ԿՈՉ

0
235

Երէկ Պուրճ Համուտի քաղաքապետ Մարտիկ Պօղոսեան շրջանի քաղաքացիներուն եւ բնակիչներուն յղեց հետեւեալ կոչը.

Պուրճ Համուտի յարգելի՛ քաղաքացիներ եւ բնակիչներ,

«Քորոնա» համաճարակի պետական միջոցառումներուն ապահոված դրական արդիւնքներուն զուգահեռ, նկատելի է, որ անոնք ծանրաբեռնած են բազմաթիւ քաղաքացիներ ու բնակիչներ, եւ քաջալերած` որոշ թուլութիւն եւ անփութութիւն ցուցաբերելու:

Յարգելի՛ քաղաքացիներ ու բնակիչներ,

Անհրաժեշտ է, որ բոլորս գիտակցինք, թէ աշխարհը, լիբանանեան հայրենիքն ու մեր շրջանը ցարդ դուրս չեն եկած վտանգաւոր փուլէն, եւ որեւէ թուլութիւն կամ անփութութիւն պատճառ կրնայ դառնալ կացութեան արագ վատթարացումին, մանաւանդ Պուրճ Համուտի նման ժողովրդային շրջանի մը մէջ, որ կը յատկանշուի բնակչութեան խտութեամբ եւ ընկերային ու տնտեսական աշխուժ գործունէութեամբ:

Ուստի, կրկին կոչ կ’ուղղեմ ձեզի բծախնդրօրէն գործադրելու պետական եւ անձնական նախազգուշական միջոցառումներ, սկսեալ բնակարան մնալէն եւ միայն անհրաժեշտութեան պարագային դուրս գալէն, մինչեւ հեռու մնալ ամէն տեսակի հաւաքէ, փակ պահել հաստատութիւնները եւ բացառուած հաստատութիւններու բացման պարագային գործադրելու զգուշութեան բոլոր միջոցառումները:

Նաեւ անհրաժեշտ է բծախնդրօրէն շարունակել անձնական եւ շրջապատի նախազգուշական միջոցառումները, ինչպէս` դիմակներու եւ ձեռնոցներու գործածութիւն, ձեռքերու մաքրութիւն եւ հականեխում, շէնքերու հասարակաց գործածութեան վայրերու եւ ընդհանուրին առջեւ բաց վայրերու մաքրութեան պահպանում, եւ այլն:

Եզրափակելու համար կը վերահաստատեմ, որ Պուրճ Համուտի քաղաքապետութիւնը պիտի շարունակէ աշխատիլ բոլոր միջոցներով ապահովելու շրջանին ու բնակչութեան առողջական վիճակը եւ մեղմացնելու անոնց դիմագրաւած դժուարութիւնները:

Յուսալով, որ մեր գործակցութեամբ միասնաբար կը շրջանցենք այս ճգնաժամը:

ՄԱՐՏԻԿ ՊՕՂՈՍԵԱՆ
Պուրճ Համուտի քաղաքապետ

LEAVE A REPLY

Please enter your comment!
Please enter your name here