ՄԱԿ-ի ՊՀԾն Հայաստանին Պիտի Տրամադրէ Թոքերու Արհեստական Օդափոխութեան Սարքեր

0
207

ԵՐԵՒԱՆ, «Արմէնփրէս».- Հանրապետութեան նախագահ Արմէն Սարգսեան 25 Մարտին ընդունեց ՄԱԿի Պարէնի համաշխարհային ծրագիրի հայաստանեան գրասենեակի ղեկավար եւ ՊՀԾ ներկայացուցիչ Ելենա Միլոշեւիչը:

Զրուցակիցները անդրադարձան այն երեւոյթին, որ Հայաստանի եւ ՄԱԿ-ի Պարէնի համաշխարհային ծրագիրին միջեւ հաստատուած է արդիւնաւէտ գործակցութիւն:

Աշխարհի մէջ «Քորոնա» ժահրի վարակին տարածման լոյսին տակ ստեղծուած իրավիճակին մէջ, զրուցակիցները առաջնահերթ նկատեցին պարէնի անվտանգութեան հարցերը: Նախագահ Սարգսեան այդ պարունակին մէջ շատ էական նկատեց Հայաստանը ուտելիքի անվտանգութեան ոլորտին մէջ տարածաշրջանային հանգոյց դարձնելու գործնական քայլերու իրականացումը՝ ընդգծելով, որ նախնական պայմանաւորուածութիւններ ունի շարք մը երկիրներու ղեկավարներուն եւ մասնագիտացած միջազգային կազմակերպութիւններուն հետ:

Նշելով, որ Պարէնի համաշխարհային ծրագիրը յայտնի է իբրեւ արտակարգ իրավիճակներուն առաջիններէն արձագանգող միջազգային կառոյց` նախագահ Սարգսեան առաջարկեց, բացի ուտելիքին վերաբերող հարցերէն, նկատի առնել նաեւ Հայաստանին բժշկական սարքաւորումներով ապահովելու կարելիութիւնը: Ելենա Միլոշեւիչ՝ ի պատասխան նախագահին առաջարկի, ըսաւ, որ դիմած են միջազգային նուիրատուներու եւ յառաջիկային Հայաստանին պիտի տրամադրուի մեծ քանակութեամբ թոքերու արհեստական օդափոխութեան սարքեր:

LEAVE A REPLY

Please enter your comment!
Please enter your name here