Արցախի Հարցին Մասին Լաւրովի Տարօրինակ Յայտարարութիւնը. Մնացականեան Կը Պատասխանէ

0
418

ԵՐԵՒԱՆ, «Լրագիր».- Երեքշաբթի, 21 Ապրիլին, Գորչակովի անուան հանրային դիւանագիտության աջակցութեան ակումբի անդամներուն հետ առցանց հանդիպումի մը ընթացքին, Արցախի հակամարտութեան մասին հարցումի մը պատասխանելով` Ռուսիոյ արտաքին գործոց նախարար Սերկէյ Լաւրով յայտարարեց, որ հակամարտ կողմերը ներկայիս աշխուժօրէն կը քննարկեն արցախեան հարցի կարգաւորման այն նախագիծերը, որոնք բանակցութիւններու սեղանին դրուած էին Ապրիլ 2019-ին, Մոսկուայի մէջ տեղի ունեցած Հայաստանի եւ Ատրպէյճանի արտաքին գործոց նախարարներուց հանդիպումին:

«Այդ փաստաթղթերը կ՛ենթադրեն կարգաւորման գործին մէջ յառաջխաղացք՝ փուլային մօտեցման հիմքով, որ կ՛ենթադրէ առաւել արդիական հարցերու լուծում առաջին փուլին՝ Լեռնային Ղարաբաղի շուրջ կարգ մը շրջաններու ազատում եւ փոխադրութեան, տնտեսական եւ այլ հաղորդակցութիւններու բացում: Երբ յանգինք այդ փաստաթուղթերուն ստորագրման որոշման, շատ կարեւոր քայլ կ՛ըլլայ ՄԱԿի Անվտանգութեան խորհուրդի բանաձեւերու կատարման գործին մէջ, որ կը պահանջէր դադրեցնել պատերազմը եւ սկսիլ պայմանաւորուիլ», ըսաւ Լաւրով:

Հայաստանի արտաքին գործոց նախարար Զօհրապ Մնացականեան մամլոյ ասուլլիսի մը ընթացքին յայտնեց, որ Հայաստանի կառավարութիւնը վերջին երկու տարիներուն ընթացքին Արցախի հարցին գծով եղած է շատ թափանցիկ եւ կառավարութեան դիրքորոշումը ու տեսակէտները հանրութեան ներկայացուցած է շատ պարզ եւ յստակ ձեւով: «Հիմա աւելի կոնկրետացնեմ (յստակացնեմ-Խմբ.)՝ այո, այդ մեկնաբանութեան մէջ եղել են յղումներ բազմաթիւ փաստաթղթերի, սկսած Քի Վեսթից մինչեւ վերջերս, խօսքը գնացել է նաեւ, թե ինչ փաստաթղթի մասին է խօսքը այս երկու տարուայ ընթացքում: Եկէք լինենք շատ յստակ, նման մօտեցումներ ի յայտ են եկել 2014 թուականին, 2016 թուականին եւ այդ մօտեցումներն ընդունելի չեն եղել հայկական կողմերի համար: 2018 թուականից ի վեր քննարկումները սահմանափակուել են առանձին տարրերի շուրջ կողմերի մօտեցումների քննարկման, գնահատման վերաբերեալ», ըսաւ Մնացականեան:

Ան Մնացականեան աւելցուց՝ ըսելով, որ 2014ին առաջարկուած տարբերակը այսօր բանակցութիւններու սեղանին վրայ չէ, եւ թէ հայկական կողմը առաջնահերթօրէն ընդգծած է Արցախի բնակչութեան ապահովութեան հարցը: Ինչ կը վերաբերի տարածքներու հարցին՝ Մնացականեան ըսաւ, որ այդ տարածքները առաջին հերթին ապահովութեան գօտի են, ուր կը գտնուին նաեւ մեր պաշտպանողական գիծերը: Մնացականեան աւելցուց, որ հայկական որեւէ կողմ չի կրնար ենթադրել նոյնիսկ, որ կարելի է այս դիրքորոշումը վերանայիլ, վտանգի տակ դնելով Արցախի բանակչութիւնը:

Շարունակելով, Մնացականեան ըսաւ, որ երկրորդ կարեւորագոյն բանակցային կէտը ինքնորոշման սկզբունքն է, որ հայկական կողմին համար առաջնային եւ գերակայ է: Ան ըսաւ, որ ինքնորոշման իրաւունքի մասին արտայայտութիւնը կը բացատրուի միայն Արցախի ժողովուրդին անվտանգութեամբ, Արցախի կարգավիճակին յստակացումով եւ ժողովուրդին ազատ կամքի արտայայտութեամբ, առանց որեւէ սահմանափակումի:

Մնացականեան եզրակացուց՝ ըսելով, որ Արցախի հարցին խաղաղ լուծումին կարելի է հասնիլ փոխզիջումներու միջոցաւ, իսկ զիջումներ չեն եղած եւ պիտի չըլլալան:

LEAVE A REPLY

Please enter your comment!
Please enter your name here