Յովհաննէս Թումանեանի Հեքիաթները Արեւմտահայերէնով Կը Ներկայացուին Առցանց

0
1111

ԵՐԵՒԱՆ․- Հայաստանի Յովհաննէս Թումանեանի անուան թանգարանը առցանց հարթակի վրայ սկսած է հեքիաթներ ներկայացնել նաեւ արեւմտահայերէնով։

Թանգարանը առցանց հարթակի վրայ բազմաթիւ ու բազմաբովանդակ ծրագիրը կ՛իրականացնէ այցելուներու հետ կապը չկորսցնելու նպատակով։ Թանգարանը կը փորձէ իր ուշադրութեան կեդրոնին պահել ոչ միայն Հայաստանի, այլեւ Սփիւռքի մէջ բնակող հայրենակիցները։

«Սիրելի աշխարհասփիւռ հայեր` հայրեր, մայրեր, մեծ հայրեր ու մեծ մայրեր,

կ’ուզենք տեղեկացնել, որ այսուհետեւ ամէն շաբաթ օր դուք կրնաք միանալ մեր էջին եւ  ձեր պզտիկներուն արիթ ընծայել, որ արեւմտահայերէնով լսեն Յովհաննէս Թումանեանի հեքիաթները։ Արեւելահայերէնէ արեւմտահայերէնի վերածումը կը պարտինք Թումանեանի մօտիկ ընկերոջ՝ Լեւոն Շանթին։

Պիտի խնդրենք ուշադիր ըլլալ եւ օգնել պզտիկներուն, որ հաճոյքով կատարեն հեքիաթասացին թելադրութիւնները։ Սիրով կը սպասենք ձեր արձագանգին», կը յայտնեն «Ընտիր հեքիաթներ արեւմտահայերէն» նախաձեռնութեան մասին թանգարանի աշխատակիցները ։

Թանգարանի «Ֆէյսպուք»ի պաշտօնական էջին «Արի ծանօթանանք» կրթական ծրագրի բաժինին մէջ նաեւ ներկայացուցած է Թումանեանի մասին պատմող շարժանկարի արեւելահայերէն եւ արեւմտահայերէն տարբերակները:

Կայքէջին հասցէն է՝ www.facebook.com/AriTsanotananq։

Ինչպէս ամէն երկրի մէջ, Հայաստանի մէջ եւս «Քորոնա» ժահրին տարածումը կանխարգիլելու նպատակով՝ յետաձգուած կամ ջնջուած են բազմաթիւ զանգուածային ձեռնարկներ: Մշակութային հաստատութիւնները որոշ ժամանակով դադրեցուցած են իրենց գործունէութիւնը: Անոնցմէ շատերը կը փորձեն պահել կապը արուեստասէրներու հետ առցանց հարթակի վրայ:

LEAVE A REPLY

Please enter your comment!
Please enter your name here