«ԱԶԴԱԿ»-ի 42 Լսարանականներ Մասնակցեցան «Նոր Աշխարհակարգի Ձեւաւորման Միտումներ» Թեմայով Առցանց Զեկուցում-Քննարկումին

0
237

«Ազդակ»-ի առցանց չորրորդ լսարանը ունէր տարբեր ձեւաչափ: Արդարեւ, երեք դասախօսներ ենթանիւթերով զեկուցեցին «Նոր աշխարհակարգի ձեւաւորման միտումներ» ընդհանուր թեմայի ներքեւ ներկայացուած բաժիններուն մասին:

Պէյրութէն դոկտ. Ժան Կէօքճեան զեկուցեց Միջին Արեւելքն ու ռուսական գործօնը, Երեւանէն դոկտ. Վահրամ Տէր Մաթեւոսեան` Հայաստանը եւ կովկասեան տարածաշրջանը աշխարհաքաղաքական խաչմերուկներու եւ շահերու վրայ, իսկ Պուէնոս Այրէսէն դոկտ. Խաչիկ Տէր Ղուկասեան` Միացեալ Նահանգները, Եւրոպական Միութիւնը եւ Չինաստանը բազմաբեւեռ համակարգին մէջ նիւթերուն մասին: Լսարանականները նախքան ներկայացումը իւրաքանչիւր նիւթի մասին մասնակցեցան յատուկ հարցախոյզի: Լսարանը վարեց «Ազդակ»-ի ելեկտրոնային բաժնի աշխատակից Մինաս Հանս Քէհեան:

«Քորոնա» ժահրի ստեղծած իրավիճակը, միջպետական յարաբերութիւններու փոփոխութիւնը, գերտէրութիւններու նկրտումները ներկայացուեցան ընդհանուր համայնապատկերի սահմաններու մէջ: Այս բոլոր գործընթացներուն առընթեր ռուսական գործօնի միջինարեւելեան տարածաշրջանի ելեւէջները, Հայաստանի կովկասեան քաղաքականութիւնը եւ յետվարակային ձեւաւորուող տակաւին անորոշ աշխարհակարգի ուղղութեամբ տարբեր բեւեռներու կիրարկած քաղաքական ուրուագիծերը վերլուծական մօտեցումով ներկայացուեցան լսարանին:

Զեկուցումներուն յաջորդեց աշխարհի տարբեր երկիրներէ առցանց լսարանին մասնակցողներու կողմէ հարցումներու եւ տեսակէտներու բաժինը:

LEAVE A REPLY

Please enter your comment!
Please enter your name here