Պասիլ. «Ոչ Մէկ Փտած Պիտի Արժանանայ Մեր Հովանիին, Իսկ Նաւթային Երկիր Ըլլալու Լիբանանի Իրականութեան Դէմ Հակաքարոզչութիւն Պէտք Չէ Կատարել»

0
166

Ազգային ազատ հոսանք կուսակցութեան ղեկավար, երեսփոխան Ժըպրան Պասիլ երէկ մամլոյ ասուլիսի մը ընթացքին անդրադարձաւ տնտեսական ծրագիրին, ինչպէս նաեւ նաւթին, ելեկտրականութեան մարզին, ինչպէս նաեւ երկիրը փտածութենէ դուրս բերելու հաւանական լուծումներուն:

Պասիլ յայտնեց, որ Լիբանանի հանրապետութեան նախագահը կարելի չէ վար առնել, բացի եթէ ան փափաքի հրաժարիլ, իսկ այդ մէկը հանրապետութեան նախագահ զօր. Միշել Աունին չի վերաբերիր:

Մաքսանենգումի հարցին մասին խօսելով` Պասիլ ընդգծեց, որ որդեգրուելիք դասաւորումները արդէն իսկ ծանօթ են, իսկ անցքերը հակակշիռի չենթարկելու կարողութեան պատճառաբանութիւնները կը կատարուին մեղսակիցներու կողմէ` ըլլան անոնք ապահովական կառոյցներ, թէ գետնի վրայ գործող ուժեր: Ան հաստատեց, որ այս իմաստով կառավարութիւնը պէտք է արագ որոշում տայ:

Պասիլ կոչ ուղղեց մարոնի համայնքի Պշարա Ռայի պատրիարքին, որ շտապ ծրագիրի մը շուրջ համախմբէ զիրենք, որպէսզի կարելի ըլլայ փլուզման վերջ մը դնել: «Մենք պատրաստ ենք մասնակցելու եւ միացեալ ջանքերով գործելու` ի նպաստ բոլորին շահերուն», ըսաւ ան:

Պասիլ յայտնեց, որ լիբանանեան պետութիւնը առաջին պատասխանատուն է, հետեւաբար ան չի կրնար ներդրում ունենալ արձանագրուած այս վնասին մէջ: «Մենք կը մերժենք դրամատուներուն մէջ հաշիւ ունեցող լիբանանցիներուն գումարներէն իւրացում կատարել, սակայն ատիկա անկարելի է, եթէ կարելի չըլլայ պետական պահեստը օգտագործել: Եթէ լիբանանցիին գումարներուն դպչինք, ապա լիբանանցիներն ու նորահաս սերունդները իրենց գումարները դրամատուներուն մէջ չեն զետեղեր` հարուածելով դրամատնային համակարգը, որ երկրին տնտեսութեան հիմնասիւներէն մէկն է», ըսաւ ան:

Պասիլ ակնարկեց նաեւ պետութենէն իւրացուած գումարները վերադարձնելու կարեւորութեան: Ան կոչ ուղղեց ստուգելու պետական մարզին մէջ ծառայող բոլոր պատասխանատուներուն հաշիւները եւ զգայացունց գումարներ նշմարելու պարագային պատասխանատուութեան կանչելու զանոնք:

Պասիլ նշեց, որ այս իմաստով իրենք կը գործակցին խորհրդարանի նախագահ Նեպիհ Պըրրիի հետ, որպէսզի կասեցնեն գումարներու դուրս փոխանցումները` կարգ մը բացառութիւններով:

Պասիլ շեշտեց, որ ուժանիւթի եւ ջուրի հարցերու նախկին նախարար Նատա Պուսթանիի օրով ի յայտ եկաւ խարդախուած նաւթի թղթածրարը, որ ելեկտրական կայաններուն մէջ խանգարումներ պատճառած էր` ըստ Ֆրանսայի ելեկտրականութեան ընկերութեան տեղեկագիրին:

«Այս հարցը Պուսթանի հետապնդեց, նոյնիսկ երբ ան այլեւս նախարար չէր, իսկ ապահովական այն մարմինը, որ կը գործէ այս իրականութիւնը փոխելու ուղղութեամբ, յստակ նպատակներ կը հետապնդէ, եւ անոր նպատակները յստակ են: Ոչ ոք թող մեր միջնորդութիւնը խնդրէ, ոչ ոք թող փորձէ մեր վրայ ճնշում բանեցնել` տարբեր համաձայնութիւններու եւ գործարքներ գոյացնելու միտումով», ըսաւ ան` աւելցնելով, որ իրենք կը մերժեն փտածները պաշտպանել կամ զանոնք իրենց հովանիին տակ առնել:

Իր խօսքը ուղղելով Ազգային ազատ հոսանք կուսակցութեան դէմ յարձակող քաղաքական կողմերուն, որոնք գաղտնօրէն իրենց նամակներ կը յղեն, Պասիլ ըսաւ. «Բոլոր անոնց կ՛ըսենք, որ դուք մեզի դէմ կը լարուիք եւ մեզ կը նախատէք, ամէն անգամ երբ ձեր շահերը կը վտանգուին: Կ՛ուզենք հաստատել, որ մենք ոչ մէկ ձեւով պիտի զիջինք փտածութեան դիմաց մեր մղած պայքարէն»:

Պասիլ կոչ ուղղեց Կեդրոնական դրամատան մէջ անհրաժեշտ նշանակումները կատարելու` աւելցնելով, որ ելեկտրականութեան մարզին պատճառած նիւթական վնասները ճիշդ է որ մեծ են, «սակայն այդ առնչութեամբ ներկայացուած հսկայական գումարները, որոնց գծով մեզ կը փորձեն պատասխանատու նկատել, անճիշդ են եւ սուտասանութեան շարքին կը դասուին», հաստատեց ան:

Պասիլ նկատել տուաւ, որ նաւթահորերու պեղման աշխատանքը իր առաջին փուլէն յստակ չ՛ըլլար` աւելցնելով, որ միջազգային ընկերութիւններու տեղեկագիրներուն հիման վրայ է, որ յայտարարուած է, թէ Լիբանանի մէջ նաւթ եւ բնական կազ գոյութիւն ունի, եւ պէտք չէ այդ իմաստով Լիբանանի բնական հարստութեան դէմ հակաքարոզչութիւն կատարել:

LEAVE A REPLY

Please enter your comment!
Please enter your name here