ԱԶԳԱՅԻՆ ՎԱՐԺԱՐԱՆՆԵՐՈՒ ԿՐԹԱԿԱՆ ՊԱՏԱՍԽԱՆԱՏՈՒՆԵՐՈՒ ՀԱՆԴԻՊՈՒՄ ԱՌԱՋՆՈՐԴՐԱՆԷՆ ՆԵՐՍ

0
194

Այսօր կէսօրին, Լիբանանի հայոց թեմի կաթողիկոսական փոխանորդ գերշ. Տ. Շահէ եպս. Փանոսեան ընկերակցութեամբ Ազգային վարչութեան ատենապետ պրն․ Ռաֆֆի Սիսլեանին եւ պրն. Ռաֆֆի Տէմիրճեանին, հանդիպում մը ունեցաւ Ազգային Եղիշէ Մանուկեան քոլեճի կրթական տնօրէն տիկին Անի Բագրատունիի եւ Ազգային միացեալ վարժարանի կրթական տնօրէն պրն․ Գրիգոր Էքմէճեանին հետ։

Հաւաքը կը միտէր լուսարձակի տակ առնել ճգնաժամային ներկայ պայմաններուն մէջ ազգային վարժարաններուն կողմէ տարուող կրթական հիմնական աշախատանքները,  թէկուզ եւ անոնք կը տարուին հեռուսուցման ճամբով ու կրթական պատասխանատուներուն կողմէ հեռաձայնային հետապնդումներով: Հաւաքին, երբ իւրաքանչիւր վարժարանի ներկայացուցիչ խտացեալ կերպով զեկուցեց հեռուսուցման ծրագիրներու միջոցաւ տարուող աշխատանքներուն մասին, ուրախութեամբ պարզուեցաւ, որ տնային արգելափակումի այս միջոցին եւ հակառակ տնտեսական ու ընկերային դժուարութիւններուն, մեր վարժարաններու կրթական մշակները առաւելագոյն չափով կը հետապնդեն իրենց աշխատանքները եւ հեռակայ հաղորդակցական միջոցներով աշխատանքի լծած են ամբողջ աշակերտութիւնը։ Կան մեր կամքէն անկախ թեքնիք դժուարութիւններ, որոնց համար Սրբազան հայրը շեշտեց, որ Ուսումնական խորհուրդին հետ միասին, կարելի է ապագային լուծել այդ հարցերը ու նաեւ համադրելով վարժարաններուն ճիգերը՝ կարելի է իրականացնել փորձառութիւններու փոխանակում ու մէկտեղում:

Աւարտին, Շահէ եպս. Փանոսեան մեծապէս գնահատեց ազգային վարժարաններու ուսուցիչներուն եւ կրթական պատասխանատուներուն աշխատանքը, հակառակ այն իրողութեան, որ համաճարակին ստեղծած արտասովոր տագնապին ու քաղաքական կեանքի ու տնտեսական պայմաններու յարուցած խոչընդոտներու դիմաց, կրթութեան գործին նուիրեալ մեր ուսուցիչները, իրենց կարելին կ՛ընծայեն, որպէսզի հայ աշակերտը չանջատուի ուսումնական կեանքէն ու չպարպուի կրթական մթնոլորտէն:

Սրբազանը նաեւ յոյս յայտնեց, որ ազգային վարժարաններու պատասխանատուներու ու ծնողներու համատեղ ճիգերով, կարելի կը դառնայ նաեւ յաղթահարել վարժարաններուն դիմագրաւած տնտեսական դժուարութիւնները եւ այս տագնապը շրջանցել նուազագոյն վնասներով:

 

ԴԻՒԱՆ ԱԶԳԱՅԻՆ ԱՌԱՋՆԵՐԴԱՐԱՆԻ

LEAVE A REPLY

Please enter your comment!
Please enter your name here