Պուրճ Համուտի Քաղաքապետութիւն. Հաղորդագրութիւն

0
396

Երէկ Պուրճ Համուտի քաղաքապետ Մարտիկ Պօղոսեան հետեւեալ հաղորդագրութիւնը յղեց հանրութեան.

Երեքշաբթի, 10 մարտ 2020-ին «Ուաթսափ» ընկերային հաղորդակցութեան միջոցով շրջանառութեան մէջ դրուեցաւ լուր մը, որուն մէջ կ՛ըսուի, թէ Պուրճ Համուտի քաղաքապետարանի պաշտօնեաներէն մէկը վարակուած է նոր «Քորոնա» ժահրով եւ քաղաքապետարանի շէնքը հականեխումի ընթացքի մէջ է: Ձայնագրուած լուրը կը հաստատէ, որ քաղաքապետարանի պաշտօնեան, որ հոգեւորական մըն է, ենթարկուած է նոր «Քորոնա» ժահրի քննութեան, որուն արդիւնքը դրական եղած է:

Պուրճ Համուտի քաղաքապետութիւնը կը հերքէ վարակումի պարագային վերաբերեալ վերոյիշեալ տարաձայնութիւնը եւ զարմանք կը յայտնէ առանց որեւէ հիմնաւորումի այդ գծով կատարուած պնդումներուն առնչութեամբ: Այս գծով Պուրճ Համուտի քաղաքապետարանի պաշտօնեայ Ֆատի քհնյ. Նուման հրապարակեց ձայնագրութիւն մը`  հաստատելով իր առողջ ըլլալը:

Բոլորին սրտանց մաղթելով ամենայն բարիք եւ առողջութիւն` քաղաքացիներէն եւ բնակիչներէն կը խնդրենք խուսափիլ տարաձայնութիւններ տարածելէ ներկայ պայմաններուն մէջ, որովհետեւ անոնք անտեղի սարսափ կը յառաջացնեն, կը խոչընդոտեն վարչական աշխատանքը եւ կը բարդացնեն տնտեսական ու ապրուստի տագնապները:

Այսպիսի քայլերու պատճառած վնասներուն առաջքը առնելով` Պուրճ Համուտի քաղաքապետութիւնը կ՛ընդգծէ, որ երբեք պիտի չթերանայ այսպիսի քայլերը հետապնդելէ եւ անոնց հեղինակները օրինական պատասխանատուութեան ենթարկելէ:

Կը մնայ նշել, որ յիշեալ ձայնագրութեան մէջ կայ ճիշդ տեղեկութիւն մը, որ այն է, թէ ամէն օր, առաւօտեան եւ երեկոյեան, տեղի կ՛ունենայ քաղաքապետութեան շէնքի ամբողջական հականեխում` այլ կանխազգուշական եւ կանխարգելիչ միջոցառումներու կողքին պահպանելու համար պաշտօնեաներու եւ քաղաքացիներուն առողջութիւնը:

Ծանօթ.- Քաղաքապետութիւնը տեղեկութիւններ ստացաւ, թէ շրջանին մէջ սարսափ տարածող տարաձայնութիւնը ընդգրկող ձայնագրութեան հեղինակը Պուրճ Համուտի բնակիչ Փիեռ Քիուանն է:

ՊՈՒՐՃ ՀԱՄՈՒՏԻ ՔԱՂԱՔԱՊԵՏ
ՄԱՐՏԻԿ ՊՕՂՈՍԵԱՆ

LEAVE A REPLY

Please enter your comment!
Please enter your name here