնախումբերու ներկայացուցիչներու մասնակցութեամբ, Հայաստանի եւ Սփիւռքի տարբեր թեմերու ու համայնքներու մէջ:
Մեկնելով յիշեալ փաստաթուղթերու մշակման անհրաժեշտութենէն, նաեւ նկատի առնելով՝ որ Մայր տաճարի շինարարական աշխատանքները պիտի աւարտին 2021-ին` Գերագոյն հոգեւոր խորհուրդը որոշած է յետաձգել Ազգային-եկեղեցական ժողովին գումարումը:
Պուլկարիոյ Հայոց թեմին մէջ տիրող կացութեան առնչութեամբ զեկոյց ներկայացուցած է Պուլկարիոյ Հայոց թեմի առաջնորդական տեղապահ Տաթեւ եպիսկ. Յակոբեան: Խնդրի քննարկման եւ հանգուցալուծման նպատակով Գերագոյն հոգեւոր խորհուրդը որոշած է յատուկ պատուիրակութիւն առաքել Պուլկարիա՝ անհրաժեշտ հանդիպումներ ունենալու եկեղեցական, պետական եւ համայնքային պատկան կառոյցներուն հետ։
Ժողովին նաեւ քննութեան առնուած է Մայր Աթոռ Սուրբ Էջմիածնի 2019 թուականի գործունէութեան տեղեկագիրը: Մայր Աթոռի դիւանապետ Արշակ եպիսկ. Խաչատրեան ներկայացուցած է հոգեւոր-վարչական գործունէութեան զեկոյցը: Լսուած են ֆինանսական եւ վերստուգիչ յանձնախումբի տարեկան հաշուետւութիւնները:
Քննարկուած են նաեւ Հայոց եկեղեցւոյ վարչական, կանոնական ու հովուական կեանքին, կրթական ու ընկերային առաքելութեան առնչուող այլ հարցեր: ■

 

LEAVE A REPLY

Please enter your comment!
Please enter your name here