«Ուեպինարին Նպատակն Է Աշխուժացնել Նախարարութեան Եւ Տարբեր Միութիւններուն Ու Ֆետերասիոններուն Միջեւ Գործակցութիւնը» Շեշտեց Նախարար Օհանեան – Գէորգեան

0
320

Կազմակերպութեամբ երիտասարդութեան հարցերու եւ մարմնակրթութեան նախարարութեան, տեղի ունեցաւ Լիբանանի սկաուտական միութիւններու ներկայացուցիչներու ուեպինար մը, նիւթ ունենալով «Ղեկավարներուն հզօրացումը` մարտահրաւէրներու դիմակայումին մէջ»:

Ուեպինարը վարեց փորձագէտ Նատին Զէյնուն Խուրի, իսկ անոր մասնակցեցան «Սքութ տիւ Լիպան»-ի նախագահ Եուսեֆ Խատաժ, ինչպէս նաեւ Լիբանանի մէջ գործող 18 սկաուտական միութիւններ, որոնց շարքին` ՀՄԸՄ-ը:

Խուրի այս ուեպինարը շատ կարեւոր նկատեց` ընդգծելով անոր շօշափած նիւթը, որ բծախնդրութեամբ ծրագրուած է: Ան հաստատեց նաեւ, որ միութիւններու ներկայացուցիչները իրենց կարգին եղած են բծախնդիր` ապացուցելով, որ անոնք ընկերութեան մէջ պատասխանատուութիւններ ստանձնած եւ ազդեցութիւն ունեցող դէմքեր են:

Խուրի շնորհակալութիւն յայտնեց Երիտասարդութեան հարցերու եւ մարմնակրթութեան նախարար Վարդինէ Օհանեան-Գէորգեանին եւ բարձր գնահատեց անոր ջանքերը` բացառիկ կերպով կազմակերպուած այս ուեպինարին առիթով:

Նախարար Օհանեան-Գէորգեան շեշտեց, որ նախարարութիւնը այս ուեպինարը կազմակերպած է` մեկնելով այն փափաքէն, որ «Քորոնա»-ի համաճարակին պատճառով յայտարարուած բնակարանային մեկուսացումին ընթացքին պէտք է առնել քայլեր, որոնք կարելի եղածին չափ պիտի աշխուժացնեն միութիւններուն աշխատանքները:

«Այս նախաձեռնութեան նպատակն է նաեւ նախարարութեան ու տարբեր միութիւններու ու ֆետերասիոններու միջեւ գործակցութիւնը աշխուժացնել: Պիտի աշխատինք կազմակերպել նաեւ այլ ուեպինարներ, որոնց ընթացքին պիտի քննարկուին նախարարութեան կապուած այլ միութիւնները հետաքրքրող եւ անոր աշխատանքը բարեկարգող թեմաներ: Այդ նիւթերը պիտի ճշդուին իւրաքանչիւր մարզի կարիքներուն համաձայն», շեշտեց նախարարը:

«Սքութ տիւ Լիպան»-ի ներկայացուցիչը իր կարգին արժեւորեց Խուրիի ցուցմունքները եւ շնորհակալութիւն յայտնեց նախարարութեան` մաղթելով, որ ան յաւելեալ առիթներ կ’ընծայէ իրենց` նման նիւթեր արծարծելու եւ իրենց կարողութիւնները բարելաւելու իմաստով:

LEAVE A REPLY

Please enter your comment!
Please enter your name here