Վարչապետ Տիապ. «Կարելի Չէ Բարեկարգումի Մասին Մտածել, Առանց Վերադառնալու Անոր Սկզբունքներուն»

0
200

Վարչապետ Հասսան Տիապ երէկ կէսօրին, ընկերակցութեամբ իր խորհրդական Խտըր Թալեպի, այցելեց նախկին վարչապետ Սելիմ Հըսի:

Հանդիպումէն ետք Տիապ ըսաւ. «Այս այցելութիւնը վերադարձ մըն է դէպի այն դպրոցը, որուն սկզբունքներուն հիման վրայ դաստիարակուած ենք: Հըս ո՛չ միայն Լիբանանի խիղճն է, այլ նաեւ պետութեան գաղափարը ներկայացնող խորագիրը: Կարելի չէ բարեկարգումի մասին մտածել, առանց վերադառնալու անոր սկզբունքներուն»:

Վարչապետ Տիապ հաստատեց, որ ինք խիստ կարիքը ունի տալու այնպիսի որոշումներ, որոնք ազգային խորք ունին եւ ոչ թէ համայնքային կամ յարանուանական:

Իր կարգին, Հըս դրուատեց կառավարութեան եւ առողջապահութեան նախարարութեան որդեգրած միջոցառումները` «Քորոնա» ժահրի դիմակայումին նպատակով:

Հըս բարձր գնահատեց կառավարութեան կողմէ արտերկրի լիբանանցիներուն տունդարձը կազմակերպելու եւ լաւագոյն կերպով գործադրելու աշխատանքը:

Միւս կողմէ, վարչապետ Տիապ նախագահեց Տնտեսական խորհուրդներուն եւ կարգ մը նախարարներու միջեւ գումարուած նիստին, որուն ընթացքին հաստատեց, որ «Եուրոպոնտ»-ի բաժնետոմսերու հարցով պէտք չէ մտահոգուիլ, երբ «Լազար» ընկերութեան ելեւմտական հարցերու խորհրդատուն բանակցութիւններու սկսի այդ բաժնետոմսերը կրողներուն հետ, որպէսզի կարելի ըլլայ Լիբանանի ունեցած նիւթական պարտաւորութիւնը վերադասաւորել:

Տիապ յայտնեց, որ իրենք «Հերքաթ»-ի մասին չէ որ կը խօսին, այլ` կ’ակնարկեն բաժնետոմսերը փոխարինելու մասին, «ինչպէս որ է պարագան աշխարհի բոլոր երկիրներուն մէջ: Ի վերջոյ, մենք ո՛չ առաջին եւ ո՛չ ալ վերջին երկիրն ենք, որ տնտեսական եւ ելեւմտական տագնապ կը դիմագրաւենք», ըսաւ ան:

Տիապ ընդգծեց, որ Լիբանան կարիքը ունի այնպիսի տնօրինումի, որմէ կարելի ըլլայ օգտուիլ: «Ճիշդ է, որ տակաւին կը գտնուինք երկրին նիւթական պարտաւորութիւնը վերադասաւորելու փուլին մէջ, սակայն մենք կարիքը ունինք այնպիսի ծրագիրի մը, որ կը փարատէ միջազգային ընտանիքին մտահոգութիւնները: Մենք պարտաւորութիւնը ունինք վերակազմաւորելու նաեւ դրամատնային մարզը, ինչպէս նաեւ Կեդրոնական դրամատունը, որ խոցելի յստակ կէտեր ունի», ըսաւ ան:

Վարչապետ Տիապ նկատել տուաւ, որ ներկայ կառավարութիւնը առաջին կառավարութիւնն է, որ ակնարկած է Կեդրոնական դրամատան խոցելի կէտերուն, որովհետեւ կառավարութիւնը սկիզբէն որոշած ու յայտարարած է, թէ իր աշխատանքին մէջ թափանցիկ պիտի ըլլայ:

Տիապ դիտել տուաւ, որ իբրեւ կառավարութիւն իրենք կը գործակցին տնտեսական խորհուրդներուն եւ ելեւմտական մարզի ներկայացուցիչներուն հետ, որպէսզի ելեւմուտքի նախարարութիւնը կարելի եղածին չափ օգտուի անոնց փորձառութիւններէն` բարելաւելու համար տնտեսական բարեկարգումի իր ծրագիրը:

Վարչապետ Տիապ նկատել տուաւ, որ իբրեւ կառավարութիւն այսօր կը գտնուին տնտեսական ծրագիրի ընդհանուր շրջագիծը վաւերացնելու յանձնառութեան տակ: «Սակայն ասիկա չի նշանակեր, որ եթէ մենք այդ ծրագիրին համաձայն գտնուինք, պիտի չկարենանք զայն փոփոխութեան ենթարկել: Ընդհակառակն` մենք փոփոխութիւններ կատարելու փոքր լուսանցք մը պիտի ձգենք: Բայց եւ այնպէս «Լազար» ընկերութիւնը կարիքը ունի ծրագիրի մը, որուն հիման վրայ քննարկումներ պիտի կատարուին, եւ որուն հիման վրայ պիտի կատարուի Լիբանանի նիւթական պարտաւորութեան վերադասաւորումը, որ 6-9 ամսուան աշխատանք կ’ենթադրէ», ըսաւ ան:

Վարչապետ Տիապ յայտնեց, որ բնականաբար իրենց պատասխանատուութիւնն է աշխուժացնել տնտեսական մարզի գործունէութիւնը` հաստատելով, որ իրենց տնտեսական ծրագիրը պէտք է հիմնուի ճարտարարուեստի, երկրագործութեան, դրամատնային մարզին եւ զբօսաշրջութեան մարզին վրայ, որպէսզի կարելի ըլլայ երկրին տնտեսական օղակը աշխուժացնել, ինչպէս նաեւ ներածումները նուազեցնել եւ արտածումները աւելցնել:

«Այս իմաստով կան շարք մը առաջարկներ, եւ խնդրոյ առարկայ նախարարութիւնները պիտի սերտեն աշխատանքի դրութիւնը եւ կառավարութեան ներկայացնեն իրենց առաջարկները», ըսաւ ան:

Նշենք, որ վարչապետ Տիապ երէկ վարչապետարանին մէջ ընդունեց Լիբանանի մէջ Եւրոպական Միութեան դեսպան Ռալֆ Թրաֆը:

LEAVE A REPLY

Please enter your comment!
Please enter your name here