«Քորոնա» Ժահրին Պատճառով Ինքնամեկուսացուած Է Արցախի Միրիկ Գիւղի Բնակչութիւնը

0
382

ԵՐԵՒԱՆ, «Սիվիլնեթ».- Արցախի Հանրապետութեան առողջապահութեան նախարարութեան տրամադրած տեղեկատուութեան համաձայն` Միրիկ գիւղի բնակիչի մը մօտ «Քորոնա» ժահրի հաստատման պատճառով, մեկուսացուած են անոր հետ հաւանական կապ ունեցած 20 քաղաքացիներ (ներառեալ անոր ընտանիքին անդամները)։ Ապահովութեան նկատառումներէ մեկնելով՝ մեկուսացուած են նաեւ գիւղի բնակիչները։

Արցախի տեղեկատուական շտապը յայտնեց, որ վարակուած քաղաքացիին առողջական վիճակը կը նկատուի կայուն, ներկայ դրութեամբ անհանգստացնող բան չկայ: Ինքնամեկուսացուած քաղաքացիներուն վերաբերեալ հաղորդուեցաւ, որ անոնցմէ ոեւէ մէկը վարակին յատուկ ախտանշաններ չունի, անոնց առողջական վիճակը շուրջօրեայ դրութեամբ կը հսկուի բժիշկներու կողմէ: «Համաճարակաբանութեան եւ հեգիենայի կենտրոն»ը Միրիկ գիւղի բնակիչներուն հականեխիչ նիւթեր եւ պարագաներ բաժնած է:

Շտապը նաեւ տեղեկացուց, որ վարակակիր քաղաքացին 31 Մարտին Արցախի մէջ մասնակցած է քուէարկութեան, սակայն կրած է դիմակ, ունեցած է անձնական գրիչ, գործածած է հականեխիչ հեղուկներ, իսկ այդ պահուն ջերմութիւն կամ որեւէ այլ ախտանշան չէ ունեցած:

Ընտրատեղամասերուն մէջ գտնուող քաղաքացիները, որոնց կարգին յանձնաժողովի անդամները, եղած են պաշտպանիչ դիմակներով եւ ձեռնոցներով:

«Ժամը 14:00-ի դրութեամբ, նախքան վերոնշեալ քաղաքացու մասնակցութիւնը քուէարկութեանը, գիւղում ընտրական իրաւունք ունեցող քաղաքացիներից 50ն արդէն քուէարկել էին. օրուայ երկրորդ կէսին մասնակցել է ընդամէնը 20 քաղաքացի, այդ թւում` հետագայում մեկուսացուած քաղաքացին: Օրուայ ընթացքում բոլոր քաղաքացիներն ու ընտրատեղամասում գտնուող անձինք եղել են պաշտպանիչ դիմակներով, ձեռնոցներով, անհատական գրչիներով` եւ օգտուել են ախտահանիչ հեղուկներից», նշուեցաւ հաղորդագրութեան մէջ։

Արցախի տեղեկատուական շտապը նաեւ դիտել տուաւ, որ «Քորոնա» ժահրի տարածման դէմ պայքարը կը շարունակուի պաշտպանութեան բանակի բոլոր զօրամասերուն մէջ։ Իրականացուող կանխարգելիչ եւ հակահամաճարակային գործընթացները կը գտնուին ինչպէս ռազմաբժշկական ծառայութեան, այնպէս ալ զօրամասերու հրամանատարութեան մնայուն վերահսկողութեան ներքոյ:

LEAVE A REPLY

Please enter your comment!
Please enter your name here