ՀՕՄի Արեւմտեան Ամերիկայի Շրջանը Լիբանանահայութեան Անմիջական Օժանդակութեան Համար Կը Նուիրէ 20 Հազար Տոլար

0
99

«Քորոնա» ժահրին ստեղծած տագնապալի պայմաններուն եւ Լիբանանի ընկերային ու տնտեսական դժուարութիւններուն դիմաց լիբանանահայութեան զօրակցելու նպատակով եւ անոր գոյերթին համար Հայ օգնութեան միութեան Արեւմտեան Ամերիկայի շրջանը կը նուիրէ 20.000 տոլար:

ՀՕՄ-ի Կեդրոնական վարչութիւնը տարուան սկիզբը կոչ ուղղեց Լիբանանի քաղաքական անկայուն իրավիճակին պատճառով ստեղծուած տնտեսական տագնապին մէջ սատարելու լիբանանահայութեան անմիջական օժանդակութեան 3 ծրագիրներուն` «Յոյսի արկղ»-ին, «Գոյատեւման պիտոյքներ»-ուն եւ «Պնակ մը կերակուր»-ին, որոնք պիտի բաժնուին խնամքի եւ օգնութեան կարօտ հայորդիներուն ու ծառայեն կարիքաւոր ընտանիքներուն հասնելու:

Հակառակ համաճարակին ստեղծած արտասովոր տագնապին եւ պայմաններուն յարուցած խոչընդոտներուն` ՀՕՄ-ի Արեւմտեան Ամերիկայի շրջանի մասնաճիւղերը, անդամուհիներ ու անհատներ անմիջապէս արձագանգեցին կոչին, եւ մարդասիրական գործին նուիրեալ մեր անդամները, կամաւոր ծառայութեան սկզբունքով, իրենց կարելին ըրին, կազմակերպեցին ձեռնարկներ եւ դրամահաւաք` օժանդակելու համար տագնապահար հայորդիներու կարիքներուն:

ՀՕՄ-ի աշխատանքները հարազատ արտայայտիչները կը հանդիսանան միութեան առաքելութեան եւ «Ժողովուրդիս հետ ժողովուրդիս համար» խորիմաստ նշանաբանին:

Ստեղծուած իրավիճակին մէջ երկրին դիմաց ցցուած մարտահրաւէրները յաղթահարելու համար ձեռք-ձեռքի տալու պահն է, ի մասնաւորի Լիբանանի հայ համայնքին` այս կարեւոր միջավայրին ու ամրոցին, որ տակաւին շատ բան ունի տալիք հայ կեանքին` իր ունեցած համահայկական ուրոյն դերակատարութեամբ:

Օգնութիւնը միայն մեր պարտականութիւնը չէ, այլ` մեր պարտաւորութիւնը:

Մնացէք ապահով եւ առողջ` ճգնաժամը մօտիկ ապագային յաղթահարած տեսնելու ակնկալութեամբ:

ՀԱՅ ՕԳՆՈՒԹԵԱՆ ՄԻՈՒԹԵԱՆ ԱՐԵՒՄՏԵԱՆ
ԱՄԵՐԻԿԱՅԻ ՇՐՋԱՆԱՅԻՆ ՎԱՐՉՈՒԹԻՒՆ

LEAVE A REPLY

Please enter your comment!
Please enter your name here