Խորհրդարանի Օրէնսդրական Նիստը Վաւերացուց Շարք Մը Օրինագիծեր

0
183

Երէկ առաւօտեան ժամը 11:30-ին ԵՈՒՆԵՍՔՕ-ի պալատին մէջ տեղի ունեցաւ խորհրդարանական օրէնսդրական նիստը, որուն նախագահեց խորհրդարանի նախագահ Նեպիհ Պըրրին` մասնակցութեամբ երեսփոխաններու եւ նախարարներու: Նիստը պիտի շարունակուի այսօր եւ վաղը եւս:

Խորհրդարանի նախագահը, արձագանգելով անոնց, որոնք խորհրդարանը կը մեղադրեն իր պարտականութիւններուն մէջ թերանալու եւ իր դերը չկատարելու յանցանքով, ըսաւ, որ խորհրդարանը կը կատարէ իր պարտականութիւնները եւ աւելի՛ն: Պըրրի դիտել տուաւ, որ բոլորը գիտեն, թէ այս նիստը նախապէս որոշուած էր, եւ թէ ինչպէս խանգարուած էր անոր կայացումը` աւելցնելով, թէ խորհրդարանի գրասենեակի մարմինը զետեղած էր բոլոր ծրագիրները եւ առաջարկները իր օրակարգին վրայ, սակայն դժբախտաբար ոմանք կը հաւատան ինչ որ կ՛ըսուի խորհրդարանի դերին մասին: «Խորհրդարանը կը կատարէ իր դերը, եւ աւելի՛ն, թէ՛ օրէնսդրական, թէ՛ կարգաւորող, անկախ ըսուածներէն», շեշտեց խորհրդարանի նախագահը:

Խորհրդարանը իր առաջին օրէնսդրական նիստին ընթացքին վաւերացուց 66 կէտերէ բաղկացած օրինագիծերուն 16-ը:

Խորհրդարանը կրկին կառավարութեան տրամադրութեան տակ դրաւ միջազգային հիմնադրամի հետ վարկի պայմանագիրը, որ կը վերաբերի անասնաբուծութիւնը խթանելու գիւղատնտեսութեան զարգացման, երբ այդ ծրագիրը նախապէս յետս կոչուած էր վարչապետ Տիապի կողմէ` մեքանիզմը սահմանելու եւ ծրագիրը ուսումնասիրելու համար:

Խորհրդարանը վաւերացուց նաեւ 40 միլիոն տոլարի արժողութեամբ համաշխարհային դրամատան ներկայացուցած վարկը, որ յատկացուած է վերակառուցման եւ զարգացման` Լիբանանի մէջ առողջապահական համակարգը ամրապնդելու ծրագիրը գործադրելու համար, եւ որմէ մաս մը պիտի տրամադրուի «Քորոնա» ժահրին դէմ պայքարելու:

Խորհրդարանը նաեւ վաւերացուց պաշտօնեաներու մասին օրէնքի 61-րդ յօդուածին մէջ փոփոխութիւն կատարելու առաջարկը:

Ներկայացուցեաւ նաեւ այն, որ կարելիութիւն տրուի 2020 թուականի պիւտճէի մասին օրէնքի 32-րդ յօդուածի դրոյթներով նախատեսուած անձերուն` «Քորոնա» ժահրին դէմ պայքարին համար նուիրատուութիւններ եւ օժանդակութիւններ տրամադրելու համար: Այս ծրագիրը վաւերացուեցաւ:

Վաւերացուեցաւ նաեւ Լիբանանի մէջ Քայրոպաքթիքի կիրարկումը կարգաւորող օրինագիծը:

Առաջադրուեցաւ թիւ 5272 բանաձեւը, որ ուղղուած է հանրային մարզին մէջ փտածութեան դէմ պայքարին եւ փտածութեան դէմ պայքարելու ազգային մարմինի ստեղծման ուղղուած օրէնքը վերականգնելուն: Ատիկա վաւերացուեցաւ մէկ յօդուածով:

Վաւերացուեցաւ նաեւ այն օրինագիծը, որուն համաձայն, «անկարներ» եզրը պիտի փոխարինուի «յատուկ կարիքներ ունցողներ» եզրով:

Երեկոյեան ժամը 6:00-ին շարունակուեցաւ օրէնսդրական նիստը, որուն ընթացքին վաւերացուեցաւ կանեփի ցանքի օրինականացումը:

LEAVE A REPLY

Please enter your comment!
Please enter your name here