ՀԲԸՄ-ՀԵԸ-Ի ԸՆՏԱՆԻՔԸ ԿԸ ՍԳԱՅ ՀԱՆՐԱԾԱՆՕԹ ԲԱՐԵՐԱՐՈՒՀԻ ԱՐԹԵՄԻՍ ՆԱԶԱՐԵԱՆԻ ԿՈՐՈՒՍՏԸ

0
204

«Քորոնա» ժահրի  մոլեգնող արհաւիրքի օրերուն անդառնալի  կորուստ  կրեց նաեւ Նազարեան  ընտանիքը:  Չարաղէտ «Քորոնա» ժահրը  խլեց ՀԲԸՄ-ՀԵԸ-ի երախտաւոր, մարդասիրական  ծառայութիւններով  հանրածանօթ  բարերարուհի Արթեմիս Նազարեանը: Դէպքը պատահեցաւ  Հինգշաբթի, 9 Ապրիլ 2020-ին,Նիւ Ճըրսիի մէջ, Մ. Նահանգներ:

ՀԲԸՄ-ի  նախագահ  Պերճ Սեդրակեան, համայն  Հայկական Բարեգործական Ընդհանուր  Միութեան անունով  գուժեց Արթեմիս Նազարեանի մահը, նշելով, թէ  Արթեմիս Նազարեան,   իր  ամուսնոյն՝ ՀԲԸՄ-ի Կեդրոնական Մարմինի անդամ Նազար Նազարեանի  կողակիցը ըլլալով, բարեսիրական եւ  հայանպաստ բազմաթիւ  ծայառութիւններ մատուցած է  հայ ժողովուրդին՝ արտասահմանի եւ  հայրենիքի մէջ:

Արթեմիս Նազարեան(Թոփճեան) ծնած է 1932-ին, Հալէպ, Սուրիա: Փոքր տարիքէն Մ. Նահանգներ փոխադրուելով, կը վկայուի Պոսթընի համալսարանէն  եւ ընտանեկան բոյն կը կազմէ անուանի բարերար Նազար Նազարեանի հետ:

Անթիւ եւ անհամար է Արթեմիս  Նազարեանի բացառիկ աջակցութիւնը  հայ  Եկեղեցիին, հայկական կրթական,մշակութային, երիտասարդական, բժշկական կեդրոններուն: Շնորհիւ  անոր  անձնական  ճիգերուն, Լոս Անճելըսի մէջ  հիմնուեցաւ ՀԲԸՄ-ի Մանուկեան- Տեմիրճեան վարժարանի  «Արթեմիս Նազարեան» նախակրթարանը:

Արթեմիս  Նազարեանի  շիջումով  հայ  ժողովուրդը կը  կորսնցնէ ազգաշէն, տիպար հայուհի մը:

 

ՑԱՒԱԿՑՈՒԹԻՒՆ

Խոր  վիշտով   իմացանք անուանի բարերար, հասարակական  գործիչ Նազար Նազարեանի տիկնոջ՝ Արթեմիս  Նազարեանի մահուան գոյժը:

Յանուն  ՀԵԸ-ի  ընտանիքին, մեր խորազգած ցաւակցութիւնը  կը յայտնենք  Նազարեան  ընտանիքին, անոնց  հարազատներուն  ՀԲԸՄ-ի եւ ՀԵԸ-ի մեծ  ընտանիքներուն, յատկապէս ՀԲԸՄ-ի  նախագահ Պերճ Սեդրակեանին եւ տիկնոջ, ծանօթ ազգային Արթիւր Նազարեանին եւ զաւակներուն,  ՀԵԸ-ի Կեդրոնական  վարչութեան անդամ Կերի  Նազարեանին, մաղթելով  առողջութիւն, համբերութիւն եւ  ոգիի կորով:

Արթեմիս Նազարեան ազնիւ հայուհիին յիշատակը  միշտ  վառ  կը մնայ մեր մտքերուն եւ յիշողութեան մէջ:

Յիշատակն արդարոց  օրհնութեամբ եղիցի:

ՀԵԸ-Ի ԿԵԴՐՈՆԱԿԱՆ ՎԱՐՉՈՒԹԻՒՆ

LEAVE A REPLY

Please enter your comment!
Please enter your name here