Լիբանանի Մէջ «Քորոնա» Ժահրով Վարակուածներուն Թիւը Կը Հասնի 548-ի, Մահերունը` 19-ի, Իսկ Բուժուածները` 60-ի

0
247
Արտերկրի Լիբանանցիներու Պէյրութ Փոխադրութեան
Բ. Փուլը Եւս Յաջողութեամբ Ընթացաւ

«Քորոնա» ժահրի տարածումը կանխարգիլելու իմաստով լիբանանեան պետութիւնը երէկ շարունակեց նոյն ընթացքով:

Երթեւեկի նոր օրէնքներուն գործադրութեան առումով շօշափելի էր քաղաքացիներուն կողմէ ցուցաբերուած յաւելեալ լրջութիւնն ու յանձնառութիւնը:

Առողջապահութեան նախարարութեան տեղեկութիւններուն համաձայն, երէկ Լիբանանի մէջ «Քորոնա» ժահրով վարակուածներուն թիւը հասաւ 548-ի` վերջին 24 ժամուան ընթացքին արձանագրելով 7 նոր վարակուածներ: Ըստ նախարարութեան, երէկ մահուան պարագայ չէ արձանագրուած:

Պէյրութի կառավարական հիւանդանոցին հրապարակած տեղեկագիրին համաձայն, հիւանդանոցի առողջական մեկուսարաններուն մէջ կը գտնուին 31 վարակուածներ, իսկ վարակումի 16 այլ պարագաներ այլ հիւանդանոցներէ հասած են Պէյրութի կառավարական հիւանդանոց:

Ըստ հիւանդանոցին հրապարակած տեղեկագիրին, 21 փետրուար 2020-էն ի վեր Լիբանանի մէջ «Քորոնա» ժահրէն բուժուած են 60 քաղաքացիներ:

Երեկոյեան ժամը 10:00-ին Սեն Ժորժ հիւանդանոցը յայտարարեց, որ իր մօտ արձանագրուած են 12 նոր վարակուածներ` աւելցնելով, որ Պշարրէի կառավարական հիւանդանոցէն իրենց դիմած են օժանդակելու համար «Փի. Սի. Ար.»-ի քննութիւններով, եւ հիւանդանոցը ընդառաջած է:

Ըստ այդ քննութիւններուն արդիւնքներուն, արձանագրուած են «Քորոնա» ժահրով 12 վարակուածներ:

Միւս կողմէ, արտաքին գործոց նախարարութեան եւ «Միտըլ Իսթ» օդանաւային ընկերութեան ջանքերով երէկ գործադրուեցաւ արտերկրի լիբանանցիներուն Լիբանան փոխադրութեան Բ. փուլը:

Առաջին օդանաւը հասաւ Ֆրանսայէն, երեկոյեան ժամը 5:45-ին: Փարիզէն եկած օդանաւուն մէջ գտնուող 121 ճամբորդները ենթարկուեցան «Փի. Սի. Ար.»-ի քննութեան եւ փոխադրուեցան «Լենքեսթըր փլազա» պանդոկ:

Արտերկրի լիբանանցիներուն դիմաւորումը եւ ապա պանդոկ փոխադրութիւնն ու սենեակներուն մէջ տեղաւորելու աշխատանքը ընթացաւ նոյն ձեւով եւ նոյն բծախնդրութեամբ:

Երեկոյեան շուրջ ժամը 8:00-ին Պէյրութ հասան Պոլիսէն եւ Մատրիտէն լիբանանցիներ փոխադրող օդանաւերը: Պոլիսէն հասած օդանաւուն մէջ կային աւելի քան 120 լիբանանցիներ, իսկ Մատրիտէն` 109 քաղաքացիներ:

Կը նախատեսուէր, որ ուշ գիշերին` ժամը 11:30-ին Լիբանան հասնի նաեւ Քինշասայի օդանաւը, որուն մէջ կային 127 լիբանանցիներ:

Լիբանան հասնող բոլոր քաղաքացիները ենթարկուեցան «Քորոնա» ժահրի ախտորոշման բժշկական քննութեան:

Առողջապահութեան նախարար Համատ Հասան եւ փոխադրութեան հարցերու նախարար Միշել Նաժժար երեկոյեան ժամը 6:00-ին ուղղուեցան Պէյրութի միջազգային օդակայան` հսկելու համար արտերկրի լիբանանցիները դիմաւորելու եւ զանոնք պէտք եղած քննութիւններուն ենթարկելու աշխատանքներուն:

Հասան յայտնեց, որ արտերկրի լիբանանցիները դիմաւորելու առումով գործադրուեցան այն դասաւորումները, որոնք կատարուած էին կիրակի օր: «Անշուշտ դիմաւորելու հոլովոյթը շատ աւելի հեզասահ էր` նկատի ունենալով կիրակի օրուան փորձառութիւնը, յատկապէս` քաղաքացիներուն միջեւ հեռաւորութիւնը պահելու առումով:

Հասան ընդգծեց, որ Պէյրութի միջազգային օդակայանին մէջ որդեգրուած դասաւորումները համաշխարհային են եւ օրինակելի:

«Այս բոլորը կը փաստեն, թէ Լիբանանի կառավարութիւնը միասնականութեամբ կը գործէ եւ ճիգ չի խնայեր, որ «Քորոնա» ժահրով վարակուածներուն թիւը նուազի: Պէտք է ի մտի ունենալ, որ ամբողջ աշխարհին մէջ «Փի. Սի. Ար.»-ի քննութիւն կը կատարուի միայն անոնց համար, որոնք «Քորոնա» ժահրով վարակուած ըլլալու ախտանիշներ ցոյց կու տան: Սակայն Լիբանանի մէջ, նկատի ունենալով տիրող արտակարգ պայմանները, մենք բոլորը կ’ենթարկենք «Փի. Սի. Ար.»-ի քննութեան», ըսաւ ան` աւելցնելով, որ երէկ արձանագրուած է վարակուած պարագայ մը այն օդանաւին մէջ, որ Լիբանան փոխադրած է նաւթի մարզին մէջ գործող պաշտօնեաները:

Հասան ընդգծեց, որ ոեւէ ճամբորդ, որուն «Փի. Սի. Ար.»-ի քննութեան արդիւնքը դրական է, պիտի ուղղուի Պէյրութի կառավարական հիւանդանոց, իսկ այդ օդանաւին վրայ գտնուող բոլոր ճամբորդները ստիպուած 14 օրուան բնակարանային մեկուսացման պէտք է եթարկուին:

Ան հաստատեց, որ Լիբանանի մէջ «Քորոնա» ժահրի տարածումին կանխարգիլման իմաստով պետութիւնը ամէն իմաստով կազմ ու պատրաստ է եւ այդպէս ալ պիտի շարունակէ գործել:

Միւս կողմէ, Հասան հարցազրոյցի մը ընթացքին յայտնեց, որ Լիբանան կրցած է հակակշիռի տակ առնել «Քորոնա» ժահրին տարածումը եւ կը նկատուի այն երկիրներուն շարքին, որոնք կրցած են տապալել «Քորոնա» համաճարակը:

Ան նշեց, որ 20 ապրիլէն ետք Լիբանանը պիտի չըլլայ այն, ինչ որ է այսօր: «Մեր ապագան փայլուն է, եւ կը խոստանամ, որ մօտիկ ապագային պիտի կարենանք յաղթանակ արձանագրել, եւ Չինաստանէն ետք Լիբանանը պիտի ըլլայ երկրորդ երկիրը, որ յաղթական դուրս պիտի գայ` «Քորոնա» ժահրին դէմ պայքարէն», ըսաւ ան:

Հասան շեշտեց, որ այս բոլորը չեն նշանակեր, թէ պէտք է վերջ տալ բնակարանային մեկուսացման եւ կառչած չմնալ ընդհանուր զօրաշարժին: «Յառաջիկայ 9 օրերուն լիբանանցիներուն կողմէ ընդհանուր զօրաշարժին յանձնառութիւնը առիթ պիտի տայ, որ յաղթենք այս համաճարակին», ըսաւ ան:

Նշենք նաեւ, որ Համատ Հասան երէկ առողջապահութեան նախարարութեան մէջ հանդիպում մը ունեցաւ խումբ մը կամաւորներու հետ, որոնք հետեւեցան բնակարանային մեկուսացման վարժանիստի մը` օժանդակելու համար տարեցներուն եւ անոնց, որոնք արհեստագիտութեան միջոցներուն ծանօթ չեն եւ զանոնք օգտագործել չեն գիտեր:

Նախարար Հասան բարձր գնահատեց կամաւորներուն աշխատանքն ու պատրաստակամութիւնը` ծառայելու ժողովուրդին: Ան նշեց, որ այս իրականութիւնը կը դրսեւորէ լիբանանցիներուն միասնականութիւնը, ինչպէս նաեւ կ’ընդգծէ քաղաքացիական ընկերութեան ճիգերուն կարեւորութիւնը, որ կ’ամբողջացնէ լիբանանեան պետութեան եւ տարբեր նախարարութիւններուն տարած աշխատանքը:

Իր կարգին Նաժժար նկատել տուաւ, որ արտերկրի լիբանանցիներուն Լիբանան փոխադրութիւնը հեզասահ կերպով ընթացած է իր Ա. փուլին մէջ, եւ աշխատանքը գնահատուած է իբրեւ լաւ:

Ան նկատել տուաւ, որ ինք ստուգած է օդակայանին մէջ որդեգրուած դասաւորումներն ու գումակային կարգաւորումը` ընդգծելով, որ նախարարութիւններուն միջեւ համագործակցութիւնը բացառիկ է:

Ան կոչ ուղղեց լիբանանցիներուն` զգուշանալու եւ հսկելու իրենց անձնական առողջութեան, որպէսզի կարելի ըլլայ վարակուածներուն թիւը հակակշիռի տակ պահել:

Նաժժար ընդգծեց, որ լիբանանեան պետութիւնը ամէն ջանք ի գործ կը դնէ` պաշտպանելու համար լիբանանեան ընկերութիւնը:

Միւս կողմէ, արտաքին գործոց եւ արտերկրի լիբանանցիներու հարցերու նախարար Նասիֆ Հըթթի յայտնեց, որ «Ուալիտ պըն Թալալ» բարեսիրական միութեան փոխնախագահ Լէյլա Սոլհ-Համատէի յայտարարած այն երեք թռիչքները, որոնք յատկացուած պիտի ըլլան Ֆրանսայէն, Իտալիայէն եւ Սպանիայէն ուսանողներ փոխադրելու, պիտի կատարուին յառաջիկայ շաբթուան ընթացքին: Ան աւելցուց, որ ադ երկիրներուն մէջ գտնուող լիբանանեան դեսպանատուները այդ իմաստով համապատասխան աշխատանք կը կատարեն:

Առողջապահութեան խորհրդարանական յանձնախումբի նախագահ, երեսփոխան Ասեմ Արաժի շեշտեց, որ այնքան ատեն որ «Քորոնա» համաճարակին սպառնալիքը գոյութիւն ունի, պէտք է զգուշանալ եւ ընդհանուր զօրաշարժը վերանորոգել:

Արաժի նկատել տուաւ, որ Լիբանանի մէջ «Փի. Սի. Ար.»-ի քննութիւնները պէտք է աւելնան` նկատել տալով, որ ինք այս իմաստով մօտիկ ապագային հանդիպում մը պիտի ունենայ առողջապահութեան նախարարին հետ:

LEAVE A REPLY

Please enter your comment!
Please enter your name here