«Քորոնա» Ժահրի Տարածման Կանխարգիլման Միջոցառումներու Քննարկում` Նախագահական Պալատին Մէջ

0
246

Հանրապետութեան նախագահ զօր. Միշել Աուն երէկ Պաապտայի պալատին մէջ ընդունեց առողջապահութեան նախարար Համատ Հասանը եւ Համաշխարհային առողջապահութեան կազմակերպութեան ներկայացուցիչ Իման Շանքիթին: Հանդիպման ընթացքին քննարկուեցան «Քորոնա» ժահրին դէմ պայքարելու համար գործադրուող միջոցառումները եւ յաջորդ փուլը, որ կ’ընդգրկէ «Քորոնա» ժահրի պատահական քննութիւններ կատարել Լիբանանի բոլոր շրջաններուն մէջ, եւ որուն նպատակն է յստակ պատկեր տալ Լիբանանի մէջ ժահրի տարածման իրավիճակին մասին:

Հանդիպումէն ետք նախարար Հասան լրագրողներուն յայտնեց, որ անդրադարձ կատարուած է գործադրուող միջոցառումներուն, ընդհանուր զօրաշարժին, եւ առնուելիք յաջորդ քայլերուն: Ան շնորհակալութիւն յայտնեց Քուէյթին, որ տրամադրած է «Փի.Սի.Ար.»-ի քննութիւններ, ինչ որ կարելի կը դարձնէ օրական 2000 քննութիւն կատարել: Նախարարը ընդգծեց, որ մինչեւ մայիս 10 Լիբանանի մէջ կատարուած քննութիւններու թիւը պիտի հասնի միջազգային միջին թիւին, որ կը կազմէ 15000 քննութիւն` իւրաքանչիւր 1 միլիոն մարդու համար: Ըստ նախարարին, անկէ ետք պիտի յստականան առնուելիք քայլերը:

Ապա խօսք առաւ Շանքիթի, որ շնորհակալութիւն յայտնեց նախագահին եւ նախարարին մնայուն աջակցութեան համար: Ան վստահեցուց, որ Համաշխարհային առողջապահական կազմակերպութիւնը սերտօրէն կը գործակցի Լիբանանի առողջապահութեան նախարարութեան հետ, եւ յայտնեց, որ նախարարութեան գործադրած բոլոր միջոցառումները արդիւնաւէտ էին: Ան բոլորին կոչ ուղղեց համագործակցելու եւ շարունակելու հետեւիլ միջոցառումներուն: Շանքիթի աւելցուց, որ կազմակերպութիւնը աջակցութիւն պիտի ցուցաբերէ նաեւ կառավարական հիւանդանոցներուն:

Գնահատելով զետեղուած նպատակներու արդիւնաւէտութիւնը` նախարար Հասան յայտնեց, որ հակառակ լրատուամիջոցներու բարձրացուցած մեծ աղմուկին եւ քաղաքացիներու վախին, փաստուեցաւ, որ հաստատութենական աշխատանքի ճամբով կարելի է պաշտպանել հանրութիւնը` հակառակ փոքր կարելիութիւններուն: Ան աւելցուց, որ մինչեւ հիմա իրագործուած աշխատանքները կը գտնուին զետեղուած ծրագիրին ծիրին մէջ, եւ այժմ կը կատարուի այդ ծրագիրի գործադրութեան շարունակութիւնը: Նախարար Հասան զգուշացուց թիւերէն խաբուելէ եւ յայտնեց, որ նախանցեալ օր «Քորոնա» ժահրով ոչ մէկ պարագայ արձանագրուիլը բաւարար տուեալ չէ որոշումներ տալու: Նախարարը աւելցուց, որ պիտի սկսի արտերկրի լիբանանցիներու վերադարձի երկրորդ փուլ, ինչ որ յաւելեալ պատասխանատուութիւն է, հետեւաբար` ընդհանուր զօրաշարժը պիտի շարունակուի: Նախարարը յայտնեց, որ երբ զօրաշարժը դադրի, մարդիկ բնականաբար պիտի սկսին իրարու մօտ գալ, հետեւաբար ժահրի տարածման երկրորդ ալիքը կրնայ հաւանական ըլլալ, ուրեմն պէտք է շատ զգուշ ըլլալ եւ շարունակել պատահական քննութիւնները: Ընդհանուր զօրաշարժին գծով նախարարը ըսաւ, որ ատիկա պիտի շարունակուի: Ան աւելցուց, որ ուրբաթ օր պիտի գումարուի Ապահովութեան գերագոյն խորհուրդի նիստը, եւ զօրաշարժի որոշումը կու տայ կառավարութիւնը իբրեւ ամբողջութիւն եւ ո’չ միայն առողջապահութեան նախարարութիւնը:

Շանքիթիի հարց տրուեցաւ ժահրին տարածումը կանխարգիլելու բժշկական փորձարկումներուն մասին: Ան յայտնեց, որ տակաւին յստակ տուեալներ չկան պատուաստի եւ դեղերու գծով: Ինչ կը վերաբերի ընդհանուր զօրաշարժին, ան յանձնարարեց երկու շաբաթով երկարաձգել ատիկա` նշելով, որ ի վերջոյ այդ որոշումը կառավարութիւնը կու տայ: Ան յայտնեց, որ հակառակ տնտեսական ծանր վիճակին, պէտք է շատ զգուշ վարուիլ թիւերուն հետ, եւ եթէ որոշում տրուի նախազգուշական միջոցառումները դադրեցնելու, ապա այդ դադրեցումը պէտք է կատարուի աստիճանաբար եւ շատ զգուշօրէն:

«Քորոնա» Ժահրով Վարակուած 8 Նոր Պարագաներ. Ընդհանուր Թիւ` 685

Առողջապահութեան նախարարութիւնը երէկ յայտարարեց, որ «Քորոնա» ժահրով վարակուածներուն թիւը հասաւ 685-ի, երբ վերջին 24 ժամուան ընթացքին արձանագրուեցան 8 նոր պարագաներ: Մահացաւ 1 հոգի, եւ ապաքինեցան 130 վարակուածներ:

Հաղորդագրութեան մէջ կ’ըսուի, որ վարակուածներուն 9 առ հարիւրին վիճակը ծանր է, մօտաւորապէս 69 առ հարիւրինը` թեթեւ եւ միջակ, իսկ անոնց աւելի քան 22 առ հարիւրը ոչ մէկ ախտանշան ունի: Նշուած է նաեւ, որ 20-էն 29 տարեկան խմբաւորումին մէջ գտնուող անձերը կը կազմեն վարակուածներուն աւելի քան 24 առ հարիւրը:

Երեկոյեան հաղորդուեցաւ, որ Պշարրէի մէջ արձանագրուած է «Քորոնա» ժահրով վարակման 3 նոր պարագայ:

Պատահական Քննութիւնները Կը Շարունակուին

Առողջապահութեան նախարարութեան բժշկական խմբակները շարունակեցին լիբանանեան զանազան շրջաններուն մէջ կատարել «Փի.Սի.Ար.»-ի քննութիւնները: Անոնք երէկ այցելեցին Ժեզզին, Պընթ Ժպէյլ, Պաալպեք տանող ճամբան, Պաթրուն տանող ճամբան:

Ժեզզընի մէջ 300 պատահական քննութիւններ կատարուեցան կառավարական հիւանդանոցին մէջ:

Մէկ Պարագայ` Պաղեստինեան Ժալիլ Գաղթակայանին Մէջ

Պաալպեքի պաղեստինեան Ժալիլ գաղթակայանին մէջ հաստատուեցաւ, որ կին մը վարակուած է «Քորոնա» ժահրով: Առողջապահութեան նախարարութեան խումբը կատարեց քննութիւններ` անոր ընտանիքի անդամներուն եւ շրջապատի անդամներուն: Քննութիւններուն թիւը հասաւ 97-ի: Կառավարական հիւանդանոցին եւ Նեպի Շիթ աւանին մէջ կատարուած քննութիւններուն թիւը հասաւ 180-ի: Հականեխուեցաւ ամբողջ գաղթայականը, եւ առնուեցան անհրաժեշտ նախազգուշական միջոցառումները:

LEAVE A REPLY

Please enter your comment!
Please enter your name here